மாணவர் முரசு
இ-பேப்பர்
உடலில் 'ட்ரைகிளிசரைட்' அளவு அதிகமாக இருந்தால், இதயப் பிரச்சினை ஏற்படும் ஆபத்து கூடுகிறது. சர்க்கரை, மாவுச்சத்து, மாறுபக்க கொழுப்பு (trans fat) அளவைக் குறைத்துக்கொண்டு, உடற்பயிற்சி செய்து உணவு முறையில் மாற்றங்களைச் செய்துகொண்டால், ட்ரைகிளிசரைட் அளவைக் குறைக்க முடியும்.
ரத்தத்தில் உள்ள ஒருவகை கொழுப்பே ட்ரைகிளிசரைட்ஸ் எனப்படுகிறது. உணவு சாப்பிட்ட பிறகு, உடலுக்குத் தேவையில்லாத கேலரிகள் 'ட்ரைகிளிசரைட்'களாக மாற்றப்படுகின்றன. அவை கொழுப்பு உயிர் அணுக்களில் சேகரிக்கப்பட்டு, பின்னர் தேவைப்படும்போது பயன்படுத்தப்படுகின்றன.
உடற்பருமன் பிரச்சினை, கட்டுப்படுத்தாத நீரிழிவு, மதுபானம் அருந்துவதை வழக்கமாக்கிக்கொள்வது, அதிக கேலரிகள் நிறைந்த உணவுவகைகளைச் சாப்பிடுவது போன்றவற்றால் ரத்தத்தில் ட்ரைகிளிசரைட் அளவு அதிகரிக்கிறது.
உணவுமுறை, வாழ்க்கைமுறை மாற்றங்களால் ட்ரைகிளிசரைட் அளவைக் குறைக்க முடியும்.
கேலரிகள் அளவாக உள்ள உணவைச் சாப்பிடுவதால் உடற்பருமன் பிரச்சினை ஏற்படுவதைத் தவிர்க்க முடியும். ரத்தத்தில் உள்ள ட்ரைகிளிசரைட் அளவும் கூடாமல் பார்த்துக்கொள்ளலாம்.
சொல்லப்போனால், உடல் எடையை 5 முதல் 10 விழுக்காடு குறைப்பதன் மூலம் ட்ரைகிளிசரைட் அளவும் கணிசமாகக் குறைவதாக ஆய்வுகள் காட்டுகின்றன.
மக்களின் உணவு முறையில் கூடுதல் சர்க்கரை பெரும் பங்கு வகிக்கிறது. மிட்டாய்கள், குளிர்பானங்கள், பழச்சாறுகளில் கூடுதல் சர்க்கரை பொதுவாக சேர்க்கப்படுகிறது.
கூடுதல் சர்க்கரை 'ட்ரைகிளிசரைட்'களாக மாற்றப்படலாம். இதனால் ரத்தத்தில் ட்ரைகிளிசரைட் அளவு கூடி, இதயப் பிரச்சினை ஆபத்தும் அதிகரிக்கக்கூடும்.
கூடுதல் சர்க்கரையைப் போலவே உணவில் மாவுச்சத்தின் மூலம் கிடைக்கும் கூடுதல் கேலரிகள் 'ட்ரைகிளிசரைட்'களாக மாற்றப்படுகின்றன.
மாவுச்சத்து குறைந்த உணவு வகைகளுக்கும் ரத்தத்தில் ட்ரைகிளிசரைட் அளவு குறைவாக இருப்பதற்கும் தொடர்புண்டு.
உணவில் கூடுதல் நார்ச்சத்தைச் சேர்த்துக்கொள்வதன் மூலம் சிறுகுடலில் கொழுப்பும் சர்க்கரையும் ஈர்க்கப்படுவதை மெதுவடையச் செய்யலாம். இதனால் ட்ரைகிளிசரைட் அளவு குறைகிறது.
உடற்பயிற்சி செய்வதை வழக்கமாக்கிக்கொள்வதாலும் ட்ரைகிளிசரைட் அளவு குறைகிறது. குறிப்பாக, வாரத்தில் அதிக முறை உடற்பயிற்சி செய்வதால் அதிக பயன் கிடைக்கிறது.
மாறுபக்க கொழுப்பைக் குறைக்கவும்
உணவு விரைவில் வீணாகாமல் இருப்பதற்காக, மாறுபக்க கொழுப்பு எனும் ஒருவகை செயற்கைக் கொழுப்பு உணவில் சேர்க்கப்படுகிறது.
பொரித்த உணவு, சுட்ட உணவுப் பொருள்களில் மாறுபக்க கொழுப்பு பொதுவாக இடம்பெறுகிறது. சில விலங்குகளிலும் அது சிறிதளவு கண்டறியப்படலாம். உணவில் மாறுபக்க கொழுப்பு சேர்க்கப்படுவதற்கு அண்மையில் அமெரிக்காவில் தடை விதிக்கப்பட்டது.