மாணவர் முரசு
இ-பேப்பர்
வீட்டில் இருந்தவாறு வேலை செய்வது கடந்த ஈராண்டுகளாக வழக்கநிலையாகிவிட்டது. இருப்பினும் வீட்டில் சொகுசு நாற்காலி, மேசையில் அமர்ந்தாலும் அலுவலகத்தில் வேலை பார்ப்பது போன்ற உணர்வு அதிகமானோருக்கு ஏற்படுவதில்லை.
ஊழியர்கள் சிலர், இதனாலேயே தங்கள் வீட்டு அலுவலகத்தில் ஒரு புதிய வேலைமுறையைக் கையாளத் தொடங்கியுள்ளனர்.
அறையின் நான்கு சுவர்களுக்குள் தாங்கள் வேலை பார்ப்பதை அவருக்கு அறிமுகமே இல்லாதவர்கள், ஒரு மணிநேரம் முதல் மூன்று மணிநேரம்வரை ஸூம் தளம்வழி பார்க்கலாம். அந்நியர் தாங்கள் வேலை செய்வதைப் பார்ப்பதற்கு 39.99 அமெரிக்க டாலர் ($56) தரவும் இக்குறிப்பிட்ட பிரிவினர் தயாராக உள்ளனர்.
இதுபோன்ற சேவையை தொழில்முனைவர்கள், மாணவர்கள், கற்றல் குறைபாடுள்ளவர்கள் போன்றோர் அதிகம் நாடுகின்றனர். தங்கள் வாழ்க்கையில் ஒருவித கட்டொழுங்கைக் கொண்டுவரவும் தங்கள் செயல்பாடுகளுக்குப் பொறுப்பேற்கவும் இந்தத் தளம் உதவுவதாக அவர்கள் நம்புகின்றனர். தனித்து வேலை பார்க்கும் சுதந்திரம், கூடவே ஒருவர் இருப்பதை உணர்தல் என இரண்டையும் தாங்கள் அனுபவிப்பதாக இந்த வேலைமுறையைக் கையாள்வோர் கூறுகின்றனர்.
இதே கண்காணிப்பு முறையைப் பின்பற்றும் மற்றொரு தளமான 'ஃபோகஸ்மேட்', பயனாளர்களுக்கு ஐந்து அமெரிக்க டாலரில் சேவை வழங்குகிறது. வெளிநாட்டில் இருக்கும் ஒருவருடன் ஒன்றுமே பேசாத நிலையில் வேலை பார்ப்பதாக அந்தச் சேவை அமைந்திருக்கும்.
அமர்வு தொடங்கும்போது இருவரும் தாங்கள் அடைய விரும்பும் குறிக்கோளைப் பகிர்ந்துகொள்வர். பின்னர், அவரவர் தத்தம் வேலையில் மௌனமாக ஈடுபடுவர். பின்னர், அமர்வு முடியும்போது தங்கள் இலக்கை அடைந்தார்களா என்று பகிர்வர்.
அலுவலகத்தில் அருகில் இருப்பவர் கேள்வி கேட்டுக்கொண்டும் கூச்சலிட்டுக் கொண்டும் இருக்கும்போது அது தொல்லையாக இருக்கும். ஆனால், இதுபோன்ற அமைதியான துணையைக் கொண்டு நிம்மதியாக வேலை பார்க்க முடிகிறதாம்.
செய்தி: நியூயார்க்டைம்ஸ்