மாணவர் முரசு
இ-பேப்பர்
பொன்மணி உதயகுமார்
ஒப்பனையுடன் சேர்ந்து தோல் பராமரிப்பின் முக்கியத்துவத்தை இன்று அனைத்து வயதினரும் அறிந்துள்ளனர். பொதுவாக, முகப்பருக்களைப் போக்குவது, நிறமிகளை, அதாவது தோலில் நிறத்திட்டுகளைத் தவிர்ப்பது, ஈரப்பதத்தைப் பாதுகாப்பது போன்ற பல காரணங்களுக்காக தோல் பராமரிப்பில் பலர் ஆர்வம் காட்டுவதுண்டு.
உலகளவில் ஏறத்தாழ $135 பில்லியன் அமெரிக்க டாலர் மதிப்புள்ள தோல் பராமரிப்புத் துறையில் கோலோச்சும் பல்வேறு நாடுகளின் நிறுவனங்களும் போட்டிப் போட்டுக்கொண்டு வாடிக்கையாளர்களைக் கவர புதுப்புது தோல் பராமரிப்பு முறைகளை அறிமுகம் செய்துவருகின்றன.
அவ்வாறு வாடிக்கையாளர் களைக் கவர்ந்துள்ள தோல் பராமரிப்புப் பொருள்களில் 'ஸ்னெயில் மியூசின்' (snail mucin) எனும் நத்தைச் சளியைக் கொண்டு தயாரிக்கப்படும் முகத்திரவம் மிகவும் பிரபலம்.
நடைபாதையில் நத்தையைக் காணும்போது சிலர் ஒதுங்கிப் போகவோ அதை அகற்றவோ முற்படுவதுண்டு. சிலர் நத்தையை அருவருப்புடன் பார்ப்பார்கள்.
ஆனால் நத்தையில் சுரக்கும் சளியைப் பதப்படுத்தி செய்யப்படும் முகத் திரவம் அன்றுமுதல் இன்றுவரை பயன்படுத்தப்பட்டு வருகிறது. நத்தைச் சளி முற்காலத்தில் கிரேக்கத்திலும் பிறகு இத்தாலி போன்ற நாடுகளிலும் பயன்படுத்தப்பட்டதாகத் தகவல்கள் கூறுகின்றன.
கடந்த பத்து, இருபது ஆண்டுகளாக அழகுப் பராமரிப்புத் துறையில் ஆதிக்கம் செலுத்தி வரும் கொரிய நிறுவனங்கள் நத்தைச் சளியைக் கொண்டுதோல் பராமரிப்புத் திரவத்தைப் பெருமளவில் தயாரித்துப் பிரபலமாக்கின.
சிங்கப்பூரைச் சேர்ந்த தோல் மருத்துவர் கோமதி ராஜரத்தினம் நத்தை சளியிலிருந்து பிரித்தெடுக்கப்படும் திரவத்தின் தயாரிப்பு ஐந்திலிருந்து ஆறு ஆண்டுகளுக்கு முன்பே தொடங்கிவிட்டது என்றார். தமது மருந்தகத்தில் முன்பு பயன்படுத்தப்பட்ட இந்தத் திரவம் மீண்டும் பிரபலமடைந்திருப்பது ஆச்சரியம் அளிப்பதாக அவர் கூறினார்.
ஈராண்டுகளாக இந்தத் திரவத்தை பயன்படுத்திவரும் 21 வயது அர்ச்சனா, தமது கன்னத்தில் முகப்பருவால் ஏற்பட்ட தழும்புகளைக் குறைக்க இதைப் பயன்படுத்த தொடங்கினார்.
இணையத்தில் தீர்வு தேடியபோது சமூக ஊடகப் பிரபலங்கள் பலர் கொரியாவில் தயாரிக்கப்படும் தோல் பராமரிப்புப் பொருள்களை பரிந்துரை செய்துள்ளனர்.
குறிப்பாக 'ஸ்னெயில் மியூசின்' நத்தைச் சளித் திரவத்தை பயன்படுத்தலாம் என்ற பலரது பரிந்துரைகளைப் பார்த்தார் அர்ச்சனா.
'ஸ்னெயில் மியூசின்' நத்தைச் சளித் திரவம், முகத்தோல் உலர்ந்துபோகாமல் பாதுகாத்து, தோலில் உள்ள மாசுகளை அகற்றி, முகம் மூப்படைந்த தோற்றம் பெறுவதைக் குறைப் பதாகக் கூறப்படுகிறது. காயங்களை ஆற்றி தழும்புகளைக் குறைப்பதிலும் அது பங்காற்றுவதாகவும் சொல்லப்படுகிறது.
நத்தைச் சளியில் உள்ள புரதங்கள், நொதிகள், கிளைக்கோலிக் அமிலம் போன்றவற்றால் அப்பயன்கள் ஏற்படுவதாக நிபுணர்களும் கூறுகின்றனர்.
திரவம் கட்டுப்படியான விலையில் கிடைத்ததால் அர்ச்சனா மற்ற சில பராமரிப்புப் பொருள் களுடன் அதைப் பயன்படுத்த தொடங்கினார். முன்பைக் காட்டிலும் தற்போது முகத்தில் பருக்கள் குறைந்து பளபளப்பு கூடிய இருப்பதாக அவர் கூறினார்.
