மாணவர் முரசு
இ-பேப்பர்
கொவிட்-19 கட்டுப்பாடுகள் தளர்த்தப்பட்ட நிலையில் மீண்டுவரும் நாடகத்துறை
தமிழ், மலாய், மாண்டரின் மொழிகளில் கடந்த ஆண்டு அரங்கேறிய நாடகங்கள் பல, மக்களுக்கிடையே பலத்த வரவேற்பைப் பெற்றன. குடும்பக் கதை, பழங்கதையின் தழுவல், சமுதாயச் சீர்த்திருத்தம் எனப் பலவிதமான நாடகங்களைக் காண அரங்கம் நிறைந்திருந்ததோடு வந்திருந்தோரும் பலதரப்பட்டவர்களாக இருந்தனர்.
'அகம் தியேட்டர் லேப்' நிறுவனத்தின் 'விலங்குப்பண்ணை' நாடகத்தைக் காண மொத்தம் 800 பேர் கடந்த ஆண்டு திரண்டனர். 2019ஆம் ஆண்டில் தொடங்கப்பட்ட இந்நிறுவனத்திற்கு, இது பெரும் சாதனை.
வேற்றின இளையர்கள் குறிப்பாக நாடகங்களைக் காண வருகை தந்து, தங்களுக்குப் புரியாத மொழியாக இருந்தாலும் திரையில் தோன்றும் மொழிபெயர்ப்பை வாசிப்பதில் ஆர்வம் காட்டுவதாக நாடக நிறுவனங்கள் தெரிவித்துள்ளன.
இருப்பினும் மக்களிடையே ஏற்பட்டுள்ள இந்த ஆர்வம், பல காலத்துக்குப் பிறகு கிடைத்த வெற்றியே. கடந்த ஆண்டுகளில் தாய்மொழியில் நாடகங்களை மேடையேற்றும் நிறுவனங்கள், சமூக ஊடகங்களில் தங்களது கவனத்தைச் செலுத்தி வருகின்றன.
நாடகங்களில் பேசப்படும் மொழியை மாற்றி அமைத்ததுடன் புதுத் தலைமுறை கலைஞர்களும் பார்வையாளர்களும் உருவாவதற்கு வித்திட்டுள்ளன, இந்நாடக நிறுவனங்கள்.
'அகம் தியேட்டர் லேப்' உறுப்பினர்கள் 35 வயதுக்குக் குறைந்தவர்கள் என்றும் பலர் வெவ்வேறு துறைகளில் அனுபவமுடையவர்கள் என்றும் நிறுவனத்தின் பேச்சாளர் ஒருவர் தெரிவித்தார்.
இவ்வாறு வெவ்வேறு துறைகளைச் சேர்ந்த நிபுணர்கள் தங்கள் திறன்களைக் கொண்டு நாடக உருவாக்கத்தின் வெவ்வேறு அம்சங்களுக்கு உதவலாம். இதனால் மின்னிலக்க உலகைப் பெரிதும் விரும்பும் புதிய தலைமுறையினரை ஈர்க்கும் வண்ணம் தமிழ் நாடகத் துறையை மேம்படுத்தலாம் என்றார் அந்தப் பேச்சாளர்.
இதற்கிடையே, நாடகம் முழுக்க முழுக்க தாய்மொழியில் இருக்க வேண்டும் என்றும் வேறு மொழிச் சொற்கள் கலந்திருக்க வேண்டாம் என்றும் பங்காளிகள் சிலர் கூறியிருப்பதாக 'சிங்கப்பூர் இந்திய தியேட்டர் & பிலிம் எக்ஸ்ப்ளோரஸ்' அமைப்பின் இயக்குநர் திரு சலீம் ஹாடி குறிப்பிட்டார். இருப்பினும், அத்தகைய நாடகங்களுக்கு வரவேற்பு அதிகம் இருக்காது என்றும் தமிழும் ஆங்கிலமும் கலந்த மொழியைப் பயன்படுத்தும் வழக்கத்தை நாம் தவிர்க்க முடியாது என்றும் கூறினார் அவர்.
இந்நிலையில் தாய்மொழியில் நாடகம் அரங்கேற்றும் நிறுவனங்களுக்கு நிதிப் பொறுப்பேற்பும் நிதி உதவியும் தேவை என்றார் அகம் தியேட்டர் லேப் அமைப்பின் பேச்சாளர்.