மாணவர் முரசு
இ-பேப்பர்
மரினா பேயில் இவ்வாண்டு மீண்டும் வழக்கமான கொண்டாட்டங்கள் இடம்பெறவுள்ளன. குடியிருப்பு வட்டாரங்களிலும் பல்வேறு நிகழ்ச்சிகளை எதிர்பார்க்கலாம். சிங்கப்பூர் முழுவதும் நடைபெறவுள்ள புத்தாண்டுக் கொண்டாட்டங்களைத் தெரிந்துகொள்ளலாம்.
'அவர் தெம்பனிஸ் ஹப்'
'அவர் தெம்பனிஸ் ஹப்' மையத்தில் 'கவுன்ட்டௌன் டு மேஜிக்கல் மோமன்ட்ஸ்' எனும் நிகழ்ச்சி, சர்க்கஸ் வட்டரங்கு கேளிக்கை நிகழ்ச்சியை இவ்வாண்டு கருப்பொருளாகக் கொண்டு நடத்தப்படும். நடனம், மத்தளம், செப்பிடு வித்தைகள், தீச்சுழல் பயிற்சிகள் எனப் பல்வேறு அங்கங்களை எதிர்பார்க்கலாம். வாணவேடிக்கையும் உண்டு.
'ஒன் பொங்கோல் கவுன்ட்டௌன்'
'ஒன் பொங்கோல்' ஒருங்கிணைந்த மையத்தில் இசை, பாடல்களுடன், குடும்பங்களுக்கு உகந்த நிகழ்ச்சிகள் நடைபெற உள்ளன.
குழந்தைகள் குதிப்பதற்கு காற்று மாளிகைகள், முகத்துக்கு வண்ணம் பூசும் கூடாரங்கள், தொடர் திரைப்பட காட்சிகள், இலவச சிற்றுண்டி போன்ற பல அம்சங்கள் இடம்பெறவுள்ளன. வாணவேடிக்கைகளும் இடம்பெறும்.
மரினா பே வட்டாரம்
மரினா பேயில் புத்தாண்டுக் கொண்டாட்டங்கள் இவ்வாண்டு களை கட்ட உள்ளன.
அவற்றில் ஒன்று 'தி ஸ்டார் ஐலண்ட்' புத்தாண்டுக் கொண்டாட்டம். ஜப்பானிய பாணியில் கலை நயத்துடன் வடிவமைப்பில் வாணவேடிக்கைகள் இதில் இடம்பெறஉள்ளன. பல்வேறு இசை, நடனம், தொழில்நுட்பக் காட்சிகள் போன்றவை இதில் இடம்பெறும்.
அடுத்த ஆண்டு வேறு வடிவம் பெறவிருக்கும் மிதக்கும் மேடையில் இதுவே கடைசி புத்தாண்டுக் கொண்டாட்ட இசைநிகழ்ச்சியாக அமையும்.
மிதக்கும் மேடையிலிருந்து சிறிது தூரத்திலிருந்து, மீடியகார்ப் நடத்தும் இசைநிகழ்ச்சி நடைபெறும். உள்ளூர், தென்கிழக்காசியப் பிரபலங்கள் இதில் கலந்துகொள்கின்றனர். இரு நிகழ்ச்சிகளுக்கும் கட்டணம் உண்டு.
'ஃபுல்லர்டன்' ஹோட்டலும் மெர் லயன் சிலையும் வண்ணங்களில் ஒளிரும் அழகை இன்றே ரசிக்கலாம்.
'ஷேர் தி மோமன்ட்' எனும் நிகழ்ச்சியில் மாணவர்களின் ஓவியங்கள் ஒளிச் சித்திரங்களாக மாற்றப்பட்டு கட்டட முகப்புகளில் இடம்பெற்று வருகின்றன.
தேசிய தொண்டூழிய, கொடை நிலையத்துடன் இணைந்து ஒளிக்கோவைக்கு ஏற்பாடு செய்யப்பட்டுள்ளது.
வரும் 30ஆம் தேதி வரை இரவு மணி 8 மணி முதல் 10.30 மணி வரை ஒளிக்காட்சி இடம்பெறும். 31ஆம் தேதி இரவு 8 மணி முதல் 11.45 வரை அது இடம்பெறும்.
புதிய ஆண்டை புத்துணர்ச்சியுடனும் மகிழ்ச்சியுடனும் வரவேற்பது பலருக்கும் விருப்பமானது. இசை, நடனம், வாணவேடிக்கை என ஆரவாரமாக புத்தாண்டை வரவேற்க சிங்கப்பூரர்கள் காத்திருக்கின்றனர்.