மாணவர் முரசு
இ-பேப்பர்
ஓராண்டில் என்னென்ன சாதிக்க முடியும் என்று ஒருவர் தன் ஆற்றலை அளவுக்கு அதிகமாக மதிப்பிடுகிறார். ஆனால் பத்தாண்டுகளில் தான் சாதிக்கக்கூடியதைக் குறைத்து மதிப்பிடுகிறார். இவை பில் கேட்ஸ் கூறிய சொற்கள்.
குறுகிய காலத்திற்கும் இந்தப் பொன்மொழி பொருந்தும். நாம் ஒரு நாளில் என்னென்ன செய்து முடிக்க முடியும் என்பதை அளவுக்கு அதிகமாக மதிப்பிட்டு, ஓராண்டில் சாதிக்கக்கூடியதைக் குறைத்து மதிப்பிட்டுவிடுகிறோம்.
இருப்பினும், தினமும் செய்ய வேண்டிய பணிகளில் மூழ்கிப் போகாமல் நமது பெரிய இலக்குகளை நோக்கி எவ்வாறு தொடர்ந்து முன்னேறுவது?
இதற்குச் சிலர் பயன்படுத்தும் ஓர் உற்பத்தித்திறன் முறைதான் 'இட் த ஃபிரோக்' (Eat The Frog).
கவலை வேண்டாம். தவளையைச் சாப்பிடுவதாக இது பொருள்படாது. ஒரு குறிப்பிட்ட நாளில் கடினமான ஒரு வேலையைச் செய்ய வேண்டியிருந்தால் அதைக் காலையில் முதல் வேலையாகச் செய்து முடிப்பதையே இது குறிக்கும்.
பிறகு பார்த்துக்கொள்ளலாம் என்று ஒரு வேலையைத் தள்ளிப் போடுபவர்கள், பலவற்றில் கால்வைத்தாலும் முக்கியமானவற்றில் முன்னேற்றம் காணாதோர், உற்பத்தித்திறன்மிக்க ஓர் அமைப்புமுறையைப் பின்பற்றச் சிரமப்படுவோர், செய்ய வேண்டிய வேலைகளைப் பார்த்துத் திணறிப் போவோர் ஆகியோருக்கு இந்த உத்தி உதவும் என்று கூறப்படுகிறது.
'ஒரு தவளையைச் சாப்பிட்டாக வேண்டும் என்றால் அதைக் காலையில் முதல் வேலையாகச் செய்து முடி. இரண்டு தவளைகள் என்றால் முதலில் பெரிதான தவளையை விழுங்கு," என்ற புகழ்பெற்ற எழுத்தாளரான மார்க் டுவெய்ன்னின் அறிவுரையின் அடிப்படையில் உற்பத்தித்திறன் ஆலோசகர் பிரேய்ன் டிரேசி இந்த உத்தியை உருவாக்கி உள்ளார்.
அதனால் மிகக் கடினமான பணியை முதலில் அடையாளம் காணுங்கள். அதை உடனே செய்து முடித்துவிடுங்கள். பின்னர், இதையே வாடிக்கையாக்கிக்கொள்ளுங்கள். அதன் பிறகு, திணறலும் முனகலும் நீங்கிடும்.
படம்: பிக்சபே