மாணவர் முரசு
இ-பேப்பர்
பிரசன்னா கிருஷ்ணன்
இங்கிலிஷ் பிரிமியர் லீக் காற்பந்து குழுக்கள் புதிய விளையாட்டாளர்களை வாங்குவதற்கான காலக்கெடு சிங்கப்பூர் நேரப்படி நேற்று அதிகாலை சுமார் ஆறு மணிக்கு நிறைவடைந்தது. கடைசி சில நிமிடங்களில்கூட பரிவர்த்தனைகள் இடம்பெறும்.
இந்த இங்கிலிஷ் பிரிமியர் லீக் பருவமும் அவ்வாறே அமைந்தது. கடைசி நேரத்தில் முன்னாள் ஆர்சனல் வீரர் பியே எமெரிக் ஒபமெயாங்கை வாங்கியது செல்சி. நடப்பு வெற்றியாளர் அணியான மான்செஸ்டர் சிட்டி சுவிட்சர்லாந்து தற்காப்பு ஆட்டக்காரர் இமேனுவெல் அக்கான்ஜியை வாங்கியது. தற்காலிக ஒப்பந்தத்தின்கீழ் பிரேசிலிய வீரர் ஆர்த்தர் மெலோ லிவர்பூலில் சேர்ந்தார்.
இவை ஒரே நாளில் இடம்பெற்ற பல பரிவர்த்தனைகளில் ஒருசில மட்டுமே.
மான்செஸ்டர் யுனைடெட்டின் போர்ச்சுகீசிய வீரர் கிறிஸ்டியானோ ரொனால்டோவை வாங்க எந்த அணியும் முன்வராதது ஆச்சரியமே. சவூதி அரேபியாவைச் சேர்ந்த பெயர் வெளியிடப்படாத ஓர் அணி மட்டுமே விதிவிலக்கு.
யுனைடெட்டின் மற்ற விளையாட்டாளர்களுக்கு ரொனால்டோவைப் பிடிக்கவில்லை என்று வெளியான தகவல்கள், அவர் எதிர்பார்க்கும் சம்பளம் போன்ற
காரணங்களால் பல குழுக்கள் விலகியிருக்கலாம்.
நட்சத்திரமாக இருந்தாலும் 37 வயது விளையாட்டாளருக்கு அதிகம் செலவு செய்ய குழுக்கள் தயங்கியிருக்கலாம்.
ரொனால்டோவிற்கு ஏற்றவாறு அணிகள் இயங்கவேண்டும் என்ற ஒருவகை நியதி சுமார் ஓராண்டுக்கு முன்பு வரை இருந்தது. அவரின் இடத்தைப் பிடிப்பது என்பது பல வீரர்கள் நினைத்துப் பார்க்க முடியாத ஒன்று, அப்போது.
இன்றோ வேறு வழியின்றி யுனைடெட்டில் இருக்கும் ரொனால்டோ எல்லா ஆட்டங்களிலும் இடம்பெறுவது உறுதியல்ல. அவருக்குப் போட்டியாக யுனைடெட்டில் ஆன்டனி மார்சியால், மார்க்கஸ் ரேஷ்ஃபர்ட், ஜேடன் சாஞ்சோ, ஆன்டனி இலாங்கா, அதிக தொகைக்குப் புதிதாக வாங்கப்பட்டுள்ள பிரேசிலிய வீரர் ஆன்டனி ஆகியோர் இருக்கின்றனர். இவர்கள் அனைவரும் 26 வயதுக்குக்கீழ் உள்ளவர்கள்.
பின்னுக்குத் தள்ளப்பட்டுள்ளார் ரொனால்டோ. அர்ஜெண்டினா வீரர் லயனல் மெஸ்ஸியின் நிலைமையும் முன்போல் இல்லை. மெஸ்ஸி, ரொனால்டோ கடிவாளத்தைக் காற்பந்து உலகம் அகற்றத் தொடங்கிவிட்டது.
