மாணவர் முரசு
இ-பேப்பர்
மேடைப் படைப்புகளில் இடம்பெறுவோரை கேமராக்களைக் கொண்டு பல விதமாகப் படமெடுப்பது வழக்கமாக நிகழும் ஒன்று. ஆனால் அதே கேமராக்களை மனிதர்கள் நேரடியாக இயக்காமல் இருப்பதைப் பலர் கேள்விப்படாமல் இருக்கலாம்.
இத்தகைய 'தானியக்க' கேமராக்களைப் பொதுவாக மேடை நிகழ்ச்சிகளின் பின்னணியில் செயல்படும் ஒருவர் இயக்குவார்.
இத்தகைய கேமராக்களை உள்ளூர் நிறுவனமான 'ரோல்ட்டன் புரோடக்ஷன்ஸ்' பயன்படுத்துகிறது. கொவிட்-19 சூழலால் நிகழ்ச்சிகளைத் தயாரிக்கும்போது இந்நிறுவனத்தால் போதுமான பணியாளர்களைக் களமிறக்கமுடியவில்லை.
இந்த கேமராக்கள் இப்பிரச்சினையைத் தீர்க்க உதவியதாகத் தெரிவிக்கப்பட்டது.
'பேன்-டில்ட்-ஸூம்' என்றழைக்கப்படும் 'பிடிஸி' கேமராக்களால் 'ரோல்ட்டன்' நிறுவனத்தால் மனிதவளப் பற்றாக்குறையைச் சமாளிக்கமுடிந்தது.
ஐந்து 'சிஆர்-என்500' ரக 'பிடிஸி' கேமராக்களை 'ரோல்ட்டன்' வாங்கியது. இவை ஒவ்வொன்றின் விலையும் 7,500 வெள்ளி. 'ரோல்ட்டன்' சென்ற ஆண்டு நடுப்பகுதியில் இவற்றை வாங்கியது.
இந்நிறுவனம் உள்ளரங்குப் படைப்புகளைத் தயாரிக்க இந்த கேமராக்களைப் பயன்படுத்தி வருகிறது. இவை ஓரிடத்திலிருந்து வேறொன்றுக்கு நகரமாட்டா. ஆனால் இருந்த இடத்திலிருந்து சுற்றியபடி ஒரு படைப்பில் இடம்பெறும் பல கலைஞர்களைப் படமெடுக்கமுடியும்.
'பிடிஸி' கேமராக்களை இயக்குவதற்கான செயல்பாட்டுக் கருவியின் விலை சுமார் 2,800 வெள்ளி. படைப்புகள் நடைபெறும் இடத்தின் ஒரு பகுதியில் இதை வைக்கலாம்.
இவ்வாறு இந்த கேமராக்களை ஒருவரால் இயக்கமுடியும். இந்த கேமராக்களைப் பயன்படுத்துவதன் மூலம் தன்னுடன் பணியாற்றும் பல்வேறு நிறுவனங்களின் தேவைகளை 'ரோல்ட்டனால்' பூர்த்திசெய்யமுடிந்துள்ளது. சில நிறுவனங்களுக்கு இப்படிப்பட்ட 'தானியக்க' கேமராக்கள், மனிதர்கள் நேரடியாக இயக்கும் கேமராக்கள் ஆகிய இரண்டு வகை கேமராக்களும் தேவைப்பட்டிருப்பதாகத் தெரிவிக்கப்பட்டது.
இந்த ஏற்பாட்டால் 'ரோல்ட்டன்' நிறுவனத்தால் பல திட்டங்களை ஒரே நேரத்தில் கையாளமுடியும்.
கேமராக்களை நேரடியாக இயக்கக்கூடிய படமெடுக்கும் நிபுணர்களைக் கொண்டு ஒரு நாளில் தயாராகும் படைப்புகளுக்குக் குறைந்தது 6,000 வெள்ளி செலவாகும் என்று 'ரோல்ட்டனின்' நிறுவனரான டேவிட் வோங் கூறினார்.
எனினும், கேமராக்களை இயக்கும் நிபுணர்களுக்குப் பதிலாக இந்த கேமராக்களை மட்டுமே பயன்படுத்துவது தங்கள் எண்ணமில்லை என்றும் திரு வோங் குறிப்பிட்டார். அனுபவம் வாய்ந்த கேமரா நிபுணர்களின் வேலைக்கு நிகர் வேறு ஏதும் கிடையாது என்பதை அவர் சுட்டினார்.
'பிடிஸி' கேமராக்களை இயக்குவது ஒரு திறன்.
மின்னிலக்க கேமராக்களை இயக்கக் கற்றுக்கொள்வது போன்றதுதான் இதுவும் என்று திரு வோங் சொன்னார்.
"பிடிஸி கேமராக்களை இயக்கக் கூடுதலான தொழில்நுட்பப் பணியாளர்களுக்குப் பயிற்சியளிப்பது இதற்கு வழியல்ல. நாம் செய்யவேண்டியது இந்தத் துறையில் கூடுதலான காணொளி இயக்குநர்களை ஊக்குவிப்பதே," என்று அவர் கூறினார்.
இசை தொடர்பிலான தகவல்கள், தயாரிப்பு அனுபவம், தொழில்நுட்பத் திறன்களை ஆகியவற்றைக் காணொளி இயக்குநர்கள் கொண்டிருப்பர். அவர்களால் 'பிடிஸி' கேமராக்களை இயக்கும் திறன்களை வளர்த்துக்கொள்ளமுடியும் என்றும் திரு வோங் குறிப்பிட்டார்.
இதர சில தயாரிப்பு நிறுவனங்களும் இத்தகைய மாறுபட்ட முயற்சிகளைக் கையாள்வதாகத் தெரிவிக்கப்பட்டது.