மாணவர் முரசு
இ-பேப்பர்
'வாட்ஸ்அப்' செயலியில் ஒரே நேரத்தில் 100 'மீடியா ஃபைல்' எனப்படும் கோப்புகளை மற்றவர்க்கு அனுப்பும் புதிய அம்சத்தை மெட்டா நிறுவனம் உருவாக்கியுள்ளது.
தற்போது ஒரு நேரத்தில் இத்தகைய 30 கோப்புகளை மட்டுமே அனுப்ப முடியும்.
முதற்கட்டமாகத் தேர்வு செய்யப்பட்ட சிலருக்கு மட்டும் சோதனை அடிப்படையில் இது வழங்கப்பட்டு உள்ளது.
மற்றவர்கள் இந்த வசதியைப் பெற சிறிது காலம் காத்திருக்க வேண்டும்.
எப்போது இந்த வசதி அனைவருக்கும் வழங்கப்படும் என்பது குறித்த தெளிவான தகவல் இல்லை.
தகவல் பரிமாற்றத்தை மேம்படுத்தும் மேலும் சில அம்சங்களும் அறிவிக்கப்பட்டுள்ளன.
'வாய்ஸ் ஸ்டேட்டஸ்' எனும் அம்சம், பயனர்கள் கிட்டத்தட்ட 30 நொடி வரையிலான ஒலிப்பதிவு ஒன்றை தங்கள் 'ஸ்டேட்டஸ்' ஆக வைத்துக் கொள்ள வழிவகுக்கும்.
பயனர்கள் தங்கள் குரலைப் பதிவு செய்தும் பயன்படுத்தலாம்.
அதை விருப்பப்பட்டவர்களுக்கு மட்டும் பகிரும் சிறப்பு வசதியும் வழங்கப்படும்.
இந்தக் குரல் பதிவு 24 மணி நேரத்துக்குப் பிறகு தானாகவே மறையும்படி அமைக்க இயலும்.
'ஸ்டேட்டஸ் ரியாக்ஷன்ஸ்' அம்சம் மூலம் மற்றவர் வெளியிடும் 'ஸ்டேட்டசிற்கு' அதிகபட்சம் எட்டு 'இமோஜி' எனப்படும் உணர்வை வெளிப்படுத்தும் குறியீடுகளைப் பயன்படுத்தி ஒருவர் கருத்துரைக்கலாம்.
'ஸ்டேட்டஸ் ப்ரோஃபைல் ரிங்ஸ்' என்பது மற்றோர் அம்சம். நம் தொடர்புப் பட்டியலில் உள்ள ஒருவர் 'ஸ்டேட்டஸ்' அம்சத்தைப் பயன்படுத்தினால், அவரது படத்தைச் சுற்றி வளையம் ஒன்றைக் காட்டும். இதைக்கொண்டு அவரது 'ஸ்டேட்டஸ்' என்ன என்று அடுத்தடுத்துப் பார்க்க விரும்புவோர் அவ்வாறு எளிதாகச் செய்யலாம்.
புதிய அம்சங்கள் அடுத்த சில வாரங்களில் அனைத்துலக அளவில் அனைவருக்கும் கிடைக்கக்கூடும் என்று எதிர்பார்க்கப்படுகிறது.
தகவல், படம்: இணையம்