முகப் பராமரிப்புக்கு செலுத்தப்படும் அதே கவனம் கழுத்திற்கும் தேவை

26 Apr 2023 05:30

உடலின் மற்ற பகுதிகளைவிட கழுத்து வேகமாக மூப்படைவது சிலருக்குக் கவலை தருவது உண்டு.

கழுத்துத் தோல் வேகமாக மூப்படையும் தன்மை உடையது என்று கலிஃபோர்னியா, சான் ஃபிரான்சிஸ்கோ பல்கலைக்கழக தோலியல் பிரிவைச் சேர்ந்த பேராசிரியர் தியோடொரா மவ்ரோ கூறினார்.

கழுத்துத் தோல் எளிதில் பாதிப்படையும் தன்மை உடையது என்றார் அவர். நிமிர்ந்து உட்காராதது அல்லது நிற்காதது, போதுமான அளவு சருமப் பராமரிப்பை மேற்கொள்ளாதது, கழுத்துத் தோலில் அதிக நேரம் சூரிய ஒளி படுவது, இயல்பாகவே தோல் தொய்வடைவது, கழுத்துத் தசைகள் வலுவிழப்பது போன்றவற்றால் கழுத்துத் தோல் வேகமாக மூப்படைகிறது.

உடலின் மற்ற பகுதிகளில் உள்ள தோல் குணமடையும் அளவுக்கு கழுத்துத் தோல் குணம் அடைவதில்லை. ஏனெனில், கழுத்துத் தோல் அவ்வளவு உறுதியானது இல்லை என்றும் அதில் குறைவான மூல உயிர் அணுக்கள் இருப்பதாகவும் தோல் அறுவை சிகிச்சை நிபுணர் டாக்டர் கேட்டி கிவன் கூறினார்.

கழுத்துத் தோல் மூப்படைதலை மெதுவடையச் செய்ய, வருமுன் காப்பதே சாலச் சிறந்தது என்கிறார் இவர்.

சூரிய வெளிச்சத்தில் இருந்து கழுத்துக்குப் பாதுகாப்பு தேவை

“உங்கள் கழுத்தின் எதிரி சூரியன்,” என்று டாக்டர் மவ்ரோ குறிப்பிட்டார்.

கழுத்துத் தோல் மூப்படைதலுக்கான பல அறிகுறிகளையும் சூரிய வெளிச்சத்துடன் தொடர்புபடுத்தலாம்.

கழுத்துத் தோல்மீது சூரிய ஒளி படும்போது, புற ஊதாக்கதிர் தோலின் உள்பகுதியைச் சென்றடைகிறது. இதனால் ‘கொலாஜன்’, ‘இலாஸ்டின்’ இவ்விரண்டையும் தயாரிக்கும் உயிரணுக்கள் சேதமடைகின்றன.

தோல் அமைப்பை கட்டுக்கோப்புடன் வைத்திருக்க ‘கொலாஜன்’, ‘இலாஸ்டின்’ புரதங்கள் முக்கிய பங்கு வகிப்பதாக யூசி டேவிஸ் மருத்துவ நிலையத்தின் தோலியல் பிரிவைச் சேர்ந்த டாக்டர் உமா அக்பாய் கூறினார்.

“தோலின் இறுக்கத்தைக் கட்டிக்காக்க ‘கொலாஜன்’ உதவுகிறது. தோல் இழுக்கப்பட்ட பிறகு அதன் அசல் வடிவத்துக்குத் திரும்ப ‘இலாஸ்டின்’ உதவுகிறது,” என்றார் அவர்.

இவ்விரு புரதங்களைக் கொண்டிருக்கும் தோலின் உட்புறம், முகம், மேற்கை போன்ற உடலின் மற்ற பகுதியைவிட கழுத்தில் மெல்லியதாக உள்ளதாக அவர் விவரித்தார்.

