மாணவர் முரசு
இ-பேப்பர்
தாம்சன் சாலையில் முற்றிலும் அழிந்து போகக்கூடிய அபாயம் உள்ள அரிய வகை கொக்கை தூக்கியபடி ஒரு மாது சென்றுகொண்டிருந்த காட்சி பதிவான காணொளி சென்ற மாதம் இணையத்தில் அதிகம் பகிரப்பட்டது. அது பலரை ஆச்சரியத்தில் ஆழ்த்தியது.
அந்த மாதின் குடும்பத்தைச் சேர்ந்த ஒருவருடன் 'சிஎன்ஏ' செய்தி நிறுவனம் பேசியது. அந்தக் கொக்கு தனது குடும்பத்தின் செல்லப் பிராணி என்று அவர் தெரிவித்தார்.
முற்றிலும் அழிந்து போகக்கூடிய பல விலங்குகளை வளர்ப்பதற்கு சிங்கப்பூரில் தடை விதிக்கப்பட்டுள்ளது. அத்தகைய சில விலங்குகளை வளர்க்க உரிமம் தேவை.
எனினும், சில அரிய விலங்குகளை வளர்க்க உரிமம் தேவையில்லை. அத்தகைய விலங்குகளை சிங்கப்பூரில் சிலர் வைத்திருக்கின்றனர்.
இவற்றில் சில முற்றிலும் அழிந்துபோகும் அபாயம் உள்ளவை, வேறு சில வீடுகளில் அதிகம் வளர்க்கப்படாதவை.
ஜேடன் லோ எனும் 18 வயது ஆடவருக்குத் தான் வளர்க்கும் அரிய வகை ஆமைகளுடன் ஒரே மேசையில் சேர்ந்து உணவருந்தும் பழக்கம் உள்ளது.
'மலேயன் பாக்ஸ் டர்டல்ஸ்' எனும் முற்றிலும் அழிந்து போகக்கூடிய அபாயம் உள்ள ஆமைகளை திரு லோ வளர்க்கிறார். ஒரு 'மலேயன் பாக்ஸ்' ஆமையை வாங்க பல நூறு வெள்ளி ஆகலாம்.
பொதுவாக எறும்புகளைப் பலர் தொந்தரவாகக் கருதுவர். ஆனால் 23 வயது ஏஞ்சலின் சியூ எனும் பெண் எறும்புகளை வளர்க்கிறார்.
அவர் முதலில் வளர்க்க ஆரம்பித்தது 'குவீன் ஏன்ட்' எனும் ராணி எறும்பு.
'ஜஸ்ட் ஏன்ட்ஸ்', 'ஓடிஎஃப் அக்குவேரியம் ஃபார்ம்', 'தெட் அக்குவேரியம் சாங்கி' ஆகிய கடைகளில் எறும்புகளை வாங்கலாம்.
மற்ற விலங்குகளை வேட்டையாடி உண்ணும் மீன்களை 15 உயர்நிலைப் பள்ளி மாணவரான ஐசேக் கோ வளர்க்கிறார். அவற்றில் ஒன்று 'சவுத் அமெரிக்கன் லங்ஃபிஷ்' எனும் மீன்.
மற்ற மீன்களைப் போல் அல்லாமல் இந்த மீன் தனது நுரையீரல் வழியாக சுவாசிக்கும். ஓர் இளம் 'லங்ஃபிஷ்' மீனின் விலை சுமார் 18 வெள்ளி. பொதுவாக டிசம்பர் மாதம் முதல் அடுத்த ஆண்டு மார்ச் மாதம் வரை இது பிரபலமாக இருக்கும்.