மாணவர் முரசு
இ-பேப்பர்
'ஹாலிவுட்!' இந்தப் பெயரை அறியாதவர்களே உலகில் இல்லை என்றுகூட சொல்லலாம். ஒருவகையில் திரைத்துறையினர் பலருக்கும் ஏக்கம் விளைவிக்கும் களமும்கூட. அண்மை ஆண்டுகளில் தெற்கு ஆசிய நாடுகளைச் சேர்ந்தோர் இங்கே தடம் பதித்து வருகின்றனர்.
இந்திய நடிகை பிரியங்கா சோப்ரா, பாகிஸ்தானிய நகைச்சுவைக் கலைஞர் குமைல் நஞ்சியானி போன்ற பெயர்கள் இன்று அமெரிக்கர்களிடையே பிரபலம்.
தற்போது அடுத்த தலைமுறை தெற்காசியக் கலைஞர்களும் ஹாலிவுட்டில் ஒளிவீசுவதைக் காணமுடிகிறது.
பிரிட்டனைச் சேர்ந்த சிமோன் ஆஷ்லி, சரித்ரா சந்திரன் இருவரும் 'நெட்ஃபிளிக்ஸ்' வாயிலாக ஒளிபரப்பாகும் ஆங்கில நிகழ்ச்சி மூலம் முத்திரை பதித்துள்ளனர்.
சிமோன் நடித்துள்ள 'த லிட்டில் மெர்மய்ட்' விரைவில் வெளியாகவிருக்கிறது. சரித்ரா அடுத்து 'பில்லோ டாக்' எனும் கேலிச்சித்திர இணையத் தொடரில் நடித்துள்ளார். இருவருமே தமிழ்க் குடும்பங்களின் வழித் தோன்றல்கள்.
கனடாவைச் சேர்ந்த மைத்ரேயி ராமகிருஷ்ணன் 15,000க்கும் மேற்பட்ட விண்ணப்பதாரர்களை வெற்றிகண்டு 'நெவர் ஹேவ் ஐ எவர்' எனும் நகைச்சுவைத் தொடரில் வாய்ப்பு பெற்றார்.
மற்றவர்கள் உச்சரிக்க வசதி என்று கருதி தனது பெயரை மாற்றப் போவதில்லை என்பதில் இவர் உறுதியாக இருக்கிறார்.
அவந்திகா வண்டனாபு ஹாலிவுட் மட்டுமின்றி தெலுங்கு வெள்ளித் திரையிலும் பெயர் பெற்றவர்.
இன்னும் சில நாள்களில் இவர் நடித்துள்ள 'சீனியர் இயர்' எனும் நெட்ஃபிளிக்ஸ் நகைச்சுவைத் தொடர் வெளியாகவிருக்கிறது.
'ஸ்டேஷன் லெவன்' புகழ் ஹிமேஷ் பட்டேல் 11 ஆண்டுகளுக்கு மேல் அனுபவம் உள்ள சிறந்த நடிகர்.
இசை, நாடகத்துக்கான கல்லூரிப் படிப்பைப் பாதியில் விட்டுவிட்டு நடிப்புத் தாகத்துடன் திரையுலகில் நுழைந்து சாதித்துள்ளார் விவேக் கல்ரா.
'லிஃப்ட்' எனும் நெட்ஃபிளிக்ஸ் நகைச்சுவை நாடகத் தொடர் விரைவில் திரைக்கு வரக் காத்திருப்பதாகச் சொல்லப்படுகிறது.
சென்னையில் பிறந்த அஞ்சனா வாசன், நான்கு வயது முதல் சிங்கப்பூரில் வளர்ந்தவர். பத்து ஆண்டுகளுக்கு முன்னர் லண்டனுக்குக் குடிபெயர்ந்தார்.
"எனது இதயம் சிங்கப்பூரில் இருக்கிறது," என்று பெருமையுடன் கூறும் இவர் முதலில் ஸ்பைடர் மேன் உள்ளிட்ட படங்களிலும், தொலைக்காட்சித் தொடர்களிலும் சிறிய வேடங்களில் தோன்றினாலும் அடுத்தடுத்து இவரது திரைப் பயணம் உயரத்துக்கு இட்டுச் செல்வதாகவே அமைந்துள்ளது.
கனடாவைச் சேர்ந்த இமான் வெல்லனி மார்வல் ஸ்டூடியோஸ் தயாரிக்கும் மிஸ் மார்வல் தொலைக்காட்சித் தொடரில் அசாதாரண சக்தி உடைய முதல் முஸ்லிம் கதாபாத்திரம் எனும் பெருமையைப் பெறவிருக்கிறார்.
'ஐஎம்டிபி பேஜ்' எனும் இணையத் திரைப்பட தரவுதளப் பக்கங்கள் இவர்களைப் பற்றிய விரிவான தகவல்களை ரசிகர்களுக்கு வழங்குகின்றன. ஹாலிவுட்டில் திறன்காட்ட முனைந்துள்ள இத்தகையோருக்கு இந்த ஆண்டு மிகச் சிறப்பானதாகவே அமைந்துள்ளதாகக் கருதப்படுகிறது.