மாணவர் முரசு
இ-பேப்பர்
சிங்கப்பூர் மக்கள் மாறுபட்டு பேசும் தமிழ்மொழி, வாழ்வியல் எனத் தொடர்புபடுத்திக்கொள்ளக்கூடிய நகைச்சுவை அடங்கிய ‘டபுள் டிரபுள்’ (Double Trouble) நிகழ்ச்சி பங்கேற்பாளர்களிடையே பெரும் வரவேற்பைப் பெற்றது.
சமூக ஊடகங்களில் பிரபலமான மேடை நகைச்சுவைக் கலைஞர்கள் ‘விக்கல்ஸ்’ விக்ரம், ஜெகன் கிருஷ்ணன் ஆகியோரின் நகைச்சுவை நிகழ்ச்சி எஸ்பிளனேட்டு கலையரங்கில் நவம்பர் 23ஆம் தேதி மாலை நடைபெற்றது.
பாரம்பரிய இசை நிகழ்ச்சிகள் தொடங்கி, இளையர்களைக் கவரும் வண்ணம் நாடகங்கள், நடன நிகழ்ச்சிகள், நகைச்சுவை நிகழ்வுகள் அடங்கிய ‘கலா உத்சவம்’ 2024ன் ஒரு பகுதியாக இந்நிகழ்ச்சி நடைபெற்றது.
இரண்டு மணி நேரம் நீடித்த இந்நிகழ்ச்சி இசை, சுய பகடி, சமூகத்தில் நிலவும் அண்மைய போக்குகள் குறித்த கிண்டல்களுடன் அரங்கத்தைச் சிரிப்பலையில் ஆழ்த்தியது.
குறிப்பாக, இந்தியாவிலிருந்து நிகழ்ச்சிக்காக சிங்கப்பூர் வந்திருந்த கலைஞர்கள் இருவரும், இரு நாடுகளுக்கும் இடையேயுள்ள வேறுபாடுகளைச் சுட்டிக்காட்டிப் பேசியது பார்வையாளர்களின் கைத்தட்டலை அள்ளியது.
சட்டம் படிக்கும் காலத்திலேயே இத்துறையில் ஆர்வம் ஏற்பட்டதாகவும் அதற்குச் சமூக ஊடகத்தில் கிடைக்கும் ஆதரவு மகிழ்ச்சியளிப்பதாகவும் சொன்னார் ‘விக்கல்ஸ்’ தளத்தின் நிறுவனர் விக்ரம்.
எனினும், “மேடையில் நகைச்சுவை நிகழ்ச்சி நடத்தும் கலைஞர்களை மக்கள் நேரில் சென்று ரசித்து ஆதரவளிப்பது இல்லை. அது அதிகரித்தால் மேலும் பல திறமைசாலிகள் இதனை முழுநேரப் பணியாக மேற்கொள்ள முன்வருவார்கள்,” என்று கேட்டுக்கொண்டார்.
தொழில்நுட்ப ஊழியராக இருந்து முழுநேர நகைச்சுவைக் கலைஞராக உருவெடுத்துள்ள ஜெகன் கிருஷ்ணன், இசை மீது தமக்கு ஆர்வம் அதிகம் என்றும் அது சார்ந்த பகடிகள் செய்வது மக்களைக் கவர்வதாகவும் சொன்னார்.
தொடர்புடைய செய்திகள்
“அன்றாடம் நாம் காணும் சம்பவங்களைச் சற்றே மாறுபட்ட கண்ணோட்டத்தில் பார்ப்பதும், நாங்கள் பார்ப்பனவற்றைப் பகிர்வதும்தான் நிகழ்ச்சிகள் வரவேற்பைப் பெறுவதற்கான காரணங்கள்,” என்றார்.
தொண்டூழியர் சாந்தமூர்த்தி ஏற்பாட்டில் 45 வெளிநாட்டு ஊழியர்கள் இந்நிகழ்ச்சியைக் கண்டுகளித்தனர்.
“சமூக ஊடகங்களில் பார்த்த இந்த வகை நிகழ்ச்சியினை நேரடியாகப் பார்ப்பது மாறுபட்ட அனுபவம்,” என்றார் முரளி. அவருடன் வந்திருந்த பல வெளிநாட்டு ஊழியர்களுக்கும் நேரடி நிகழ்ச்சியைக் கண்டு கழிப்பது இதுவே முதன்முறை என்பதால் உற்சாகத்துடன் பங்கேற்றனர்.
“இதற்கு முன்னர் ‘அலெக்ஸ் இன் வாண்டர்லேண்ட்’ நிகழ்வைப் பார்த்தோம். அதே போல இதுவும் சிறப்பாக இருந்தது. எதிர்பார்த்ததை விட நகைச்சுவையாக இருந்தது,” என்றனர் வங்கி ஊழியர் அருண், ஆசிரியை மெய்யம்மை.
விக்ரமின் நகைச்சுவையைப் பெரிதும் ரசிக்கும் ஜெயந்தி, “அவருடன் ஜெகனின் படைப்பையும் பார்க்க முடிந்ததில் இரட்டிப்பு மகிழ்ச்சி,” என்றார்.
இசை நிகழ்ச்சிகளுக்கு அதிகம் செல்லும் வழக்கமுடைய தனியார்த் துறை ஊழியரான ராஜேஷ் ரஞ்சினி இணையர், வேலைப்பளு தரும் மன அழுத்தத்தைக் குறைக்கும் விதமாக இந்த நிகழ்ச்சிக்கு வந்ததாகவும் அது பலனளித்துத் திரும்பிச் செல்வதாகவும் புன்னகையுடன் பகிர்ந்தனர்.