மாணவர் முரசு
இ-பேப்பர்
உயிர் நீத்த செல்லப் பிராணிகளுக்கான 'அகுவமேஷன்' எனப்படும் நூதனமான தகன முறையை நடைமுறைப்படுத்த இங்குள்ள ஒரு நிறுவனம் முயன்று வருகிறது. எல்கலைன் ஹைட்ராலிசிஸ் என அறிவியல் ரீதியாக அழைக்கப்படும் 'அகுவமேஷன்' என்ற முறைப்படி, நீரும் பொட்டேசியம் ஹைட்ராக்சைட் போன்ற சக்திவாய்ந்த காரப்பொருள் கலந்த திரவத்தில் சடலம் சுமார் மூன்று நான்கு மணி நேரத்திற்கு வைகப்படும். பின்பு அச்சடலம் அழுத்தம் கொண்ட இரும்பு கலனில் சுமார் 150 டிகிரி செல்சியசுக்கு சுடப்படும்.
சடலத்தின் எலும்புகள் தவிர மற்ற அனைத்தும் திரவமாக மாறும். எலும்புகள் பின்னர் பொடியாக்கப்பட்டு ஜாடி ஒன்றுக்குள் வைக்கப்பட்டு மாண்ட பிராணிகளின் குடும்பத்திடம் கொடுக்கப்படும்.
2023ஆம் ஆண்டு மார்ச் மாதம் முதல் செயல்பட்டு வரும் 'தி கிரீன் மோர்டிஷியன்' நிறுவனம், நாய்கள், பூனைகள், பறவைகள், வெள்ளெலிகள் என இதுவரை 50 விலங்களுக்கு இந்த நூதனமான முறையைப் பயன்படுத்தி வருகிறது.
நிறுவனத்தின் உரிமையாளர்கள் திரு யாங் லூ, 28, திரு ஜோ காம், 47 ஆகியோர் 'அகுவமேஷன்' செய்வதற்கான இயந்திரத்தை அமெரிக்காவிலிருந்து US$200,000 (S$270,000) செலவில் வாங்கியுள்ளனர்.
சிங்கப்பூரில் நிலப்பற்றாக்குறை இருப்பதால் விலங்குச் சடலங்களை அப்புறப்படுத்துவதற்கு மாற்று வழிகளுகக்கான தேவையும் 'அகுவமேஷன்' போன்ற மாறுபட்ட வழிகளுக்கு வரவேற்பும் இருப்பதாகத் திரு லூ கூறினார்.
'அகுவமேஷன்' முறையை மனிதர்களுக்கும் பயன்படுத்த ஆஸ்திரேலியா, பெல்ஜியம், கனடா உள்ளிட்ட சில நாடுகளும் கலிஃபோர்னியா, ஐடாஹோ, ஃபுளோரிடா உள்ளிட்ட சில அமெரிக்க மாநிலங்களும் அனுமதிக்கின்றன.
1995ஆம் ஆண்டு முதல் அறிவியல் ஆய்வுக்காக தானம் செய்யப்படும்
மனிதச் சடலங்களை தகனம் செய்வதற்கு 'அகுவமேஷன்' முறை 25 ஆண்டுகளாக பயன்படுத்தப்படுகிறது.
நோபல் அமைதிப் பரிசைப் பெற்ற அமரர் டெஸ்மண்ட டுட்டு 2021ஆம் ஆண்டில் காலமானபோது அவரது நல்லுடலும் இந்த முறையின்படித்தான் தகனம் செய்யப்பட்டது.
தற்காலத்தில் எல்லோரும் எதிர்நோக்கும் அறம் ரீதியான சவால் பருவநிலை மாற்றம் எனக் கூறிய அவர், சுற்றுச்சூழலுக்கு ஏற்றதாக இருக்கும் இந்த வழியைப் பின்பற்றியுள்ளார்.
இந்த முறையால் வெளியிடப்படும் கரியமில வாயுவின் அளவு, சடலத்தைத் தீயடுப்பில் எரியூட்டுவதால் வெளிவரும் கரியமில வாயுவைக் காட்டிலும் பத்து மடங்கு குறைவு.
எரியூட்டுவதால் பெறப்படும் சாம்பலைக் காட்டிலும் இந்த முறையிலிருந்து வரும் சாம்பல் 40 விழுக்காடு வரை அதிகம்.
செல்லப் பிராணிகளை இழந்தோர் இதயம் துய்க்கும் விதத்தில் 'அகுவமேஷன்' செய்யப்படும் வசதியில் உயரமான உட்கூரை, இயற்கையொத்த அலங்காரங்கள் போன்றவை அமைக்கப்பட்டிருப்பதாகத் திரு லூ கூறினார்.
சாம்பல் வைக்கப்படும் ஜாடிகளும் பார்ப்பதற்கு கலைப்பொருள்
களைப் போல காட்சி அளிக்கின்றன.
அடுப்பெரியூட்டைக் காட்டிலும் இந்த முறை மெதுவாக இருந்தாலும் தங்களது செல்லப் பிராணிகளுக்குப் பிரியாவிடை கொடுக்க கூடுதல் நேரம் எடுப்பதற்கு இது வாய்ப்பு வழங்கு
வதாகக் கூறுகின்றனர்.
"சடல எரியூட்டு இடங்களில் சாதாரணமாக 45 நிமிடங்கள் வரை இருக்கலாம்.
"இங்கோ நாம் இரண்டு மணி நேரம் இருந்து பிரியாவிடை கொடுக்கலாம்," என்று சந்தைப்படுத்துதல் நிர்வாகி சேஹுய் லியோங், 26, தெரிவித்தார். ஆனால் எரியூட்டு முறையைக் காட்டிலும் இந்த முறைக்கான கட்டணம் அதிகம். 'அகுவமேஷன்' சேவைக்கான கட்டணம் 577 வெள்ளி முதல் 777 வெள்ளி. இந்த முறையை மேம்படுத்தி செலவைக் குறைப்பதற்கான பேச்சுவார்த்தைகள் தற்போது தேசிய சுற்றுப்புற அமைப்புடன் நடைபெற்று வருகிறது.