மாணவர் முரசு
இ-பேப்பர்
வரும் 14ஆம் தேதி அன்பர் தினத்தில் தங்கள் அன்புக்குரியவர்கள், நண்பர்கள், இணையர்கள் ஆகியோர் எவ்வாறு அன்பை வெளிப்படுத்துவர் என்று பலர் எதிர்பார்த்துக் காத்திருக்கலாம். அதேநேரம் அன்பர்களுக்கானப் பரிசுப் பொருள்களைத் தேர்ந்தெடுப்பது சிலருக்குச் சவாலாக இருக்கக்கூடும்.
ஒவ்வோர் ஆண்டும் மலர் கொத்துக்கள், சாக்லேட், கரடிபொம்மை, வாசனை திரவியங்கள், மெழுகுவத்தி என அன்பளிப்புகள் தந்து சலித்துப் போனவர்களுக்குச் சில பரிந்துரைகள் உள்ளன.
தொழில்நுட்பப் பொருள்கள்
தங்கள் அன்பர் அதிகம் கணினியில் நேரம் செலவிடுபவராக இருந்தால், அவருக்கு விசைப் பலகை, கணினி 'மவுஸ்', மடிக்கணினியைப் பொறுத்திவைக்கும் நிறுத்தி, 'ஹெட்ஃபோன்ஸ்' எனப்படும் காதொலிப்பான்கள் போன்றவற்றை வழங்கலாம்.
அதனுடன் இணையர்கள் தங்களது தொழில்நுட்ப பொருட்களை ஒரே நிறத்தில் அல்லது ஒரே வடிவத்தில் வேறு வண்ணங்களில் வாங்கிக்கொள்ளலாம்.
தொழில்நுட்பச் சாதனங்களைப் பாதுகாக்கும் உறைகளை அன்பர்களுக்குப் பிடித்த வண்ணங்களிலும் வடிவங்களிலும் வாங்கித் தரலாம். தங்களின் தனிப் பயனுக்காக பிரத்தியோகமாக மாற்றப்பட்ட உறைகளையும் முன்கூட்டியே கடைகளில் செய்யச்சொல்லி வாங்கித் தரலாம். இதுபோன்ற சேவைகள் பல இடங்களில் உடனுக்குடன் வழங்கப்படும்.
புகைப்படங்கள்
புகைப்படங்களைக் கொண்டு பல மாறுபட்ட பரிசுப்பொருள்களை வழங்கமுடியும். ஒருவர் தமது அன்புக்குரியவருடன் எடுக்கும் புகைப்படங்களை இணைத்து இதய வடிவத்தில் பொருத்தி அதனைப் புகைப்படச் சட்டத்தில் பாதுகாத்து அன்பளிப்பாகக் கொடுக்கலாம்.
அல்லது கழுத்துச் சங்கிலியில் அணியும் பதக்கத்தில் புகைப்படத்தைப் பதிக்கலாம். இனிய நினைவுகளை நினைவூட்டும் வண்ணம் இந்த அன்பளிப்பு அமையும்.
புகைப்படங்கள் கொண்டு வரையப்பட்ட ஓவியங்கள், உலோகத் தட்டுகளில் பொறிக்கப்பட்ட புகைப்படங்கள், மரப்பலகை, மெழுகுவத்தி, சவர்க்காரம் போன்றவற்றில் செதுக்கிய புகைப்படங்கள் போன்றவற்றையும் அன்பளிப்பாக வழங்கலாம்.
தனிப்பட்டவர்களின் படங்களுடன் இவற்றைத் தயாரித்துத் தரும் சேவைகள் உள்ளன. நாமே நம் கையால் தயாரித்துக் கொடுக்கும்போது அதற்கு மதிப்பே தனி.
நேரம் செலவிடுவது
ஒரு பொருளில் அன்பு அடங்கிவிடுமா என்று நினைப்பவர்கள், வார இறுதி நாட்களில் வெளிநாட்டுப் பயணங்களைத் திட்டமிட்டு அழைத்துச்செல்வது மகிழ்ச்சி அளிக்கும் அன்பளிப்பாக அமையும்.
வெளிநாடு செல்ல இயலாதவர்கள் 'ஸ்டேகேஷன்' எனப்படும் உள்ளூரில் விடுமுறைக்கு அல்லது சுற்றுலாத் தலங்களுக்குச் சென்று நேரம் செலவிடலாம்.
ஒன்றாக நேரத்தைக் கழிக்க நினைப்போர் நகப் பராமரிப்பு, முகப் பராமரிப்பு, உடற்பிடிப்பு போன்ற சேவைகளைப் பெற ஒன்றாக செல்லலாம்.
தனிப்பயனுக்கான பொருள்கள்
கடைத்தொகுதிகளில் விற்கப்படும் பொருள்களை வாங்கிக் கொடுக்கவோ பெறவோ விரும்பாதவர்கள் தங்களுக்காக மட்டும் வடிவமைக்கப்பட்ட சிறப்பு அன்பளிப்பு களைப் பரிசீலிக்கலாம்.
அணிகலன்கள், வாசனைத் திரவியங்கள், உணவுப்பொருள்கள், மெழுகுவத்தி, புத்தகங்கள் என்று பலவற்றை நுணுக்கமாக வடிவமைத்துத் தருவது ஒருவர் நேரம் ஒதுக்கி மெனக்கெட்டு அன்பளிப்பைத் தேர்ந்தெடுத்ததைக் காட்டும்.
கண்மணி, அன்போடு
பொருள்களை அன்பளிப்பாக கொடுக்க விரும்பாதவர்கள் தாங்களே வாழ்த்து மடல்கள், கடிதங்கள் போன்றவற்றை எழுதி அல்லது செய்துதரலாம்.
ஒரு பொருளைவிட அன்பு நிறைந்த சொல்லைப் பரிசளிக்க விரும்புவோரும் அன்பளிப்புகளை வாங்க நேரம் ஒதுக்க இயலாதவர்களுக்கும் இதுபோன்ற எளிய ஆனால் ஆழமுள்ள அன்பளிப்புகளை பரிமாறிக்கொள்ளலாம்.
- பொன்மணி உதயகுமார்