மாணவர் முரசு
இ-பேப்பர்
வீடமைப்பு வளர்ச்சிக் கழக (வீவக) புளோக் ஒன்றின் 10வது தளத்தின் விளிம்பில் ஒரு பூனை கிட்டத்தட்ட 15 மணிநேரம் சிக்கியிருக்கிறது.
இச்சம்பவம் புக்கிட் பாத்தோக் வெஸ்ட்டில் செவ்வாய்க்கிழமை (நவம்பர் 18) நிகழ்ந்தது. இதுகுறித்து தேசிய பூங்காக் கழகம் விசாரணை நடத்தி வருகிறது.
புக்கிட் பாத்தோக் வெஸ்ட் அவென்யூ 8ல் உள்ள வீவக புளோக் 465Aல் பூனை சிக்கியிருந்ததை செவ்வாய்க்கிழமை அதிகாலை 1 மணிக்கு டபித்தா தாம்ப்சன் எனும் 28 வயது மாது கண்டிருக்கிறார். அந்த 10வது தள விளிம்பிலிருந்து ஒரு விலங்கு ஒன்று வேதனையில் அலறும் சத்தம் அவருக்குக் கேட்டது.
செவ்வாய்க்கிழமை பிற்பகல் 3.50 மணிக்கு சற்று முன்பு அந்தப் பூனை மீட்கப்பட்டு அதன் உரிமையாளரிடம் ஒப்படைக்கப்பட்டது.
பொதுமக்களில் ஒருவர் பூனையை மீட்க முயற்சி செய்தபோது குடியிருப்பாளர் ஒருவரின் வீட்டுக்குள் நுழைந்து பூனையை மீட்க ஏற்பாடுகள் செய்யப்பட்டதாக ஸ்ட்ரெய்டஸ் டைம்சின் கேள்விகளுக்கு, தேசிய பூங்காக் கழகக் குழுமத்தின் அமலாக்க, விசாரணைப் பிரிவு இயக்குநர் ஜெசிக்கா குவோக் தெரிவித்தார்.
“விலங்கு நலன் தொடர்பிலான எல்லா விவகாரங்களையும் தேசிய பூங்காக் கழகம் மிகுந்த அக்கறையுடன் கருத்தில்கொள்ளும். விசாரணை தொடர்கிறது,” என்று அவர் கூறினார்.
சம்பந்தப்பட்ட பூனையின் உரிமையாளர்கள் புளோக்கின் 11வது தளத்தில் வசிக்கின்றனர். இரு நாள்களாக அவர்கள் வீட்டில் இல்லை. வீட்டின் சன்னல்கள் சற்று திறந்து காணப்பட்டதாக திருவாட்டி தாம்ப்சன், ஸ்ட்ரெய்ட்ஸ் டைம்சிடம் தெரிவித்தார்.
பூனையின் நலனில் அக்கறை கொண்ட அக்கம்பக்கத்தினர் உள்ளிட்ட பலர் புளோக்கின் கீழும் அங்குள்ள குப்பைத் தோம்பின் மேலும் மெத்தைகளைப் போட்டனர்.
