மாணவர் முரசு
இ-பேப்பர்
திறன்பேசிகள் மற்றும் 'ஸ்மார்ட் வாட்ச்' எனப்படும் நவீன கைக்கடிகாரங்கள் மற்றும் பிற மின்னிலக்கச் சாதனங்களைப் பயன்படுத்துவதன் மூலம் ஒருவரின் நினைவுத்திறனை மேம்படுத்த முடியும் என அண்மைய ஆய்வு ஒன்று தெரிவிக்கிறது.
மின்னணு சாதனங்கள் மனிதவாழ்வின் ஒரு பகுதியாகிவிட்டன. இனி இதுபோன்ற சாதனங்கள் இல்லாத ஒரு வாழ்க்கையை நினைத்துக்கூடப் பார்க்க முடியாத அளவுக்கு அவற்றின் ஆக்கிரமிப்பு உள்ளது.
இருப்பினும், திறன்பேசிகளால் சாதகமான அம்சங்கள் எந்த அளவுக்கு இருக்கின்றனவோ அந்த அளவுக்குப் பாதகங்களும் இருக்கின்றன.
ஆனால், பயனுள்ள வகையில் பயன்படுத்தினால் தகவல் தொடர்புக்காகவும் இதர பயன்பாட்டுக்காகவும் திறன்பேசிகள் பெரிதும் கைகொடுத்து உதவுகின்றன.
இந்நிலையில் திறன்பேசிகளைப் பயன்படுத்துவது நினைவுத்திறனை அதிகரிக்கும் என வாஷிங்டனின் 'யுனிவர்சிட்டி காலேஜ் ஆஃப் லண்டன்' பல்கலைக்கழக ஆய்வாளர்கள் கண்டறிந்துள்ளனர்.
இந்த ஆய்வின் முடிவுகள் 'ஜர்னல் ஆஃப் எக்ஸ்பெரிமெண்டல் சைகாலஜி' என்னும் சஞ்சிகையில் வெளியிடப்பட்டுள்ளன.
மின்னிலக்கச் சாதனங்கள் மக்களுக்கு மிக முக்கியமான தகவல்
களைச் சேமிக்கவும் நினைவில்கொள்ளவும் உதவுகின்றன.
மிகவும் அவசியமான தேவைகளை சரியான நேரத்தில் அவை நினைவூட்டச் செய்கின்றன.
மேலும், நினைவாற்றல் குறித்து சோதிக்க ஒரு சோதனை நடத்தப்பட்டது. 18 முதல் 71 வயதுக்குட்பட்ட 158 தொண்டூழியர்கள் இந்தச் சோதனைக்குப் பயன்படுத்தப்பட்டனர்.
தொடுதிரை கைக்கணினி அல்லது கணினியில் எண்ணிடப்பட்ட 12 வட்டங்கள் கொடுக்கப்பட்டு அவற்றில் சிலவற்றை இடதுபுறமாகவும் வலதுபுறமாகவும் இழுக்க நினைவில்கொள்ள வேண்டும்.
சரியாகச் செய்பவர்களுக்கு பரிசுத் தொகை வழங்கப்படும் என்று அறிவிக்கப்பட்டது. இதில் பாதியை அவர்கள் நினைவில் வைத்துக்கொள்ள வேண்டும். மீதியை திறன்பேசியில் நினைவூட்டல்களாக சேமித்து வைத்துக்கொள்ளலாம்.
போட்டியின்போது திறன்பேசியில் சேமித்து வைத்திருந்ததைவிடவிட சுயமாக நினைவில் வைத்திருந்ததை அதில் பங்கேற்றவர்கள் மீண்டும் மீண்டும் நினைவுபடுத்திக்கொண்டனர்.
இவ்வாறு திறன்பேசியின் நினை வகத்தையும் சுயநினைவையும் மாற்றி மாற்றிப் பயன்படுத்தும்போது நினைவுத்திறன் அதிகரித்தது கண்டறியப்பட்டதாக ஆய்வாளர்கள் தெரிவித்தனர்.
மேலும், முக்கிய நிகழ்வுகளை திறன்பேசியில் சேமித்து வைத்த பின்னர் அந்தக் தகவல்கள் தொடர்ந்து நினைவூட்டப்படும்போது நாளடைவில் மனதில் ஆழமாகப் பதிந்துவிடுவதும் கண்டறியப்பட்டுள்ளதாக அவர்கள் கூறினர்.