மாணவர் முரசு
இ-பேப்பர்
விளையாட்டுக் காலணிகளுக்கான சிறப்புக் கண்காட்சியான 'ஸ்னீக்கர்டோப்பியா', சிங்கப்பூர் வந்துள்ளது. பல அரிய வகை விளையாட்டுக் காலணிகளையும் கலைப் படைப்புகளையும் கண்காட்சியில் கண்குளிரப் பார்த்து மகிழலாம்.
அமெரிக்காவின் லாஸ் ஏஞ்சலிஸ் நகரில் தொடங்கப்பட்ட புகழ்பெற்ற 'ஸ்னீக்கர்டோப்பியா' விளையாட்டுக் காலணிகள் கண்காட்சி நாளை முதல் ஜூலை 30ஆம் தேதி வரை சிங்கப்பூரின் கலை அறிவியல் அரும் பொருளகத்தில் நடைபெற உள்ளது. ஆசியாவில் இந்தக் கண்காட்சி நடைபெறுவது இதுவே முதன்முறையாகும்.
இதில் 100க்கும் மேற்பட்ட அரிய, குறிப்பிட்ட காலத்துக்கு மட்டும் விற்கப்பட்ட விளையாட்டுக் காலணிகள் காட்சிக்கு வைக்கப்படும்.
அக்காலணிகள் பிரதி பலிக்கும் துணைக் கலாச்சாரங்கள், அவற்றுடன் தொடர்புடைய, ஹிப் ஹாப் வகை இசை, ஆடை அணிகலன்கள் போன்றவற்றையும் கண்காட்சி ஆராயும். ஆடை அலங்காரம் முதல் வீதிச் சித்திரங்கள் வரையிலான பல்வேறு அம்சங்களை எடுத்துரைக்கும் வகையில் 60க்கும் மேற்பட்ட கலைப் படைப்புகள் கண்காட்சிக்காக உருவாக்கப்பட்டுள்ளன.
அனைத்துலக, உள்நாட்டுக் கலைஞர்கள் இவற்றை உருவாக்கியுள்ளனர். அவர்களில் 16 சிங்கப்பூர் கலைஞர்கள் சிங்கப்பூரின் தனித்துவமான பார்வையை முன்வைப்பர் என்று ஏற்பட்டாளர்கள் கூறினர்.
'ஸ்னீக்கர்டோப்பியா' கண்காட்சியை உருவாக்கியவர்களில் ஒருவரான அமெரிக்கர் ஸ்டீவ் ஹேரிஸ், உலகளவில் பலரை இணைக்கும் ஒற்றைப் பொருள் என்று விளையாட்டுக் காலணிகளை வருணித்தார்.
விளையாட்டுக் காலணி களைக் கொண்டாடும் கலாசாரம் அமெரிக்காவில் தொடங்கியபோதும் சிங்கப்பூரில் அது பிரபலமாகி வருவதை ஏற்பாட்டாளர் ராஸ் லியோ சுட்டினார். அரிய விளையாட்டுக் காலணிகள் இன்று முதலீடுகளாகப் பார்க்கப்பட்டாலும் அவை கலை, கற்பனை ஆற்றலின் வெளிப்பாடாகவே முதன்முதலில் பார்க்கப்பட்டதை அவர் நினைவுகூர்ந்தார்.
மாயத் தோற்றத்தை உருவாக்கும் சிற்பம், பெண்கள் உருவாக்கிய கலைப்படைப்புகள், விளையாட்டுக் காலணிகளின் தோற்றம், அவற்றின் பயன்பாடு, அவற்றைப் பிரபலமாக்கிய கூடைப்பந்து விளையாட்டு போன்றவற்றை எடுத்துரைக்கும் பகுதியும் கண்காட்சியில் அமைக்கப்பட்டுள்ளது.
விளையாட்டுக் காலணி உற்பத்தியில் நீடித்த நிலைத் தன்மை புகுந்துள்ளதற்கு அடையாளமாக மறுசுழற்சி செய்யப்பட்ட அட்டைகளில் பெரிய விளையாட்டுக் காலணிச் சிற்பத்தை பிரெஞ்சு கனேடி கலைஞர் அலீஸ் ஸ்மொலுக் அமைத்துள்ளார்.