புதிய பங்காளித்துவத்தின் கீழ் ‘ஏஐ’ தொடக்க நிறுவனங்கள் வேகமாக வளர கூடுதல் ஆதரவு

மைக்ரோசாப்ட், என்டர்பிரைஸ் சிங்கப்பூர் அமைப்பு, சிங்கப்பூர் தேசிய பல்கலைக்கழகத்தின் (என்யுஎஸ்) தொழில்முனைவோர் பிரிவு ஆகியவற்றுக்கு இடையேயான புதிய கூட்டணி உருவாகியுள்ளது.

இதன் மூலம் சிங்கப்பூரில் உள்ள புதிதாக தொழில் தொடங்கும் செயற்கை நுண்ணறிவு (ஏஐ) நிறுவனங்கள் இந்த வட்டாரத்திலும் உலக அளவிலும் விரைவாக வளர உதவி கிடைக்கும்.

சிங்கப்பூரின் கருத்துகளை உலகிற்கு எடுத்துச் செல்லும் பங்காளித்துவங்களை உருவாக்கும் சிங்கப்பூர் திட்டத்தின் ஒரு பகுதி இது என்று துணைப் பிரதமர் கான் கிம் யோங் தெரிவித்தார்.

புதன்கிழமை (அக்டோபர் 29) அன்று துணைப் பிரதமர் அறிவித்த புதிய பங்காளித்துவம், மைக்ரோசாப்ட் மற்றும் என்யுஎஸ் என்டர்பிரைஸின் ‘புளோக் 71’ எனும் புதிதாகத் தொழில் தொடங்கும் மையத்தால் நடத்தப்படும் தற்போதைய ‘ஏஐ ஆக்சிலரேட்’ திட்டத்தை விரிவுபடுத்தும்.

இந்த விரிவாக்கத்துடன், இது சந்தைக்குச் செல்லும் பாதையை உள்ளடக்கும். அங்கு மைக்ரோசாப்ட் நிபுணர்கள் தொடக்க நிறுவனங்களுக்கு வட்டார மற்றும் உலகளாவிய சந்தைகளில் மிகவும் திறம்பட அளவிட உதவும் நடைமுறை வழிகாட்டுதலை வழங்குவார்கள்.

“இந்த தொடக்க நிறுவனங்கள் தயாரிப்புகளுக்கான சந்தை தேவை, தொழில்நுட்ப மேம்பாடு மற்றும் சந்தை அணுகல் ஆகியவற்றில் ஆதரவைப் பெறும். மைக்ரோசாப்டின் உலகளாவிய கட்டமைப்பைப் பயன்படுத்தும்,” என்று சிங்கப்பூர் புத்தாக்கம் மற்றும் தொழில்நுட்ப வாரம் (ஸ்விட்ச்) 2025 தொடக்கவிழாவில் திரு கான் கூறினார்.

நிச்சயமற்றதன்மைக்கு மத்தியில் நிலைத்தன்மையை வழங்கும் இடமாக சிங்கப்பூர் இருக்க வேண்டும் என்றும் ஆசியாவின் வளர்ச்சி சந்தைகளை உலகின் பிற பகுதிகளுடன் இணைக்கும் மையமாக இருக்கவேண்டும் என்றும் உலகளாவிய சவால்களை எதிர்கொள்ள கருத்துகள், திறமை, மூலதனம் ஆகியவற்றை ஒருங்கிணைக்கும் தளமாக சிங்கப்பூர் இருக்கவேண்டும் என்றும் அவர் தனது உரையில் கூறினார்.

“இந்த நிலையை வலுப்படுத்த, அறிவியல் மற்றும் தொழில்நுட்பத்தில் தொடர்ந்து முதலீடு செய்வோம். ஆராய்ச்சியை நிறுவனமாக மாற்றுவதை விரைவுபடுத்துவோம். சிங்கப்பூரின் கருத்துகளை உலகிற்கு எடுத்துச் செல்லும் பங்காளித்துவங்களை உருவாக்குவோம்,” என்று வர்த்தக, தொழில் அமைச்சருமான திரு கான் குறிப்பிட்டார்.

தொடர்புடைய செய்திகள்

தன்னாட்சி ஏஐ அமைப்புகளுக்கு முன்னெச்சரிக்கையான கூட்டு அணுகுமுறை

மேலும், என்டர்பிரைஸ் சிங்கப்பூர் அமைப்பு தனது உலகளாவிய கண்டுபிடிப்பு கூட்டணி உத்தியை மேம்படுத்தியுள்ளது என்றும் அவர் அறிவித்தார். இதன் மூலம், ஆயத்தநிலை தயாரிப்புகள் மற்றும் ஆரம்ப சந்தை ஈர்ப்பைக் கொண்ட தொடக்க நிறுவனங்கள், விரிவாக்கப்பட்ட பங்குதாரர்களின் கட்டமைப்பு மூலம் வர்த்தக, முதலீட்டு வாய்ப்புகளுக்கான வலுவான இணைப்புகளிலிருந்து பயனடையும்.