மாணவர் முரசு
இ-பேப்பர்
சிங்கப்பூர் பெண்கள் எதிர்கொள்ளும் பிரச்சினைகளை சிறந்த முறையில் கவனித்து உதவ மக்கள் செயல் கட்சியின் மகளிர் பிரிவு புதிதாக இரு குழுக்களை ஏற்படுத்த உள்ளது. பெண்கள் பிரச்சினைகள் தொடர்பான ஆய்வுப் பணிகளையும் கொள்கை விவகாரங்களையும் அந்தக் குழுக்கள் முன்னின்று கவனித்து உதவும் என்று மனிதவள அமைச்சர் ஜோசஃபின் டியோ கூறியுள்ளார்.
ஆய்வுக்குழு, பாசிர் ரிஸ்-பொங்கோல் குழுத்தொகுதி உறுப்பினர் திருவாட்டி இயோ வான் லிங் தலைமையில் செயல்படும். புதிதாக உருவெடுத்திருக்கும் நில வரங்களை அக்குழு ஆராயும். குறிப்பாக, வீட்டிலிருந்து வேலை செய்வது, பெண்களிடத்தில் அது ஏற்படுத்தும் தாக்கம் போன்றவை அதனுள் அடங்கும் என்றார் மசெக மகளிர் பிரிவு தலைவியுமான திருவாட்டி டியோ.
உதாரணத்திற்கு, இல்லப் பராமரிப்பில் முக்கிய பங்கு வகிக்கும் பெண்களுக்கு வீட்டிலிருந்து வேலை செய்வது எவ்வாறு உதவும், அத்துடன் முன்னேற்றம் ஏற்படும்போது ஓரங்கட்டப்படாமல் இந்தப் புதிய வேலை முறை தடுக்குமா என்பன போன்ற வினாக்கள் உள்ளதாக அவர் கூறினார். அனைத்துலக மகளிர் தினம் நாளை (மார்ச் 8) கடைப்பிடிக்கப்பட உள்ள வேளையில் பொங்கோலில் நேற்று அது தொடர்பாக நடத்தப்பட்ட நிகழ்வு ஒன்றில் பங்கேற்று திருவாட்டி டியோ பேசினார். முக்கிய நடப்புகள் குறித்து பெண்கள் கொண்டிருக்கும் எண்ணங்களை கூர்மைப்படுத்தும் முயற்சியிலும் இக்குழு ஈடுபடும்.
தொடக்கநிலை 1க்கான பதிவு, நாடாளுமன்றத்தில் சட்ட, உள்துறை அமைச்சர் கா. சண்முகம் தெரிவித்த புதிய தண்டனை கட்டமைப்பு உள்ளிட்ட கவனத்தை ஈர்க்கும் அம்சங்கள் மீதான விழிப்புணர்வு அவற்றில் அடங்கும் என்றார் அவர்.
மூன்று வகையான பாலியல் குற்றங்களுக்கான அதிகபட்ச தண்டனை அதிகரிக்கப்பட இருப் பதாக திரு சண்முகம் கூறி இருந்தார். இக்குற்றங்களுக்கான தண்டனை விவரங்கள் மறுஆய்வு செய்யப்பட்டதன் தொடர்ச்சியாக அவரின் இந்த அறிவிப்பு வெளியானது. பல்வேறு வழக்குகளில் விதிக்கப்படக் கூடிய தண்டனை போதுமானதாக இல்லை என்பது பற்றி கடந்த ஆண்டு ஜூலையில் மசெக மகளிர் பிரிவு ஆழ்ந்த கவலை தெரிவித்திருந்ததாக அமைச்சர் டியோ கூறியுள்ளார்.
கொள்கை மீது கவனம் செலுத்தக்கூடிய இரண்டாவது குழுவுக்கு மார்சிலிங்-இயூ டீ குழுத்தொகுதி உறுப்பினர் திருவாட்டி ஹேனி சோ தலைமை ஏற்பார்.
"நாடாளுமன்றத்தில் 24 பெண்கள் இடம்பெற்றுள்ளனர். கேள்வி கள், மசோதாக்கள், விவாதங்கள் மூலம் பெண்களின் பிரச்சினைகளை அவர்கள் நாடாளுமன்றத்தில் எதிரொலிக்க முடியும்," என்றார் திருவாட்டி டியோ.