மாணவர் முரசு
இ-பேப்பர்
மற்றவர்கள்அடைந்த வெற்றிக்கு மகிழும் மனம் எல்லாருக்கும் வாய்த்துவிடுவதில்லை.
சொல்லப்போனால் அடுத்தவர் தோல்வி அடைந்தாலோ துன்புற்றாலோ உள்ளூர மகிழும் குணம் கொண்டவர்களும் இருக்கிறார்கள்.
இத்தகையோரை ஆங்கிலத்தில் 'ஷாடன்ஃபிராய்டெ' என்று குறிக்கிறார்கள். ஜெர்மானிய வேர்ச்சொற்களைக்கொண்ட இச்சொல்லின் பொருள், துன்பத்தில் மகிழ்ச்சி அடைதல்.
இதற்கு நேர்மாறான சொல்லாக 'ஃபிராய்டென்ஃபிராய்டெ' என்ற பதத்தைச் சமூக அறிவியலாளர்கள் பயன்படுத்துகிறார்கள்.
வெற்றி பெற்ற ஒருவரின் மகிழ்ச்சியில் நாமும் மகிழ்ச்சி அடைதலை இது குறிக்கிறது.
எடுத்துக்காட்டாக, கார் ஓட்டும் உரிமத்துக்கான தேர்வில் தேர்ச்சி பெற்ற ஒருவர் சக ஊழியரிடம் அத்தகவலைப் பகிர்ந்துகொள்கிறார். அதைக் கேட்டவரோ பல முறை முயன்று தோற்றவர்.
அவரால் இவர் முதல் முயற்சியிலேயே வெற்றிபெற்றதை ஏற்றுக்கொள்ள முடியவில்லை என்றால் அவர் 'ஷாடன்ஃபிராய்டெ' வகையைச் சேர்ந்தவர். ஆனால் தனது மனவருத்தத்தை ஒருபுறம் ஒதுக்கிவிட்டு, "இவரால் வெற்றிபெற முடியுமென்றால் என்னாலும் முடியும்," என்று அதையே உந்துசக்தியாக எடுத்துக்கொண்டு செயல்பட்டாரேயானால் அவர் 'ஃபிராய்டென்ஃபிராய்டெ' வகையைச் சேர்ந்தவர்.
இப்பண்பினால் ஒருவர் மனநிறைவு பெற்றவராகவும் மீள்திறன் மிக்கவராகவும் கருத்து மோதல்கள் நிகழும்போது பிறரது ஒத்துழைப்பைப் பெறுபவராகவும் இருப்பார் எனக் கூறப்படுகிறது.
முத்தாய்ப்பாக மகிழ்ச்சி என்பது எங்கிருந்தோ அல்லது எவரிடமிருந்தோ நாம் பெறுவது அல்ல. நாம்தான் அதை உருவாக்கவேண்டும் என்கின்றனர் ஆய்வாளர்கள்.
அது மிகவும் எளிது. அடுத்து நீங்கள் சந்திக்கும் நண்பரிடம், "இந்த வாரம் உங்களுக்கு நடந்த நல்லதைப் பகிருங்கள்," என்று கேட்டுப் பாருங்கள். அவர் பகிரும்போது மனதார மகிழ்ச்சி அடையுங்கள்.
மகிழ்ச்சி ஏணியில் நீங்கள் உயர்வதைத் தடுக்க யாராலும் முடியாது என்கின்றனர் வல்லுநர்கள்.