முகப்பருக்களுக்காக மட்டுமல்லாமல், தோலை ஈரப்பதத்துடன் வைத்திருப்பதற்காக 19 வயது லோகேஷ் இந்தத் திரவத்தைக் கடந்த ஆண்டிலிருந்து பயன்படுத்தி வருகிறார்.
தமது உறவினர் பரிந்துரைத்ததால் இதைப் பயன்படுத்தத் தொடங்கிய இவர், தற்போது தமது தோலில் எண்ணெய் பிசுபிசுப்புத் தன்மை குறைந்துள்ளதாக கூறினார்.
ஆனால் அனைத்து பொருட்களும் அனைவருக்கும் பொருந்தும் என்று சொல்லமுடியாது.
ஒவ்வொருவரின் தோலின் தன்மையைப் பொறுத்து முகத் திரவங்களையும் பசைகளையும் தேர்ந்தெடுக்க வேண்டும் என்றார் திருமதி ரேகா, 43.
தாம் பணிபுரியும் நிறுவனத்தில் அனைவரும் 'ஸ்னெயில் மியூசின்' பயன்படுத்துவதைப் பார்த்து இவரும் இதைப் பயன் படுத்த முனைந்துள்ளார். ஆனால் அதன்பிறகு இவரது தோலில் தடிப்புகள் தென்படத் தொடங்கிவிட்டன.
'ஸ்னெயில் மியூசின்' பயன்பாட்டில் எந்தத் தீங்கும் இல்லை என்றார் டாக்டர் கோமதி. எனினும் எந்தத் தோல் பராமரிப்புப் பொருளையும் பயன்படுத்தும் முன்பு அது தங்கள் தோலுக்கு உகந்ததா என்று சோதிப்பது மிகவும் அவசியம் என்று அவர் எச்சரித்தார்.
எந்தப் புதிய திரவத்தை அல்லது பசையைப் பயன்படுத்தும் முன்னர், 20 காசு நாணயம் அளவிற்கு அதை தோலின் ஒரு சிறிய பகுதியில் சில நாள்களுக்குத் தொடர்ந்து தடவிப் பார்க்கவேண்டும் என்று டாக்டர் கோமதி கூறினார். அப்பகுதியில் எந்தவிதமான பாதிப்பும் ஏற்படவில்லை என்று உறுதிசெய்த பிறகே முகம் முழுவதும் அதைப் பூசலாம் என்று கூறினார் அவர்.
குறிப்பாக அதிகம் முகப்பருக்கள் வரக்கூடியவர்கள் நத்தைச் சளித் திரவத்தை பயன்படுத்தும் முன்னர் கண்டிப்பாகச் சோதித்துப் பார்க்க வேண்டும் என்று டாக்டர் கோமதி தெரிவித்தார்.
ஈரப்பதத்தைக் காக்கக்கூடிய இத்திரவம் தோலில் உள்ள துளைகளை அடைத்துவிட வாய்ப்புகள் உண்டு என்பதே அதற்குக் காரணம் என்றார் அவர்.
'ஸ்னெயில் மியூசின்' பயன் படுத்துவதற்கு முன் அது எங்கு தயாரிக்கபடுகிறது, எந்த நிறுவனம் தயாரிக்கிறது, என்னென்ன பொருள்கள் சேர்க்கப்பட்டுள்ளது என்பதையும் கவனத்தில் கொள்ள வேண்டும் என்பதும் டாக்டர் கோமதியின் அறிவுரை ஆகும்.
'ஸ்னெயில் மியூசின்' சிகிச்சைகளுக்குப் பின்பு தோல் குணமடைவதற்காக பயன்படுத்தபட்டது என்ற டாக்டர் கோமதி, அதைவிட சிறந்த பொருள்கள் தற்போது உற்பத்தி செய்யப்பட்டு வருவதால் அதைத் தமது மருந்தகத்தில் பயன்படுத்துவதை நிறுத்திவிட்டதாக சொன்னார்.
'ஸ்னெயில் மியூசின்' பயன்பாட்டைத் தவிர, பொதுவாக 'ரெட்டினோல்' எனப்படும் வைட்டமின் 'ஏ' திரவம் அல்லது வைட்டமின் 'சி' திரவம் தோலில் ஏற்படும் சுருக்கங்களை தவிர்க்கும் என்றார்.
ஈரப்பதத்தைக் காக்க 'ஹையலூரோனிக்' அமிலம் 'நையசினமைட்' அமிலம் ஆகியவை அல்லது உலர்ந்த சருமத்திற்கு பிசுபிசுப்பு அதிகம் உள்ள அடர்த்தியான பசை (heavy cream) போன்றவற்றை பயன்படுத்தலாம் என்றும் டாக்டர் கோமதி ஆலோசனை வழங்கினார்.
அதோடு நிறமிகளைத் தவிர்க்க சூரிய கதிரிலிருந்து காத்துக்கொள்ள பயன்படுத்தும் 'சன் பிளாக்'கை பயன்படுத்துவது முக்கியம் என்று அவர் வலியுறுத்தினார்.