மாணவர் முரசு
இ-பேப்பர்
மத்திய போதைப்பொருள் ஒழிப்புப் பிரிவின் முன்னாள் புலனாய்வு அதிகாரி முகம்மது ஃபையாஸ் ஹெல்மிக்கு $1,300 ரொக்கத்தை முறைகேடாய்க் கையாண்டதன் தொடர்பில் வெள்ளிக்கிழமை (நவம்பர் 14) 13 மாதச் சிறைத்தண்டனை விதிக்கப்பட்டுள்ளது. ஆடவர்கள் இருவரை அவர் ஏமாற்றியதாகத் தெரிவிக்கப்பட்டது.
ஆடவர்கள் இருவரும் நீதிமன்ற ஆவணங்களில் வி1, வி2 என்று குறிப்பிடப்பட்டுள்ளனர். அவர்கள் இருவரும் உடைமைகளைப் பெற்றுக்கொண்டதன் தொடர்பிலான மத்திய போதைப்பொருள் ஒழிப்புப் பிரிவின் ஒப்புதல் ஆவணங்களில் அவர் ஏமாற்றியதாகக் கூறப்பட்டது.
நம்பிக்கை மோசடி செய்தது, பொய்யான ஆவணத்தின் மூலம் ஏமாற்றியது, நீதிக்குத் தடையாய் விளங்கியது ஆகிய குற்றச்சாட்டுகளை அக்டோபர் மாதம் ஃபையாஸ் ஒப்புக்கொண்டார்.
2023, 2024ஆம் ஆண்டுகளில் அவர் மத்திய போதைப்பொருள் ஒழிப்புப் பிரிவில் வேலைசெய்தபோது அந்தக் குற்றங்களைப் புரிந்தார். சக ஊழியர் காவல்துறையில் புகார் அளித்ததைத் தொடர்ந்து சென்ற ஆண்டு (2024) அவர் பதவி விலகினார்.
2022ல் 72 வயது வி1 பிடிபட்டபோது, அவரிடமிருந்து $900க்கும் மேற்பட்ட ரொக்கமும் இரண்டு கைப்பேசிகளும் ஏப்ரல் மாதம் கைப்பற்றப்பட்டன. பின்னர் வி1, போதைப்பொருள் நல்வாழ்வு நிலையத்தில் சேர்க்கப்பட்டார். அதன் பின்னர் அவர் இடைவழி இல்லத்திற்கு அனுப்பப்பட்டார். 2023 நவம்பரில் அவரின் ரொக்கத்தை எடுத்துக்கொண்டார் ஃபையாஸ்.
2024 ஜனவரியில் இரண்டு கைப்பேசிகளை வி1யிடம் அவர் திருப்பிக்கொடுத்தார். வி1, ஒப்புதல் ஆவணத்திலும் கையெழுத்திட்டார். அவர் பணத்தைப் பற்றிக் கேட்டபோது, மத்திய போதைப்பொருள் ஒழிப்புப் பிரிவின் இன்னோர் அதிகாரி அதனைக் கையாள்வதாகவும் பணத்தைக் கண்டுபிடிக்கத் தாம் முயல்வதாகவும் ஃபையாஸ் உறுதிகூறினார்.
வி1, இடைவழி இல்லத்தின் தலைவரிடம் அதுபற்றித் தெரிவித்தார். அந்தத் தலைவர் மத்திய போதைப்பொருள் ஒழிப்புப் பிரிவைத் தொடர்புகொண்டதாக நீதிமன்றத்திற்குத் தெரியவந்தது. அப்போதுதான், வி1 வேலை செய்த இடத்திற்குச் சென்ற ஃபையாஸ் அவரிடம் $950 ரொக்கத்தைக் கொடுத்ததாகக் கூறப்பட்டது.
ஃபையாஸ் அதேபோன்ற மற்றொரு குற்றத்தையும் புரிந்தார். அது 27 வயது வி2 தொடர்பானது.
தொடர்புடைய செய்திகள்
2024 ஜனவரியில் வி2க்குச் சொந்தமான $360க்கும் அதிகமான பணத்தை அவர் கையாடியதாகத் தெரிவிக்கப்பட்டது. இரண்டு மாதத்திற்குப் பின்னர் வி2க்கு $400 ரொக்கத்தை அவர் மாற்றிவிட்டார்.
2024 ஏப்ரல் 5ஆம் தேதி, ஃபையாசுக்கு எதிராக மத்திய போதைப்பொருள் ஒழிப்புப் பிரிவின் மற்றோர் அதிகாரி, காவல்துறையிடம் புகார் அளித்தார்.
அன்றைய தினமே கைதுசெய்யப்பட்ட ஃபையாஸ், இவ்வாண்டு (2025) ஜனவரியில் குற்றஞ்சாட்டப்பட்டார்.