சிங்கப்பூருக்குள் கள்ளத்தனமாக நுழைய உதவிய ஆடவர்மீது வழக்கு

சிங்கப்பூருக்குள் கள்ளத்தனமாக நுழைய உதவி செய்ததாக ஆடவர்மீது குற்றஞ்‌‌சாட்டப்பட்டுள்ளது.

இந்தோனீசியரான 23 வயது ஃபெப்ரி இஸ்வாந்தோ, வெளிநாட்டுப் பதிவு எண் கொண்ட படகுமூலம் மூன்று பேர் சிங்கப்பூருக்குள் கள்ளத்தனமாக நுழைய உதவிசெய்தார். படகில் இணைக்கப்பட்ட இழுவைப்படகில் அந்த மூவரும் மறைந்திருந்தனர்.

படகில் இருந்த எட்டு ஊழியர்களும் கைது செய்யப்பட்டனர். அவர்கள் அனைவரும் வெளிநாட்டவர்கள், இஸ்வாந்தோமீது செவ்வாய்க்கிழமை (நவம்பர் 11) நீதிமன்றத்தில் குற்றஞ்சாட்டப்பட்டது.

கடந்த ஞாயிற்றுக்கிழமை (நவம்பர் 9) புலாவ் பொங்கோல் முனையத்தில் கடலோரக் காவற்படை அதிகாரிகள் நடத்திய சோதனையின்போது அவர்கள் அனைவரும் பிடிபட்டனர்.

அப்போது நடத்தப்பட்ட விசாரணையில் இஸ்வாந்தோ அக்டோபர் மாதம் 26ஆம் தேதி சிங்கப்பூருக்குள் மூவரைக் கள்ளத்தனமாகக் கொண்டுவந்தது தெரியவந்தது.

தற்போது இஸ்வாந்தோ தடுத்துவைக்கப்பட்டுள்ளார். அவர்மீதான வழக்கு நவம்பர் 18ஆம் தேதி நீதிமன்ற விசாரணைக்கு வரும் என்று தெரிவிக்கப்பட்டது.

சட்டவிரோத நடவடிக்கைக்குப் பயன்படுத்தப்பட்ட படகும் அதனுள் இருந்த இழுவைப்படகும் பறிமுதல் செய்யப்பட்டன. படகில் இருந்த மற்ற ஏழு ஊழியர்களிடமும் விசாரணை தொடர்கிறது.

இஸ்வாந்தோமீதான குற்றச்சாட்டுகள் நிரூபிக்கப்பட்டால் அவருக்கு இரண்டு ஆண்டுகள் வரையிலான சிறைத் தண்டனை விதிக்கப்படும். மேலும் அவருக்குக் குறைந்தது மூன்று பிரம்படிகளும் விதிக்கப்படும்.