சூரிய வெளிச்சத்தில் நீண்டநேரம் நிற்கும்போது தோலில் சுருக்கம் ஏற்படுவதோடு தோல் நிறம் கறுப்பாகலாம் என்றும் டாக்டர் அக்பாய் குறிப்பிட்டார்.

கழுத்தில் ‘சன்ஸ்கிரீன்’ தடவ மக்கள் மறந்துவிடுவது உண்டு என்று கூறிய டாக்டர் மவ்ரோ, உடலின் மற்ற பகுதிகளைப் பாதுகாக்க வேண்டியது எவ்வளவு முக்கியமோ, கழுத்தையும் பாதுகாப்பது அதே அளவு முக்கியம் என வலியுறுத்தினார்.

குறைந்தது எஸ்பிஎஃப் 30 உடைய சன்ஸ்கிரீனை தினமும் தடவுமாறு அவர் பரிந்துரைத்தார். கழுத்தைச் சுற்றி சன்ஸ்கிரீனை தாராளமாக தடவ வேண்டும் என்று சொன்ன அவர், வெளியிடங்களில் இருந்தால் இடைவெளிவிட்டு நாள் முழுவதும் அதைத் தடவ வேண்டும் என்றார்.

முகத்தைப் பராமரிக்கும்

அதே அளவுக்கு கழுத்தையும் பராமரியுங்கள்

‘சீரம்’, ‘லோஷன்’ போன்றவற்றை தவறாமல் தடவி தங்களது முகத்தைப் பராமரிக்கும் மக்கள், கழுத்தைப் புறக்கணித்து விடுவதுண்டு என்று டாக்டர் அக்பாய் சொன்னார்.

சருமப் பராமரிப்பில் கழுத்தையும் சேர்த்துக்கொள்ள வேண்டும் என்ற அவர், முகத்தில் தடவும் திரவத்தைக் கழுத்துவரை தடவுமாறு அறிவுறுத்தினார்.

வயது ஏறும்போது, ஈரப்பதத்தைத் தக்கவைத்துக்கொள்ளும் ஆற்றலை தோல் சிறிது சிறிதாக இழந்துவிடுகிறது என்று டாக்டர் மவ்ரோ கூறுகிறார். கழுத்துத் தோல் வறண்டுபோய், வழவழப்பு குறைந்து, மந்தமாக காட்சியளிக்கிறது.

எனவேதான், காலையிலும் இரவிலும் ‘மாய்ஸ்ச்சரைசர்’ தடவுவதை உறுதிசெய்ய வேண்டும் என்று அவர் குறிப்பிட்டார். மது அடங்கிய சருமப் பராமரிப்புப் பொருள்களைக் கழுத்தில் தடவுவதைத் தவிர்க்க வேண்டும். ஏனெனில், அவற்றால் தோல் மேலும் காய்ந்துவிடக்கூடும்.

சவர்க்காரங்கள் பலவற்றிலும் ‘சர்ஃபெக்டண்ட்’ எனப்படும் மூலப் பொருள் உள்ளது. தோலின் நீர்ச்சத்தை அவை நீக்கிவிடும்.

ஒரு சருமப் பராமரிப்பு பொருளைப் பயன்படுத்திய பிறகு உங்களது தோல் உலர்ந்து காணப்பட்டால், வேறொரு பொருளுக்கு மாற வேண்டியதற்கான அறிகுறி அது.

தோலின் உறுதிப்பாட்டை மேம்படுத்த வேண்டுமானால், ‘ரெட்டினோய்டு’ மூலப் பொருளைக் கொண்ட ‘சீரம்’ அல்லது ‘லோஷன்’களைப் பயன்படுத்தலாம் என்று டாக்டர் கிவன் பரிந்துரைத்தார். அவற்றைத் தவறாமல் பயன்படுத்தினால் ‘கொலாஜன்’ உற்பத்தியை அவை அதிகரிக்க உதவும்.