அனைத்துக் கட்டுமானத் திட்டங்களுக்கும் உதவி வேண்டும்: சிங்கப்பூர் ஒப்பந்ததாரர் சங்கம்

சிங்கப்பூர்ப் பொதுத் துறையிலும் தனியார்த் துறையிலும் உள்ள திட்டங்களைச் செயல்படுத்தும் கட்டுமான ஒப்பந்ததாரர்களுக்கு அரசாங்கத்தின் உதவி தேவை என்று சிங்கப்பூர் ஒப்பந்ததாரர் சங்கம் கேட்டுக்கொண்டுள்ளது.

உலக அளவில் எரிபொருள் விலைகள் அண்மை வாரங்களில் 200 விழுக்காட்டுக்கும்மேல் கூடிவிட்டதைச் சங்கம் சுட்டியது.

முக்கியமான பொதுத் துறைத் திட்டங்களுக்கு மட்டுமின்றி, தனியார் துறைத் திட்டங்களுக்கும் உதவிசெய்யும்படி அரசாங்கத்துடன் கலந்துரையாடி இருப்பதாய் சங்கத்தின் தலைவர் லீ கேய் சாய் கூறினார்.

ஒட்டுமொத்தக் கட்டுமானச் செலவுகளில் 15 விழுக்காட்டிலிருந்து 25 விழுக்காடுவரை எரிபொருள் தொடர்பானவற்றுக்குச் செலவாகிறது என்று திரு லீ கூறினார்.

ஒவ்வொரு கட்டுமானத் திட்டத்தையும் பொறுத்துச் சில நேரங்களில் எரிபொருளுக்குக் கூடுதலாகச் செலவு செய்யவேண்டியிருப்பதையும் அவர் சுட்டினார்.

அதையொட்டி, எரிபொருள் செலவினத்துடன் நேரடியாகத் தொடர்புடைய விலை ஏற்றத்தைக் கட்டுமானக் ஒப்பந்ததாரர்களுடன் அரசாங்கம் பகிர்ந்துகொள்ளும் என்று நிதிக்கான மூத்த துணையமைச்சர் ஜெஃப்ரி சியாவ் நாடாளுமன்றத்தில் தெரிவித்தார்.

முக்கிய பொதுத் திட்டங்களுக்குப் பயன்படுத்தப்படும் டீசல், நிலக்கீல் (bitumen) போன்றவற்றை வாங்குவதற்குச் செய்யப்படும் கூடுதல் செலவுகளில் பாதியை அரசாங்கம் ஏற்றுக்கொள்ளும் என்றார் அவர்.

குறுக்குத் தீவு ரயில் பாதை, கழக வீடுகளின் கட்டுமானத் திட்டங்கள் ஆகியவை அவற்றுள் அடங்கும்.

அதையடுத்து கட்டட, கட்டுமான ஆணையம் அறிக்கை ஒன்றை வெளியிட்டது. அதில் அரசாங்க உதவி நான்கு விதமான கட்டுமானப் பணிகளுக்குப் பயன்படுத்தப்படும் என்று ஆணையம் குறிப்பிட்டது.

நில அகழ்வுப் பணிகள், அடித்தளம் அல்லது நிலத்தடிப் பணிகள், சாலைப் பணிகள், நில மீட்புப் பணிகள் ஆகியவற்றுக்கு அரசாங்கத்தின் உதவி பயன்படுத்தப்படும்.

அதிகரித்துள்ள எண்ணெய் விலையால் இத்தகைய கட்டுமானப் பணிகளே ஆகக் கடுமையாகப் பாதிக்கப்பட்டுள்ளதாக ஆணையம் குறிப்பிட்டது.

இத்தகைய பணிகளுக்கும் டீசலில் இயங்கும் இயந்திரங்களும் வாகனங்களும் அதிகம் பயன்படுத்தப்படுவதாகவும் ஆணையம் சுட்டியது.