பெண்ணை ஆபாசப் படமெடுத்ததாக மருத்துவர்மீதான குற்றச்சாட்டு நிரூபணம்

செங்காங் பொது மருத்துவமனையில் மருத்துவராகப் பணிபுரிந்த 34 வயது ஜோனத்தன் சோ ஜிங்யாவ்மீது பெண் ஒருவரை ஆபாசமாகப் படமெடுத்ததாகக் குற்றச்சாட்டு சுமத்தப்பட்டிருந்தது.

அவ்வழக்கில் அவர் குற்றவாளி என நீதிமன்றம் நவம்பர் 13ஆம் தேதி தீர்ப்பளித்தது.

டிசம்பர் 15ஆம் தேதி, அவருக்குத் தண்டனை வழங்கப்படும் என எதிர்பார்க்கப்படுகிறது.

2024ஆம் ஆண்டு ஏப்ரல் 14ஆம் தேதி, பெண் ஒருவர் அடுக்குமாடி குடியிருப்பு ஒன்றின் சமையலறைக்கு அருகிலுள்ள கழிவறையில் குளித்தபோது, அவரைத் தனது கைப்பேசி வழியாகப் படமெடுத்ததாகக் கூறப்பட்டது.

தன்னை யாரோ படமெடுத்ததை உணர்ந்த மாது அந்த நபரை உடனடியாகச் சமையலறையைவிட்டு வெளியேறச் சொன்னார்.

தன்னைப் படமெடுத்த நபர் குறித்து அறிந்துகொள்ள அவ்வீட்டில் பொருத்தப்பட்டிருந்த காணொளிக் கருவியில் இருந்த படங்களை ஆய்வுசெய்தார்.

அதற்குள், சோ தனது கைப்பேசியிலிருந்த அந்தக் காணொளியை நீக்கிவிட்டு, பாதிக்கப்பட்ட மாதிடம் மன்னிப்பு கேட்டார்.

அந்த மாதை ஆபாசமாகப் படமெடுத்ததை அவர் ஒப்புக்கொண்டார்.

தொடர்புடைய செய்திகள்

சிறார் ஆபாசக் காணொளிகளுடன் பிடிபட்ட ஆடவருக்குச் சிறை, பிரம்படி

அந்தப் பெண்ணின் காதலர் அன்றைய தினமே காவல்துறைக்குத் தகவல் தெரிவித்தார்.

பாதிக்கப்பட்ட மாதுக்கும் சோக்கும் இடையே உள்ள உறவுமுறை குறித்து நீதிமன்ற அறிக்கையில் வெளியிடப்படவில்லை.