மாணவர் முரசு
இ-பேப்பர்
தோ பாயோவில் குடியிருப்பாளர்கள், மாணவர்கள், சமூகப் பங்காளிகள் என ஏறத்தாழ 2,000 பேர் இணைந்து ‘நன்னீர் நண்டு’ (River crab) விளையாட்டுத் திடலை வடிவமைத்து உருவாக்கியுள்ளனர்.
எண் 9 லோரோங் 7 தோ பாயோவில் அமைந்துள்ள இந்த விளையாட்டுத் திடல், தோ பாயோவின் முக்கிய அடையாளமாக விளங்கும் என்று வீடமைப்பு வளர்ச்சிக் கழகம் (வீவக) ஞாயிற்றுக்கிழமை (ஏப்ரல் 6) தெரிவித்தது.
தோ பாயோ ‘என்1’ அக்கம்பக்கப் பூங்காவில் தற்போது உள்ள விளையாட்டுத் திடலுக்கு மாற்றாக அது அமைகிறது.
கழகத்தின் ‘நமது குடியிருப்புப் பேட்டைகளை உருமாற்றுவோம்’ எனும் வீவக நகர்ப்புறங்களையும் குடியிருப்புகளையும் புதுப்பிக்கும் திட்டத்தின்கீழ் அந்தப் பூங்கா உருமாற்றம் கண்டுள்ளது. அதன் நடுநாயகமாக விளங்குகிறது புதிய விளையாட்டுத் திடல்.
ஞாயிற்றுக்கிழமை அந்தத் திடல் பொதுமக்களுக்குத் திறந்துவிடப்பட்ட நிகழ்ச்சியில் தேசிய வளர்ச்சி அமைச்சர் டெஸ்மண்ட் லீ கலந்துகொண்டார்.
நிகழ்ச்சியில், விளையாட்டுத் திடலின் நிறைவுப் பணிகளில் ஈடுபட்ட குடியிருப்பாளர்கள், மாணவர்கள் என ஏறக்குறைய 100 பேருடன் அமைச்சரும் பங்குகொண்டார்.
“தனித்துவமான ‘நன்னீர் நண்டு’ விளையாட்டுத் திடல் உட்பட பூங்காவின் மேம்பாடு, சமூகத்தினர் இணைந்து அவர்களின் அக்கம்பக்கத்தை எவ்வாறு வடிவமைக்கலாம் என்பதற்கான சான்று. இத்தகைய திட்டங்கள் சமூக உறவுகளையும் குடியிருப்பாளர்களிடையிலான தொடர்புகளையும் வலுப்படுத்துகின்றன,” என்றார் அமைச்சர் லீ.
வீடமைப்பு வளர்ச்சிக் கழகம் 2021ஆம் ஆண்டிலிருந்து இந்த விளையாட்டுத் திடல் உள்ளிட்ட பூங்காவை வடிவமைக்கும் பணியில் குடியிருப்பாளர்களை ஈடுபடுத்தியது.
தொடர்புடைய செய்திகள்
மேலும், புதிய விளையாட்டுத் திடலில் பிள்ளைகளுக்கான விளையாட்டு அம்சங்களைத் தேர்ந்தெடுப்பதில் ஃபர்ஸ்ட் தோ பாயோ தொடக்கப்பள்ளி, பெய் சுன் பொதுப் பள்ளி ஆகியவற்றின் மாணவர்கள் 1,100 பேர், அந்த வட்டாரத்தில் அமைந்திருக்கும் ‘பிசிஎஃப் ஸ்பார்க்கல்டாட்ஸ்’ பாலர் பள்ளி மாணவர்கள் 120 பேருடன் கழகம் இணைந்து பணியாற்றியது.
விளையாட்டுத் திடலின் ரப்பர் தரைத்தளத்தை வடிவமைப்பது தொடர்பில் 2024ஆம் ஆண்டு ஏப்ரல், மே மாதங்களில் குடியிருப்பாளர்களுக்கு ஒரு போட்டி நடத்தப்பட்டது.
போட்டியில் வெற்றிபெற்ற ஃபர்ஸ்ட் தோ பாயோ தொடக்கப் பள்ளி மாணவி டே ஜியா லெ வடிவமைத்த நீர்நாய் கருப்பொருளில் அமைந்த வடிவம் விளையாட்டுத் திடலுக்குப் பயன்படுத்தப்பட்டது.
செல்லப்பிராணிகளுக்கான வசதிகள், சமூகத் தோட்டம், மேம்படுத்தப்பட்ட விளக்குகள், நடைபாதைகள் ஆகியவற்றுடன் பூங்காக புது மெருகு பெற்றுள்ளது.
இத்தகைய மேலும் மூன்று விளையாட்டுத் திடல்கள் தோ பாயோ, உட்லண்ட்ஸ், பாசிர் ரிஸ் ஆகிய வட்டாரங்களில் அமைக்கப்படும் என்று வீவக கூறியது.