மாணவர் முரசு
இ-பேப்பர்
மண்டாய் ரெய்ன்ஃபாரஸ்ட் ஓய்வுவிடுதி திங்கட்கிழமை (அக்டோபர் 27) உணவு பானத்துறை மற்றும் சார்நிலை ஊழியர் சங்கம் மற்றும் தேசிய தொழிற்சங்கக் காங்கிரசின் (என்டியுசி) ‘இ2ஐ’ நிறுவனத்துடன் இரு புரிந்துணர்வுக் குறிப்புகளில் கையெழுத்திட்டது.
மூத்தோர், உடற்குறையுள்ளோர்க்கான வேலைவாய்ப்புகளை ஆதரிப்பதற்கும் அவர்கள் வேலை மாறுவதை எளிதாக்குவதற்கும் அந்தக் குறிப்புகள் உறுதிசெய்கின்றன.
மண்டாய் ரெய்ன்ஃபாரஸ்ட் ஓய்வுவிடுதியில் நடைபெற்ற கையழுத்திடும் நிகழ்ச்சியில் என்டியுசி தலைமைச் செயலாளர் இங் சீ மெங் சிறப்பு விருந்தினராகக் கலந்துகொண்டார்.
உணவு பானத்துறை மற்றும் சார்நிலை ஊழியர் சங்கத்துடனான முதல் புரிந்துணர்வு ஒப்பந்தத்தின்கீழ் ஒரு நிறுவனப் பயிற்சிக்குழு உருவாக்கப்படும் என்று திரு இங் தெரிவித்தார்.
“பயிற்சிக்குழு வழி 200க்கும் மேற்பட்ட தொழிலாளர்களுக்குத் திறன்களையும் பணி வாய்ப்புகளையும் மேம்படுத்தும் முயற்சிகள் மேற்கொள்ளப்படும்,” என்று அவர் விளக்கினார்.
செயற்கை நுண்ணறிவு, மின்னிலக்க ஈடுபாடு காரணமாக இப்போது விடுதிகள் உட்பட எல்லாத் துறைகளும் மாறி, மேம்பட்டு வருவதாகக் கூறினார் உணவு பானத்துறை மற்றும் சார்நிலை ஊழியர் சங்கத்தின் தலைமைச் செயலாளர் சங்கரதாஸ் எஸ். சாமி.
“இன்றைய உலகின் சவால்களைச் சரிவர சமாளிக்க ஒவ்வொரு தொழிலாளரும் தொடர்ந்து தேவையான ஆதரவைப் பெறுவர்,” என்று அவர் உறுதியளித்தார்.
இ2ஐ நிறுவனத்துடனான இரண்டாவது புரிந்துணர்வுக் குறிப்பானது வேலைப் பாதுகாப்பு, தொழில் முன்னேற்றம், திறன் மேம்பாடு ஆகியவற்றை ஆதரிக்கும்.
தொடர்புடைய செய்திகள்
இந்த முன்முயற்சிக்காக மண்டாய் ரெய்ன்ஃபாரஸ்ட் ஓய்வு விடுதி, சமூக மேம்பாட்டு மன்றங்கள், மக்கள் கழகங்கள், மூப்படைதல் நிலையங்கள் ஆகியவற்றுடன் இணையும் என்று எதிர்பார்க்கப்படுகிறது.
மேலும் மண்டாய் ரெய்ன்ஃபாரஸ்ட் ஓய்வு விடுதி வரும் நவம்பர் மாதம் அதிகாரபூர்வமாகத் திறக்கப்படவுள்ள நிலையில் அதன் செயல்பாடுகளை மேம்படுத்துவதற்கு இந்தப் புரிந்துணர்வுக் குறிப்புகள் துணைபுரிகின்றன.