மாணவர் முரசு
இ-பேப்பர்
கடைகளில் பல விதமான இறைச்சிகள் கிடைத்தாலும் பெரும்பாலானோருக்குக் கோழி இறைச்சி என்றால் மிகவும் பிடிக்கும். சிலருக்கோ கோழி இறைச்சி இல்லாமல் ஒரு வேளை உணவுகூட உண்ண முடியாது.
இன்னும் சில காலம் மலேசியாவில் இருந்து கோழி இறைச்சி இறக்குமதி செய்யப்படாது என்பதால் சந்தையில் இதன் விலை ஏறக்கூடும். இது சிலருக்குச் சிரமமாக இருக்கக்கூடும்.
கோழி இறைச்சியைப் புரதச் சத்துக்காகவே விரும்பி உண்பதாகக் கூறுவோரும் உண்டு.
வயதானோர், உடற்கட்டழகர்கள் போன்றோருக்குக் கோழி இறைச்சி விநியோகம் குறைவது மாற்று உணவு குறித்த கவலையைத் தோற்றுவிக்கும். ஆனால் இத்தகையோர் கவலைப்பட வேண்டாம் என்கின்றனர் ஊட்டச் சத்து வல்லுநர்கள்.
கொழுப்பு நீக்கப்பட்ட பன்றி இறைச்சி கோழி இறைச்சியைப் போன்றே அதிகப் புரதமும் குறைவான கொழுப்பும் கொண்டது என்று இவர்கள் கூறுகின்றனர். ஊட்டச் சத்து விகிதமும் இரண்டிலும் சமம் என்று கூறப்பட்டது.
மாட்டு இறைச்சி, வாத்து இறைச்சி போன்றவற்றையும் உண்ணலாம். இவ்விரண்டிலும் கோழி இறைச்சியைக் காட்டிலும் இரும்புச் சத்து அதிகம் என்று வல்லுநர்கள் கூறினர்.
தோலை நீக்கிவிட்டு, கொழுப்பு குறைவான இறைச்சி வகைகளை அளவோடு உண்பதன் மூலம் பலனடையலாம் என்று அவர்கள் ஆலோசனை சொன்னார்கள்.
இவை மட்டுமின்றி மீன் வகைகளிலும் மிகச் சிறந்த புரதச் சத்து காணப்படுவதாகவும் மீன்களை உண்பதன் மூலம் உடலுக்குத் தேவையான புரதச் சத்தை எளிதாகப் பெறமுடியும் என்பதையும் வல்லுநர்கள் சுட்டினர்.
முட்டை, பால், தயிர், பாலாடைக் கட்டி போன்றவையும் அதிகப் புரதச் சத்து கொண்ட உணவுப் பொருள்கள்.
சோயாவிலிருந்து தயாரிக்கப்படும் உணவுப் பொருள்கள், பருப்பு வகைகள் ஆகியவற்றிலும் புரதச் சத்து மிகுந்துள்ளது. உதாரணத்திற்கு கொண்டைக் கடலை, நிலக் கடலை போன்றவை ஆரோக்கியமான முறையில் புரதச் சத்தைப் பெற உதவக்கூடியவை என்று கூறப்பட்டது.
