மாணவர் முரசு
இ-பேப்பர்
சிங்கப்பூரின் புதிய கவர்ச்சித் தளங்கள்
சிங்கப்பூரில் ஒரு குட்டி உலகமே அடங்கியுள்ளது. உலகின் பல்வேறு இடங்களில் உள்ள கவர்ச்சித் தளங்கள் சிங்கப்பூரில் அமைந்துள்ளன.
யூனிவர்சல் ஸ்டூடியோ, எஸ்.இ.ஏ. மாபெரும் கடல்வாழ் உயிரின அருங்காட்சியகம், லாஸ் வேகாஸ் நகரில் இருப்பது போன்ற மெரினா பே சேண்ட்ஸ் மற்றும் ஜெண்டிங் சிங்கப்பூர் சூதாட்டக் கூடங்கள் போன்றவை அவற்றில் சில. இந்த நிலையில் சிங்கப்பூரின் சுற்றுலா துறையை மேலும் மேம்படுத்தும் வகையில் புதிய கவர்ச்சித் தளங்கள் அமைக்கப்பட்டு வருகின்றன.
அந்த வகையில் கரையோரப் பூந்தோட்டங்களில் உள்ள 'கிளவுட் ஃபாரஸ்ட்' கண்ணாடி காட்சியகம், இவ்வாண்டு இறுதியில் 'அவதார்' திரைப்படத்தில் வருவது போன்ற 'பண்டோரா' உலகமாக உருமாறுகிறது. சிட்டிநியான் ஹோல்டிங்ஸ், பிரபல பாலிவுட் திரைப்பட இயக்குநர் ஜேம்ஸ் கேமரன், ஜோன் லாண்டாவ்'ஸ் லைட்ஸ்டோர்ம் எண்டர்டெய்ன்மெண்ட் கூட்டுத் தயாரிப் பில் இது உருவாக்கப்படுகிறது.
'கிளவுட் ஃபாரஸ்ட்'டில் உள்ள மெய்சிலிர்க்க வைக்கும் நீர்வீழ்ச்சி, சுழலும் நடைபாதைகள், பசுமையான, குளுமையான சூழல் ஆகியவை 'அவதார்' பாணி அனுபவத்திற்கு ஏற்ற இடம் என்று சிட்டி நியான்ஸ் குழுமத்தின் தலைமை நிர்வாகி ரோன் டான் தெரிவித்துள்ளார்.
பண்டோரா உலகில் உள்ள விசித்திர உயிரினங்கள், நீலநிற ஒளிரும் சுற்றுச்சூழல் போன்றவை புதிய உயிரோட்டமான உலகத்தில் நுழைவது போன்ற அனுபவத்தைத் தரும் என்று அவர் குறிப்பிட்டுள்ளார்.
இவ்வாண்டு இறுதியில் உலகம் முழுவதும் திரையிடப்படவிருக்கும் 'அவதார் 2' திரைப்படத்தின் தொடர்ச்சியாக புதிய பண்டோரா உலகின் அனுபவம் சிங்கப்பூரில் கிடைக்கவிருக்கிறது.
மற்றொரு கவர்ச்சித் தளமாக டெம்சியில் புதிய சாக்லெட் தொழிற்சாலை அமைக்கப்படுகிறது. இவ்வாண்டின் நான்காம் காலாண்டில் தயாராகவிருக்கும் தொழிற்சாலையில் பயணிகள் தங்களுக்கு விருப்பமான வடிவத்தில் சாக்லெட் தயாரித்து மகிழலாம்.
உள்ளூர் நிறுவனமான 'மிஸ்டர் பக்கெட்' இந்தத் தொழிற்சாலையில் இனிப்பூட்டும் பல அனுபவங்களையும் வழங்கவிருக்கிறது.
செந்தோசா தீவு மேம்பாட்டு கூட்டு நிறுவனமும் பாலவன் இன்னோவேஷன் ஸ்டூடியோவும் இணைந்து செந்தோசா தீவில் புதிய கேளிக்கை நிகழ்ச்சிக்கு திட்டமிட்டு வருகின்றன. அதாவது கோ-கார்ட்ஸ் கார் பந்தய திடலை அவை உருவாக்கி வருகின்றன. 'ஹைப்பர் டிரைவ்' என அதற்குப் பெயர் வைக்கப்பட்டுள்ளது.
இந்த இடம் தயாராகிவிட்டால் உள்ளூரிலேயே காரை ஓட்டி பந்தயத்தில் ஈடுபடலாம். உற்சாகமளிக்கும் இந்த கோ-கார்ட்ஸ் திடலில் மூன்று அடுக்கு பந்தயப் பாதைகள் அமைக்கப்படுகின்றன.