மாணவர் முரசு
இ-பேப்பர்
சிங்கப்பூரில் பார்வைத்திறனை இழந்தோரில்
34 விழுக்காட்டினரிடம் கண் அழுத்த நோய் (குளுக்கோமா) இருந்துள்ளது. சிங்கப்பூர் தேசிய கண் நிலையத்தில் கண்புரை மற்றும் முழுமையான கண் மருத்துவத் துறையைச் சேர்ந்த டாக்டர் ரியுபென் ஃபூ, கண் அழுத்த நோய் ஏற்படுவதைத் தடுப்பதற்கான உத்திகளைப் பகிர்கிறார்.
ஆசியாவில் பார்வைத்திறன் இழக்கப்படுவதற்கான காரணங்களில் கண்புரை நோய்க்கு அடுத்ததாக கண் அழுத்த நோய் உள்ளது.
கண்ணில் பார்வை நரம்பு (ஆப்டிக் நர்வ்) சேதமடைவதால் கண்ணுக்கு அழுத்தம் அதிகரிக்கிறது.
ஆரம்ப நிலையில் எந்த அறிகுறியும் வெளிப்படுத்தாத கண் அழுத்த நோய், 'அமைதியாக பார்வைத்திறனைத் திருடும் நோய்' எனக் கூறப்படுகிறது. இந்நோய் தீவிரமடைந்த பிறகே பார்வைத்திறனுக்குப் பாதிப்பு ஏற்பட்டுள்ளதை நோயாளிகள் பலர் கவனிக்கின்றனர்.
எனினும், தொடக்கத்திலேயே கண்டறிந்து இந்நோயைக் கட்டுக்குள் வைத்திருந்தால் பார்வைத்திறன் இழப்பைத் தடுக்கலாம்.
"கண்ணுக்குள் அழுத்தத்தை அளவிட்டு, கண்ணுக்குப் பின்னால் உள்ள பார்வை நரம்பை முழுமையாக மதிப்பிடுவதன் மூலம் கண் அழுத்த நோய் கண்டறியப்படுகிறது. இந்நோயைக் குணப்படுத்த இயலாது, ஆனால் பெரும்பாலான தருணங்களில் கண் சொட்டு மருந்து, 'லேசர்' சிகிச்சை அல்லது அறுவை சிகிச்சை மூலம் இதைக் கட்டுக்குள் வைத்திருக்கலாம்," என்று டாக்டர் ரியுபென் ஃபூ கூறுகிறார்.
கண் அழுத்த நோயைத் தடுப்பது எப்படி?
1. வழக்கமான கண் பரிசோதனைக்குச் செல்லுங்கள்.
நாம் மூப்படையும்போது நம் கண்களுக்குப் பாதிப்பு ஏற்படும் சாத்தியம் அதிகரிக்கிறது. எனவே, பார்வைத்திறனில் ஏற்படும் மாற்றங்களுக்கு விழிப்புடன் இருந்து, தொடக்கத்திலேயே கண் பிரச்சினைகளைக் கண்டறிவது முக்கியம்.
அந்த வகையில் வழக்கமான, விரிவான கண் பரிசோதனைகளுக்குச் செல்வது அவசியம். உங்கள் குடும்பத்தில் யாருக்காவது கண் அழுத்த நோய் இருந்தால்:
நீங்கள் 35 வயதை எட்டியதும் ஓரிரு ஆண்டுகளுக்கு ஒருமுறை விரிவான கண் பரிசோதனைக்குச் செல்ல வேண்டும்.
உங்கள் குடும்பத்தில் எவருக்கும் கண் அழுத்த நோய் இல்லையென்றால்:
நீங்கள் 40 வயதுக்குக்கீழ் உள்ளவராக இருந்தால் மூன்று, நான்கு ஆண்டுகளுக்கு ஒருமுறை விரிவான கண் பரிசோதனைக்குச் செல்ல வேண்டும்.
நீங்கள் 40 வயதுக்கு மேற்பட்டவராக இருந்தால் ஒன்றரை, இரண்டு ஆண்டுகளுக்கு ஒருமுறை நீங்கள் விரிவான கண் பரிசோதனைக்குச் செல்ல வேண்டும்.
"நீரிழிவு, உயர் ரத்த அழுத்தம் போன்ற நாள்பட்ட பிரச்சினைகள் உடையோருக்கு கண் அழுத்த நோய் ஏற்படும் அபாயமும் நிலவுகிறது," என்று டாக்டர் ஃபூ சொல்கிறார்.
2. நன்றாகப் பார்க்க சத்தான உணவருந்துங்கள்.
