நகைச்சுவை விருந்தை வெளிநாட்டு ஊழியர்கள் கண்டு ரசிக்க ஒரு வாய்ப்பு

2 mins read
d15d2f79-816c-4ea6-a783-058f73e478d5
வயிறு குலுங்கச் சிரிக்க வைக்கும் இந்நிகழ்ச்சியைக் காண வெளிநாட்டு ஊழியர்களுக்கு இலவசமாக நாற்பது நுழைவுச் சீட்டுகள் வழங்கப்பட்டன.  - படம்: மாஸ்க் ஸ்டூடியோஸ் சிங்கப்பூர்

விக்கல்ஸ் ஆப் விக்ரம் என்ற நகைச்சுவை நிகழ்ச்சியில் வெளிநாட்டு ஊழியர்கள் சிரித்து மகிழ மாஸ்க் ஸ்டூடியோஸ் சிங்கப்பூர், ‘இட்ஸ் ரெயினிங் ரெயின்கோட்ஸ்’ என்ற சமூக அமைப்புக்கு 40 இலவச நுழைவுச் சீட்டுகளை வழங்கியுள்ளது. 

ஆகஸ்ட் 26 ஆம் தேதி நடக்கவிருக்கும் இந்நிகழ்ச்சியின் தயாரிப்பாளரான மாஸ்க் ஸ்டூடியோஸ் நிறுவனத்தைச் சேர்ந்த திரு கார்த்திக் அழகப்பன் ‘இனிபே’, (Inypay) என்ற நிதி நிறுவனத்தின் நிதி ஆதரவினால் இந்த இலவச நுழைவுச் சீட்டுகளை வெளிநாட்டு ஊழிய நண்பர்களுக்கு வழங்க முடிந்தது என்பதை சுட்டினார். 

“நகைச்சுவைக் கலைஞரான விக்ரமின் நகைச்சுவையை நேரில் பார்த்து வெளிநாட்டு ஊழிய நண்பர்கள் கண்டு ரசிக்க இவர்களுக்கு இது ஒரு நல்ல வாய்ப்பு,” என்றார் திரு கார்த்திக். 

இன்ஸ்டாகிராம், யூடியூப் போன்ற சமூக ஊடகங்களில் பிரபலமடைந்த திரு விக்ரம் அருள் விதியபத்தி வெளிநாட்டில் தனது நகைச்சுவை நிகழ்ச்சியை மேடை ஏற்றுவது இதுவே முதல் முறை. தமிழ்த் திரைப்படங்கள், பாடல்கள், வாழ்க்கையில் நடக்கும் விசித்திரமான சம்பவங்கள் போன்றவை இந்த நகைச்சுவை நிகழ்ச்சிகளில் அடங்கும். 

இலவச நுழைவுச் சீட்டுகளைப் பெற வெளிநாட்டு ஊழியர்கள் மிகவும் ஆவலுடன் இருந்ததாகக் கூறினார் ‘இட்ஸ் ரெயினிங் ரெயின்கோட்ஸ்’ அமைப்பின் நிர்வாக இயக்குநரான குமாரி ராசி திருமலை. 

“ஒரு மணி நேரத்திலேயே 40 நுழைவுச் சீட்டுகளும் வெளிநாட்டு ஊழியர்களுக்கு கொடுக்கப்பட்டுவிட்டன. இந்த வாய்ப்பை இவர்களுக்கு வழங்கிய நிறுவனங்களுக்கு எங்களது மனமார்ந்த நன்றி,” என்றார் இவர். 

சிங்கப்பூரில் கடந்த 9 ஆண்டுகளாக கட்டுமானத் துறையில் பணிபுரியும் திரு அறிவுராஜ் இந்நிகழ்ச்சியை தனது நான்கு நண்பர்களுடன் சேர்ந்து பார்க்க வாய்ப்பு கிடைத்துள்ளது. சிங்கப்பூரில் ஒரு நேரடி நிகழ்ச்சியைப் பார்ப்பது இதுவே முதன்முறை. 

“பல நிகழ்ச்சிகளின் நுழைவுச் சீட்டுகளின் விலை அதிகமாக உள்ளதால் எங்களால் பார்க்க முடியவில்லை. ஆனால் இது போன்ற இலவச நுழைவுச் சீட்டுகள் கிடைப்பது அரிது. வேலை முடிந்த களைப்போடு இருந்தாலும் பரவாயில்லை என்று இந்த நிகழ்ச்சிக்குக் கண்டிப்பாக போக வேண்டும் என்று ஆவலுடன் இருக்கிறோம்,”  என்று  நண்பர்களோடு சேர்ந்து நிகழ்ச்சியைக் காண ஆர்வமோடு காத்திருக்கிறார் திரு அறிவு, 29. 

‘விக்கல்ஸ் ஆப் விக்ரம்’ நிகழ்ச்சி வரும் சனிக்கிழமையன்று தி சிங்போஸ்ட் அரங்கத்தில் மாலை 6.30 மணியளவில் நடக்கவிருக்கிறது.

குறிப்புச் சொற்கள்