இருவரும் மாபெரும் நட்சத்திரங்கள் என்பதில் சந்தேகம் இல்லை. ஆனால் எல்லா வீரர்களின் சகாப்தமும் நிறைவுக்கு வரும் என்பதற்கு இப்பருவம் ஒரு சான்றாக அமையலாம். எனினும் எந்த முடிவுக்கும் வரவேண்டாம். விமர்சனம் செய்வோரை மண்ணைக் கவ்வ வைக்கும் ஆற்றல் ரொனால்டோவிற்கு உண்டு.
இந்நிலையில், இம்மாதம் 8ஆம் தேதிக்குள் அவர் துருக்கியின் ஃபெனபாச்சே குழுவில் சேரக்
கூடும் என்றும் சில தகவல்கள் வெளியாயின.
துருக்கியில் புதிய விளையாட்டாளர்களை வாங்குவதற்கான காலக்கெடு இம்மாதம் 8ஆம் தேதி நிறைவடைகிறது.
லீக் பருவம் தொடங்கி மூன்று ஆட்டங்கள் கடந்தபோது லிவர்பூல், சிட்டி, செல்சி ஆகிய குழுக்கள் பின்னுக்குத் தள்ளப்படலாம் என்ற கருத்து நிலவியது. இப்போது ஐந்தாவது ஆட்டங்களுக்குப் பிறகு சிட்டி, லிவர்பூல் இரண்டும் நன்கு மீண்டு வந்துள்ளன.
குறிப்பாக, சிட்டி இதர குழுக்களைத் திக்குமுக்காடச் செய்து வருகிறது. அதன் புதிய நட்சத்திரம் எர்லிங் ஹாலண்டைத் தடுக்கத் தெரியாமல் அணிகள் திணறு கின்றன.
செல்சியின் சரிவோ தொடர்கிறது. அதைச் சரிசெய்யத்தான் நேற்று அதிகாலை ஒபமெயாங், டெனிஸ் ஸக்காரிய (தற்காலிக ஒப்பந்தம்) ஆகியோரை வாங்கியது செல்சி.
முன்னைய நட்சத்திரம் டிடியே டிரோக்பாவின் இடத்தை நிரப்ப கிட்டத்தட்ட 10 ஆண்டுகளாக சிரமப்பட்டு வந்துள்ளது செல்சி. 33 வயது ஒபமெயாங்காவது குறையைத் தீர்க்கவேண்டும்.
பருவத்தைப் படுமோசமாகத் தொடங்கிய யுனைடெட் இப்போது சீராக உள்ளது. விறுவிறுப்பாக ஆடாமல் வெற்றிபெறுவதற்குத் தேவையான உத்திகளை அது செயல்படுத்தி வருகிறது.
லீக் பட்டியலில் முதலிடத்தை வகிக்கும் ஆர்சனலுடன் நாளை மோதுகிறது யுனைடெட். அதில் சமநிலையாவாது காணாவிட்டால் மீண்டும் விமர்சனங்களை எதிர்நோக்குவார் அதன் நிர்வாகி எரிக் டென் ஹாக்.
ஆர்சனலை இதுவரை மிகச் சிறப்பாக ஆட வைத்து எதிர்பார்ப்புகளை மிஞ்சியுள்ளார் அதன் நிர்வாகி மிக்கெல் அர்டெட்டா.
இங்கிலாந்து காற்பந்தில் ஜென்ம விரோதிகளான லிவர்பூலும் எவர்ட்டனும் இன்று மோதுகின்றன. இன்றைய மற்றோர் ஆட்டத்தில் முன்னாள் லிவர்பூல் வீரர் ஸ்டீவன் ஜெரார்ட் நிர்வாகியாக இருக்கும் ஆஸ்டன் வில்லா,
சிட்டியைச் சந்திக்கிறது.
லீக் பருவம் தொடங்கி ஒவ்வோர் அணியும் ஐந்து ஆட்டங்களே ஆடியுள்ளன. இப்போது
ஒன்றும் கணிக்கமுடியாது.
எனினும், சரிவை எதிர்கொண்ட குழுக்கள் கவனமாக இருக்கவேண்டும், பிற குழுக்களை ஊதித் தள்ளும் குழுக்கள் மெத்தனமாக இருந்துவிடக்கூடாது.