உங்கள் அன்றாட உணவில் பச்சை பசேலான காய்கறி, பழங்களைச் சேர்த்துக்கொள்ளவும். உங்கள் உடலையும் கண்களையும் பாதுகாக்கும் வைட்டமின்களும் கனிமங்களும் அவற்றில் உள்ளன. உண்மையைச் சொல்லப் போனால், கண் அழுத்த நோயைத் தடுப்பதில் கேரட், மீன், 'சிட்ரஸ்' பழங்கள் ஆகியவை வைட்டமின்களைவிட சிறந்தவை என ஆய்வுகள் காட்டுகின்றன.
3. அடிக்கடி உடற்பயிற்சி செய்யுங்கள்.
வழக்கமான, மிதமான உடற்பயிற்சி செய்வதால் உங்கள் ஒட்டுமொத்த ஆரோக்கியத்துக்கும் பயன் தரும். கண் அழுத்தத்தைக் குறைப்பதன் மூலம் கண் அழுத்த நோய் ஏற்படுவதைத் தடுக்கலாம். உடற்பயிற்சித் திட்டத்தைத் தொடங்குவது குறித்து உங்களிடம் ஏதேனும் சந்தேகம் இருந்தால் மருத்துவரிடம் சென்று ஆலோசனை பெறவும்.
4. கண்களைப் பாதுகாக்கும் உபகரணங்களை அணியுங்கள்.
கண்களுக்குக் கடுமையான காயம் ஏற்பட்டால் கண் அழுத்தம் உயர்ந்து, கண் அழுத்த நோய்க்கு வித்திடக்கூடும். அதிக அபாய விளையாட்டுகள் அல்லது வேலையில் ஈடுபடும்போது கண் பாதுகாப்பு உபகரணங்களை அணியவும்.
கண் அழுத்த நோயைச் சமாளிப்பது எப்படி?
1. கண் சொட்டு மருந்துகளைச் செலுத்துங்கள்.
கண் சொட்டு மருந்து கண் அழுத்தத்தைக் குறைத்து, பார்வை நரம்புக்கு சேதம் ஏற்படுவதைத் தடுக்கும். கண் சொட்டு மருந்தால் கண் அழுத்த நோயைக் குணப்படுத்தவோ பார்வைத்திறன் இழப்பைச் சரிசெய்யவோ முடியாது. ஆனால், நோய் தீவிரமடைவதை அது தடுக்க உதவும். எனவே, உங்கள் கண் மருத்துவர் அறிவுறுத்தலின்படி வேளைக்கு வேளை கண் சொட்டு மருந்தைச் செலுத்திக்கொள்ளுங்கள்.
2. ஆரோக்கியமாக சாப்பிடுங்கள்
ஆரோக்கியமாக சாப்பிடுவதால் உங்களது சுகாதாரத்தைப் பேண உதவும், ஆனால் கண் அழுத்த நோய் மோசமடைவதைத் தடுக்காது. கண் ஆரோக்கியத்துக்கு முக்கியமான வைட்டமின் மற்றும் ஊட்டச்சத்துகளில் ஸிங்க், காப்பர், செலினியம், வைட்டமின் சி, ஈ, ஏ உள்ளிட்டவை அடங்கும்.
'கெஃபின்' உட்கொள்வதை நீங்கள் குறைத்துக்கொள்ள வேண்டும். ஏனெனில், அளவுக்கு அதிகமாக கெஃபின் உட்கொள்வதால் கண் அழுத்தம் அதிகரிக்கலாம்.
3. ஆரோக்கியமான வாழ்க்கைமுறையைக் கடைப்பிடிக்கவும்.
வாரத்திற்கு சில முறை உடற்பயிற்சி செய்வது பலன் தரும். எனினும், நீங்கள் உடற்பயிற்சி செய்யும் முறை குறித்து மருத்துவரிடம் ஆலோசனை பெறவும். பளு தூக்குதல் போன்ற கடுமையான உடற்பயிற்சிகளைத் தவிர்த்துக்கொள்ளலாம்.
ஏனெனில் இத்தகைய உடற்பயிற்சிகள் கண் அழுத்தத்தை அதிகரிக்கக்கூடும்.
4. உங்களைப் பராமரிக்கும் குழுவுடன் சேர்ந்து பணியாற்றுங்கள்.
கண் பரிசோதனைகளுக்கு வழக்கமாக செல்வதன் மூலம் உங்களைப் பராமரிக்கும் மருத்துவக் குழுவுடன் தொடர்பில் இருங்கள். அப்போதுதான் உங்களது ஆக அண்மைய கண் அழுத்த நோய் நிலவரம் பற்றி மருத்துவர் தெரிந்துகொள்ள முடியும்.
உங்களுக்கு வழங்கப்படும் சிகிச்சை முறையை நிர்வகிக்கும் சிறந்த நிலையில் மருத்துவக் குழு உள்ளது.