மாணவர் முரசு
இ-பேப்பர்
செயலாற்றல் குறைவு, எதிலும் தீவிர ஈடுபாடு இன்மை, சோர்வு இவையெல்லாம் ஆண்களின் உடலில் 'டெஸ்டோஸ்ட்ரோன்' எனும் ஹார்மோன் குறைவாக சுரப்பதைக் காட்டுவதாகக் கூறப்படுகிறது.
சிங்கப்பூரில் ஏறக்குறைய 26 விழுக்காட்டு ஆண்கள் 'டெஸ்டோஸ்ட்ரோன்' பற்றாக்குறையால் பாதிக்கப்பட்டுள்ளதாகத் தகவல்கள் கூறுகின்றன.
அண்மையில் பாதிக்கப்பட்ட ஒருவர், ஓராண்டுக்கு முன்பு இருந்ததைவிடத் தாம் அதிகமான மாறுபாட்டை உணர்வதாகக் கூறினார். எதிலும் கவனம் செலுத்தவே முடியவில்லை என்றார் அவர். 40 வயதாகும் அந்த ஆடவர், சிகிச்சைக்குப் பிறகு தன்னை மீட்டெடுத்ததுபோல் உணர்வதாகக் குறிப்பிட்டார்.
"இந்த 'டெஸ்டோஸ்ட்ரோன்' குறைபாட்டுடன் மனஅழுத்தம் அதிகமுள்ள வேலைகளில் ஈடுபடுவோருக்கு மாலை நேரத்திலேயே தூக்கம் கண்ணைச் சுழற்றும். பிரச்சினை என்னவென்றால் இரவு நன்றாக உறங்கினாலும் புத்துணர்ச்சி கிடைக்காது. உடன் வேலைசெய்வோருக்கு எளிதாகச் செல்லும் வாழ்க்கை இவர்களுக்கு மிகுந்த உளைச்சலைத் தருவதாகத் தோன்றும்," என்கிறார் ஆண்கள் நல மருத்துவரான டாக்டர் பெஞ்சமின் லோ.
சிலருக்குப் பாலியல் உறவிலும் சிக்கல் ஏற்படலாம்; மனச்சோர்வு, எளிதில் உடல் எடை கூடுதல் போன்றவற்றால் அவதிப்படுவர் என்றார் அவர்.
'டெஸ்டோஸ்ட்ரோன்' ஹார்மோன் ஆண்கள், பெண்கள் இருதரப்பினரின் உடல்களிலும் சுரக்கும் என்றாலும் ஆண் உடலில் இது அதிகம் காணப்படும். ஆண்மை, ஆரோக்கியமான எலும்புகள், வலுவான தசைகளைப் பராமரித்தல், செயலாற்றல், இதய ஆரோக்கியம் ஆகியவற்றுக்கு ஆண்களுக்கு இது மிக முக்கியம்.
20 முதல் 30 வயதில் ஆண்களின் உடலில் மிக அதிகமாக சுரக்கும் இந்த ஹார்மோன் வயதாக ஆகக் குறையும்.
உடல் உழைப்பு குறைவான வாழ்க்கைமுறை, உடல் பருமன், குறைவான உறக்கம், சிலவகை மருந்துகள், நீண்டகால மனஅழுத்தம் ஆகியவற்றாலும் 'டெஸ்டோஸ்ட்ரோன்' அளவு குறையக்கூடும். இதனால் நீரிழிவு, இதய நோய், மறதி நோய், எலும்பு அடர்த்திக் குறைபாடு போன்றவை ஏற்படும் என்கிறார் டாக்டர் லோ.
முறையான உடற்பயிற்சி இதற்கு நல்ல தீர்வாக அமையும். எடை தூக்கும் பயிற்சிகளும் உதவக்கூடும்.
சிங்கப்பூரில் இதற்கு சிகிச்சை எடுத்துக்கொள்ள முடியும். அன்றாடம் உட்கொள்ளும் மாத்திரைகள், சில மாதங்களுக்கு ஒருமுறை போடப்படும் ஊசிகள் என பலவகை சிகிச்சைகள் அளிக்கப்படுகின்றன. தோலில் தடவக்கூடிய களிம்புகளும் கிடைக்கின்றன.