மாணவர் முரசு
இ-பேப்பர்
சிறுகதை:
இரா சத்திக்கண்ணன்
என்ன கணேஷ் எப்படி இருக்க? கணேஷ் வீட்டிற்குள் நுழைந்ததும் கேட்டான் சீனு. 'சூப்பர் டா' சீனு. எவ்வளவு வருஷமாச்சு உன்ன பார்த்து? ஆனந்தத்துடன் கணேஷ் சீனுவிற்கு தன் குடும்பத்தை அறிமுகம் செய்தான்.
'சூடா காப்பி குடி முதல்ல' கணேஷ் மகிழ்ச்சியுடன் சொல்ல காப்பி கப்பை கணேஷும் சீனுவும் கையில் எடுத்துக்கொண்டு நடக்க ஆரம்பித்தார்கள்.
சீனு, இதுதான் என்னோட ஒர்க் ஃபிரம் ஹோம் ஆபீஸ். பத்து பெரிய 'எல்சிடி'கள் அறையை அலங்கரித்துக்கொண்டிருந்தன.
வழுவழுப்பான லேப்டாப் டேபிள் மற்றும் இத்தாலிய லெதர் கொண்ட குஷன் நாற்காலி அழகாய் இருந்தன!
'ஜென்' கோட்பாடுகளை கொண்டு வடிவமைக்கப்பட்ட அறையாக இருக்கும். 'மினிமலிஸ்ட்' தத்துவங்களும் பின்னப்பட்டிருக்கலாம்.
கணேஷ் சீனுக்கு வீட்டை சுற்றிக்காட்டத் தொடங்கினான்
இதுதான் லிவிங் ஹால். பெரிய பெரிய வாங்கோவின் ஓவியங்கள் அலங்கரித்தன.
பெரிய கேரளா குத்துவிளக்குகள் அழகுக்காக ஹாலில் வைக்கப்பட்டிருந்தன. கம்ப்யூட்டர் ரூம், மியூசிக் மற்றும் என்டர்டைன்மெண்ட் ரூம் , ஜிம் ரூம் மாடியிலே இருக்கு. வா, கொஞ்சநேரம் மியூசிக் கேட்கலாமென்றான் கணேஷ். மைக்கல் ஜாக்சனின் 'பேட்ட இட்'இல்லை 'பீட் இட்' மியூசிக் ரூம் முழுதும் அதிர்வுகளை ஏற்படுத்தியது. இப்ப பாரு, எம்எஸ்ஸின் மெல்லிய தேஷ் ராகம்... இருபது ஹெர்ட்ஸ்க்குக்கும் கீழ் கேட்கும் ஒலி ...வாவ் என்றவாறு சீனு வியந்து பாராட்டினான்.
ஜிம்முக்கு போகலாமா என்றான் கணேஷ். ஜிம் அறையில் உடலை உறுதிப்படுத்தும் அத்தனை செயற்கை அறிவுள்ள இயந்திர மனிதர்களும் கும்மாளமடித்துக்கொண்டிருந்தார்கள். சீனுவால் இன்னும் தன் கண்களை நம்பமுடியவில்லை.
ஜிம்மிலிருந்து சமையலறைக்கு லிப்ட் சவாரி. இத்தாலியன் அமைப்பில் சமையலறை. எல்லா சாதனங்களும் ஒன்றோடொன்று பேசிக்கொண்டிருந்தன.
கணேஷும் சீனுவும் உள்ளே நுழைந்தவுடன் சட்டென்று பேச்சை நிறுத்தின, கண்டிப்பான ஆசிரியர் உள்ளே நுழைந்தவுடன் மாணவர்கள் பேச்சை நிறுத்துவதைப்போல!
சமையலறைக்குப் பக்கத்திலேயே பூசையறை , கேட்கவே வேண்டாம்.
'ஜூம் மீட்டிங்கில்' ஒரு சாமியார் ஆசி வழங்கிகொண்டிருந்தார். எல்லாக் கடவுளர்களின் காதிலும் இயர் ஃபோன் செட். 'ப்ளூடூத் கடவுளர்களை' கண்டதில் சீனுவிற்கு எல்லையற்ற மகிழ்ச்சி!
அற்புதமென்றான் சீனு.
வா சூரிய அறையைக் காட்டுகிறேனென்றான் கணேஷ். அதென்ன சூரிய அறை! வியப்புடன் சீனு. கணேஷ் கதவைத் திறந்தவுடன் பிரகாசமான சூரிய ஒளி அறைமுழுதும் நிறைந்திருந்தது. அற்புதம். வானவில் மட்டுந்தான் இல்லை அங்கு இல்லை.
என்னடா இது கணேஷ் . உன் வீடு இத்தனை பிரம்மாண்டமா இருக்கு! வியந்து பாராட்டினான் சீனு.
சரி கணேஷ், உன் அப்பா அம்மா எங்கே என்றான்? சீனு பதில் சொல்லத் தயங்கினான் கணேஷ்!
சூரிய அறையில் இருள் பரவுவதை மெல்ல உணர்ந்தான் சீனு.
வாழ்த்துகள் சொல்லி விடைபெற்றான் சீனு!