மாணவர் முரசு
இ-பேப்பர்
பலர் தங்களின் உடல் எடையைக் குறைக்க என்ன செய்யலாம், எதை உண்ணலாம் போன்ற தகவல்களைச் சேகரிக்க தீவிர முயற்சியில் இறங்குவதுண்டு. சிலர் அதிகம் செலவு செய்து பல்வேறு உடல் எடை குறைப்பு திட்டங்களிலும் சேர்வதுண்டு.
ஆனால் இந்தியர்களுக்குப் பரிச்சயமான அவலால் தயாராகும் சுவையான உணவு வகைகளை உட்கொண்டு உடல் எடையைக் குறைக்கலாம் என்கிறது 'டைம்ஸ்ஆஃப்இந்தியா' ஊடகத்தில் வெளியான ஒரு செய்தி.
காலையில் அவலால் தயாரான உணவைச் சாப்பிட்டால் அது செரிப்பது சுலபம். அதன் மூலம் உடலின் கொழுப்பைக் கரைக்கும் ஆற்றல் அதிகரிக்கும் எனத் தெரிவிக்கப்பட்டுள்ளது.
அதனால் உடலின் செரிமான முறையும் சீராக இயங்கும் எனக் கூறப்படுகிறது.
அவலில் உடலுக்குத் தேவையான ஊட்டச்சத்து அதிகம் என்றும் உணவு ஊட்டச்சத்து நிபுணர்கள் கூறுகின்றனர்.
மிகவும் சுவையாக இருந்தாலும் அவலில் கலோரிக்கள் குறைவு. இந்த அம்சமும் உடல் எடையைக் குறைக்கக் கைகொடுக்கும்.
நீரிழிவு நோய் உள்ளவர்களுக்கும் இதனால் பலன் இருக்கிறது. ரத்தத்தின் சர்க்கரை அளவைக் குறைவாக வைத்திருக்க அவல் உதவுகிறது. சர்க்கரை நோய் இருப்பவர்கள் மட்டுமன்றி அனைவருக்கும் இது பலனளிக்கும் ஓர் அம்சம்.
மேலும், அவலில் 'வைட்டமின் பி' ஊட்டச்சத்து அதிகம் உள்ளது. அதனால் மூளையைத் துடிப்புடன் இயங்க வைக்கும் ஆற்றல் இதில் இருக்கிறது.
அவலைக் கொண்டு பல்வேறு உணவு வகைகளைத் தயார் செய்யலாம். மேல்காணும் படத்தில் இருப்பதைப் போல் அவல் கொழுக்கட்டை அவற்றில் ஒன்று.
காய்கறிகளுடன் அவலைச் சமைத்து 'வெஜி போஹா' என்ற உணவு வகையையும் தயார் செய்யலாம்.
அதற்குப் பதிலாக பழங்களைச் சேர்த்து 'ஃபுரூட்டி போஹா' என்ற அவல் உணவு வகையையும் தயார் படுத்தலாம்.
'டைம்ஸ்ஆஃப்இந்தியா'வில் வெளியான தகவல்களைக் கொண்டு இந்தக் குறிப்புகள் வழங்கப்பட்டுள்ளன.