மாணவர் முரசு
இ-பேப்பர்
உலகின் ஆக நீளமான பயணிகள் ரயில் சுவிட்சர்லாந்தின் ஆல்ப்ஸ் மலைகளில் கடந்த சனிக்கிழமை அன்று பாம்புபோல வளைந்து சுற்றிச் சென்ற காட்சி உள்ளூர் மக்களையும் சுற்றுப்பயணிகளையும் கவர்ந்திழுத்தது.
கிட்டத்தட்ட இரண்டு கிலோமீட்டர் நீளமுள்ள ரேட்டியன் ரயில்வே அமைப்பின் அந்த ரயிலில் 100 ரயில் பெட்டிகள் இணைக்கப்பட்டுள்ளன.
தனது 175வது ஆண்டு நிறைவைக் கொண்டாடிய சுவிட்சர்லாந்தின் புகழ்பெற்ற ரேட்டியன் ரயில்வே, உலகின் ஆக நீளமான பயணிகள் ரயிலுக்கான புதிய சாதனையைப் படைத்துள்ளதாக அறிவித்தது. செந்நிறத்தில் உள்ள அந்த ரயில் 1,910 மீட்டர் நீளமுள்ளது. அதில் உள்ள 100 ரயில் பெட்டிகளை நான்கு நான்காகத் தனித்தனியே பிரிக்கலாம்.
உலகில் சுமார் மூன்று கிலோமீட்டர் நீளமுள்ள சரக்கு ரயில்கள் ஓடியபோதும், இதுதான் ஆக நீளமான பயணிகள் ரயில் என்று கூறப்பட்டது.
சுவிட்சர்லாந்து உற்பத்தியின் நேர்த்தியை அந்த ரயில் எடுத்துக்காட்டியதாக ரேட்டியன் ரயில்வே அமைப்பின் தலைவர் ரெடாட்டோ ஃபாசியாட்டி கூறினார்.
முன்னதாக பெல்ஜியத்தைச் சேர்ந்த ரயில் ஒன்று உலகின் நீளமான ரயிலுக்கான சாதனையைச் செய்தபோதும் அது அதிகாரபூர்வமாக அங்கீகரிக்கப்படவில்லை என்று ரேட்டியன் ரயில்வே அமைப்பின் பேச்சாளர் கூறினார். அந்த ரயிலைவிட சுவிஸ் ரயிலின் நீளம் பலநூறு மீட்டர் அதிகம்.
கிழக்கு சுவிட்சர்லாந்தில் உள்ள கிராவ்பண்டன் எனும் மலை ஊரில் சனிக்கிழமை அன்று ரயில் பயணித்தது. அதில் மொத்தம் 150 பயணிகள் ஏறிச் சென்றனர்.
யுனெஸ்கோ உலக மரபுடைமைத் தளமான எழில்மிகு அல்புலா/பெர்னினா ரயில் பாதையில் ரயில் பயணம் செய்தது.
ரயிலின் பயணம் நேரடியாக பெரிய திரையில் ஒளிபரப்பப்பட்டது. பரபரப்பாக விற்ற நுழைவுச்சீட்டுகளை சுமார் 3,000 பேர் வாங்கி, ரயில் பயணத்தை திரையில் பார்த்தனர்.