மாணவர் முரசு
இ-பேப்பர்
விளையாட்டாளர்களும் உடற் பயிற்சி ஆர்வலர்களும் உடலில் உள்ள தசைகளைப் பெருக்கப் பயன்படுத்தும் 'வே' புரதமாவை, மூத்தோர் சிலரும் பயன்படுத்தி வருவதைப் பார்க்கலாம்.
உடல் எடையைக் குறைக்கவும் நீரிழிவு நோயைக் கட்டுக்குள் வைத்திருக்கவும் இந்த 'வே' புரதமாவு உதவும் என்று கூறி சிலர் இதைப் பயன்படுத்தி வருகின்றனர். சிலர், உடலிலிருக்கும் புரதம் குறைவதால் அதை ஈடுகட்ட 'வே' புரதமாவை உட்கொள்கின்றனர்.
'வே' புரதம் என்றால் என்ன?
சீஸ் எனப்படும் பாலாடைக்கட்டியை உற்பத்தி செய்யும்போது 'வே' புரதம் கிடைக்கிறது. இதை உலர்த்தி மாவாகத் தயாரித்து விற்கின்றன நிறுவனங்கள்.
'வே' புரதத்தில் உள்ள நன்மைகள்
'வே' புரதம், சுத்தமான, முழுமையான புரதம் என்று அமெரிக்காவைச் சேர்ந்த கிலீவ்லந்து மருந்தகம் கூறுகிறது. அதில் உடலுக்குத் தேவையான ஒன்பது அமினோ அமிலங்கள் உள்ளன. இந்த அமிலங்கள் தசைகளை உருவாக்குவதுடன், எதிர்ப்பாற்றல் அணுக்களை உருவாக்குவதாக மருந்தகம் தெரிவித்தது. இதனால் காயங்கள் ஆறவும் இந்த 'வே' புரதம் உதவுகிறது.
'வே' புரதம் உயர் ரத்த அழுத்தத்தையும் உடலில் உள்ள சர்க்கரை அளவையும் குறைக்கக்கூடியது என்றும் சில ஆய்வுகள் கூறியுள்ளன.
கவனிக்க வேண்டியவை
உடலுக்குப் போதுமான புரதம் உணவில் கிடைக்கவில்லை என்றால் இதை எடுத்துக்கொள்ளலாம் என்று கிலீவ்லந்து மருந்தகம் குறிப்பிடுகிறது.
உதாரணத்துக்கு, நாள்பட்ட நோயாளிகள் உடலில் உள்ள சத்தை அதிகரிக்க இதை உட்கொள்ளலாம் என்று மருத்துவ ஆய்வுகள் கூறுகின்றன.
'வே' புரதம் சாப்பிடுபவர்களுக்கு மலச்சிக்கல், வயிற்றுப்போக்கு, குமட்டல், உப்பிசம் போன்றவை ஏற்படக்கூடும்.
மேலும், 'வே' புரதமாவு தயாரிப்பில் சர்க்கரை, பதப்படுத்தும் பொருள்கள் போன்றவை சேர்க்கப்பட வாய்ப்புள்ளது. உடலில் அளவுக்கு அதிகமான புரதமும் சேரவும் வாய்ப்புள்ளது.
மருத்துவரின் ஆலோசனையைப் பெற்று 'வே' புரதமாவை எடுத்துக்கொள்வது உகந்தது.