மாணவர் முரசு
இ-பேப்பர்
இபிஎல் காற்பந்து: 2018ஆம் ஆண்டிற்குப்பின் முதன்முறையாக லிவர்பூலை வீழ்த்திய யுனைடெட்
மான்செஸ்டர்: ஆட்டம் தொடங்குமுன் மான்செஸ்டர் யுனைடெட் காற்பந்துக் குழு உரிமையாளர்களுக்கு எதிராகத் திடலுக்கு வெளியே போராட்டத்தில் ஈடுபட்ட ரசிகர்களை, ஆட்டம் முடிந்தபின் கொண்டாட்டத்தில் மூழ்கும்படி செய்தது லிவர்பூல் குழுவிற்கு எதிராக அக்குழு 2-1 என்ற கோல் கணக்கில் பெற்ற வெற்றி.
இப்பருவத்தில் தான் ஆடிய முதலிரு ஆட்டங்களில் தோற்றுப்போன யுனைடெட் குழுவின் செயல்பாடு, லிவர்பூலுக்கு எதிரான ஆட்டத்தில் பெரிதும் மேம்பட்டிருந்தது.
இங்கிலிஷ் ஆட்டக்காரர்கள் ஜேடன் சாஞ்சோ 16வது நிமிடத்திலும் மார்க்கஸ் ரேஷ்ஃபர்ட் 53வது நிமிடத்திலும் அடித்த கோல்கள் யுனைடெட்டின் வெற்றியை உறுதிசெய்தன.
ஆட்டம் முடிய ஒன்பது நிமிடங்கள் இருந்தபோது லிவர்பூலின் நட்சத்திர வீரர் முகம்மது சாலா அடித்த கோல், யுனைடெட்டின் முன்னிலையைக் குறைக்க முடிந்ததே தவிர, அதனால் வேறு பயனேதும் விளையவில்லை.
யுனைடெட்டின் புதிய நிர்வாகி எரிக் டென் ஹாக்கிற்கு பிரிமியர் லீக்கில் கிட்டிய முதல் வெற்றி இதுதான். அத்துடன், 2018ஆம் ஆண்டிற்குப்பின் லீக் ஆட்டங்களில் லிவர்பூலை யுனைடெட் வீழ்த்தியதும் இதுவே முதன்முறை.
அனுபவ வீரர்களான கிறிஸ்டியானோ ரொனால்டோ, குழுத் தலைவர் ஹேரி மகுவேர் இருவருக்கும் முதல் பதினொருவரில் இடமளிக்கப்படவில்லை. டென் ஹாக்கின் இந்தத் துணிச்சலான முடிவிற்கு அரும்பலன் கிட்டியது.
போட்டிக்குப்பின் பேசிய டென் ஹாக், "இது தொடக்கம்தான். அதே நேரத்தில், எங்கள் ஆட்டக்காரர்கள் தன்னடக்கத்துடன் இருக்க வேண்டும். எங்களால் இன்னும் நிதானமாகவும் அதே நேரத்தில் அபாரமாகவும் விளையாட முடியும்," என்றார்.
கடந்த முறை இரண்டாம் இடத்தில் வந்த லிவர்பூல், இதுவரை மூன்று ஆட்டங்கள் முடிந்துள்ள நிலையில் ஒன்றில்கூட வெல்ல முடியாமல், இரண்டு புள்ளிகளை மட்டுமே பெற்று, இப்பருவத்தை ஆக மோசமாகத் தொடங்கி இருக்கிறது.
நடப்பு வெற்றியாளர் மான்செஸ்டர் சிட்டியைவிட ஐந்து புள்ளிகளும் முதலிடத்தில் இருக்கும் ஆர்சனலைவிட ஏழு புள்ளிகளும் லிவர்பூல் குழு குறைவாகப் பெற்றிருப்பது நிர்வாகி யர்கன் கிளோப்பிற்குக் கவலையளிப்பதாக அமைந்து உள்ளது.
"ஆட்டத்தின் முடிவு மிகுந்த ஏமாற்றமளிக்கிறது. இது மகிழ்ச்சி தரும் நிலைமையன்று என்பது தெளிவாகத் தெரிகிறது," என்றார் கிளோப்.
காயம் காரணமாக பல முன்னணி லிவர்பூல் ஆட்டக்காரர்கள் மான்செஸ்டருக்கு வரவில்லை.
அத்துடன், 75 மில்லியன் பவுண்டு விலைக்கு இப்பருவத்தில் லிவர்பூலுடன் இணைந்த தாக்குதல் ஆட்டக்காரர் டார்வின் நியூனசும் நேற்றைய ஆட்டத்தில் களமிறங்க முடியாமல் போனது. கிரிஸ்டல் பேலசுக்கு எதிரான ஆட்டத்தில் சிவப்பு அட்டை பெற்று, மூன்று ஆட்டங்களில் விளையாட அவருக்குத் தடை விதிக்கப்பட்டதே இதற்குக் காரணம்.
முன்னதாக, பிரென்ட்ஃபர்ட் குழுவிடம் 4-0 எனப் படுமோசமாகத் தோற்றதால் திறமைமிக்க வீரர்களை ஒப்பந்தம் செய்யத் தவறிவிட்டதாகக் கூறி யுனைடெட் ரசிகர்கள் போராட்டத்தில் ஈடுபட்டனர். ஆனாலும், போட்டி தொடங்குமுன் ரியால் மட்ரிட் குழுவிலிருந்து அண்மையில் யுனைடெட்டிற்கு மாறிய பிரேசிலின் கசமீரோ, ரசிகர்கள்முன் அறிமுகம் செய்யப்பட்டார்.
வரும் சனிக்கிழமையன்று யுனைடெட், சௌத்ஹேம்டனையும் லிவர்பூல், போர்ன்மத்தையும் எதிர்த்தாட இருக்கின்றன.