மாணவர் முரசு
இ-பேப்பர்
நெட்ஃபிளிக்ஸ் அதன் விளம்பர ஆதரவு பெற்ற புதிய திட்டத்தில் பயனாளர்கள் நிகழ்ச்சிகளையோ திரைப்படங்களையோ பிறகு பார்ப்பதற்கு தங்கள் கையடக்கச் சாதனங்களில் அவற்றைப் பதிவிறக்கம் செய்ய அனுமதிக்காது. அந்நிறுவனத்தின் ஐஃபோன் செயலியில் உள்ள குறியீடு ஒன்றில் இது தெரியவந்துள்ளது.
தற்போது நெட்ஃபிளிக்ஸ் வழங்கி வரும் திட்டங்களில் இருந்து புதிய திட்டம் எவ்வாறு வேறுபடுகிறது என்பதை இந்த நடவடிக்கை காட்டுகிறது.
பல்லாண்டு காலமாக விளம்பரத்தைவிட்டு ஒதுங்கியிருந்த நெட்ஃபிளிக்ஸ், அடுத்த ஆண்டு தொடக்கத்திற்குள் விளம்பர ஆதரவு பெற்ற திட்டத்தை அறிமுகம் செய்ய திட்டமிடுகிறது.
இத்திட்டத்தில் பயனாளர்கள் விளம்பரங்களை ஓடவிட முடியாது என்பதையும் இக்குறியீடு குறிப்பிடுகிறது. எனினும், இதுகுறித்து கருத்துரைக்க நெட்ஃபிளிக்ஸ் மறுத்துவிட்டது.
இச்சேவையின் அறிமுகம் இன்னும் ஒரு சில மாதங்கள் இருப்பதால், நெட்ஃபிளிக்சின் திட்டங்கள் இன்னும் இறுதிப்படுத்தப்படவில்லை என்றும் இது குறித்த அதன் அணுகுமுறை பின்னர் மாறலாம் என்றும் தெரிகிறது.
என்றாலும், நெட்ஃபிளிக்சிடம் உள்ள சிறப்பம்சங்கள், அதன் விளம்பர ஆதரவு பெற்ற திட்டத்தில் கட்டுப்படுத்தப்படும் எனக் கூறப்படுகிறது.
கொவிட்-19 பெருந்தொற்று தொடங்கிய சூழலுடன் ஒப்பிடுகையில், தற்போது நெட்ஃபிளிக்சிடம் வாடிக்கையாளர்கள் குறைந்துள்ளனர். வால்ட் டிஸ்னி, அமேசான்.காம், வார்னர் புரோஸ் டிஸ்கவரியின் எச்பிஓ மேக்ஸ் ஆகிய நிறுவனங்களிடம் இருந்து நெட்ஃபிளிக்ஸ் கடுமையான போட்டியை எதிர்நோக்குகிறது.
அமெரிக்காவிலும் கனடாவிலும் மட்டும் கடந்த காலாண்டில் 1.3 மில்லியன் வாடிக்கையாளர்களை நெட்ஃபிளிக்ஸ் இழந்தது.
டிஸ்னியின் ஹுலு, வார்னர் புரோசின் எச்பிஓ மேக்ஸ், காம்காஸ்ட்டின் பீகாக் போன்றவை வளர்ச்சியை எட்ட ஏற்கெனவே விளம்பர ஆதரவு பெற்ற திட்டங்களைச் சார்ந்துள்ளன. எச்பிஓ மேக்சின் மலிவுக் கட்டண திட்டத்தில் திரைப்படங்களைப் பதிவிறக்கம் செய்வதற்கான தெரிவு கிடையாது.