மாணவர் முரசு
இ-பேப்பர்
போதைப்பொருளைப் பெரும்பாலும் யாரும் விரும்பிப் பயன்படுத்தத் தொடங்குவதில்லை. பல நேரங்களில் பிறரின் தூண்டுதலால் அந்தப் பழக்கம் தொடங்குகிறது.
பிள்ளைகள் செவியுறுபவை, இணையத்தில் காண்பவை, அவற்றைப் பற்றி வேறு யாரும் உரிய வகையில் விளக்கிப் பேசாதபோது தாங்களாகவே தவறாகப் புரிந்துகொள்பவை ஆகியவையும் அந்தத் தூண்டுதல்களில் அடங்கும்.
உலகில் ஆகக் குறைந்த அளவில் போதைப்பொருள் புழங்கப்படும் நாடுகளில் சிங்கப்பூரும் ஒன்று.
ஆனால், அதற்காக மெத்தனத்துடன் இருக்கலாகாது. போதைப்பொருள் குறித்த இளையரின் கண்ணோட்டம், பெரியவர்கள் என்ற முறையில் நாம் அதை எவ்வாறு கையாள்கிறோம் என்பதில் கவனம் செலுத்தவேண்டும்.
2024ல் வெளிவந்த மத்திய போதைப்பொருள் ஒழிப்புப் பிரிவின் அறிக்கையின்படி, கைது செய்யப்பட்ட புதிய போதைப்புழங்கிகளில் 52 விழுக்காட்டினர், 30 வயதுக்கும் குறைவானவர்கள். அவர்களில் ஆக இளையருக்கு 13 வயது.
போதைப்பொருளுக்கு எதிரான தேசிய மன்றம் 2023ல் வெளியிட்ட கண்ணோட்டக் கருத்தாய்வின்படி, போதைப்பொருள் குறித்த இளையர்களின் எண்ணப்போக்கு, அதற்கு இடங்கொடுக்கலாம் என்ற ரீதியில் இருப்பதாகத் தெரியவந்துள்ளது.
கருத்தாய்வில் கலந்துகொண்ட இளையர்களில் 79 விழுக்காட்டினர், கஞ்சா தடை செய்யப்பட வேண்டும் என்று கருதுகின்றனர். இவ்வாறு நினைக்கும் பெரியவர்களின் விகிதம், 96 விழுக்காடு.
இந்த மாற்றங்கள், பரந்த உலகப் போக்குகளைப் பிரதிபலிக்கின்றன. ஐக்கிய நாடுகளின் 2025ஆம் ஆண்டுக்கான உலக போதைப்பொருள் அறிக்கையில் கடந்த ஆண்டில் மட்டும் 316 மில்லியன் பேர் போதைப் பொருள்களைப் பயன்படுத்துவதாகக் கூறப்பட்டுள்ளது. போதைப்பொருள் புழக்கம் வெகுவாக அதிகரித்துவரும் கவலைக்குரிய போக்கினை இது காட்டுகிறது.
தொடர்புடைய செய்திகள்
உலக மக்கள் தொகை அதிகரிப்பை போதைப்பொருள் புழக்கத்தில் பதிவான அதிகரிப்பு விஞ்சியுள்ளதாக அறிக்கை குறிப்பிடுகிறது.
போதைப் பொருள் புழங்கும் இளையர்கள், பிற்காலத்தில் பல்வேறு உடல்நலச் சீர்கேடுகளுக்கு ஆளாகின்றனர்.
போதைப்பொருளுக்கு ஆதரவான தகவல்கள் இணையத்திலும் புகழ்பெற்ற ஊடகங்களிலும் அதிகரித்து வருகையில் இது கவலைக்குரிய அம்சமாகும்.
அத்தகைய தகவல்கள், இளையர்களின் மனப்போக்கைத் தகவமைப்பதுடன் ஆபத்துகளைக் குறைத்துக் காட்டுகின்றன.
சிங்கப்பூரின் போதைப்பொருள் கட்டுப்பாட்டுக்கான உத்திபூர்வ அணுகுமுறையில் சட்ட நடவடிக்கை தொடர்ந்து முக்கியப் பங்கு வகிக்கிறது. இருந்தபோதும், தடுப்பு நடவடிக்கையை வெகு முன்கூட்டியே நாம் தொடங்க வேண்டும். அது வீட்டிலிருந்து தொடங்க வேண்டும்.
போதைப்பொருள் பற்றி பெற்றோருடன் கலந்துரையாடும் இளையர்கள், அவற்றைப் புழங்கத் தயங்குவதாகக் கருத்தாய்வு கூறுகிறது.
அணுக்கமான நல்லுறவுகள், அரசாங்க இயக்கங்களையும் விதிமுறைகளையும்விட நல்ல தாக்கத்தை ஏற்படுத்த வல்லவை என்பதை இது காட்டுகிறது.
எச்சரிக்கைகளையும் புள்ளிவிவரங்களையும் எடுத்துக்கூறும் நம்பிக்கைக்குரியவர்களின் அக்கறையும் வழிகாட்டுதலும் இளையர்களிடம் தாக்கத்தை ஏற்படுத்துகிறது.
இத்தகைய கேள்விகளை எப்படித் தொடங்குவது, எப்போது தொடங்குவது என்பது குறித்துத் தெளிவாகத் தெரியவில்லை என்று பெற்றோர் பலர், மன்ற உறுப்பினர்களிடம் தெரிவிக்கின்றனர்.
போதைப்பொருள் புழக்கம் போன்ற கடினமான தலைப்புகளில் உரையாடல் தொடங்க பெற்றோர் சிரமப்படக்கூடும் என்று மன்ற உறுப்பினர் ரவீந்திரன் நாகலிங்கம், பல்வேறு கலந்துரையாடல்களிலும் கருத்தரங்குகளிலும் பேசிய அனுபவத்தில் தெரிவிக்கிறார்.
இதனால், வெளிப்படையான, நேர்மையான கலந்துரையாடல்களின் வாயிலாகத் தங்கள் பிள்ளைகளுக்கு வழிகாட்ட பெற்றோர்க்குத் தன்னம்பிக்கை அளிக்கும் முயற்சிக்கு, போதைப்பொருளுக்கு எதிரான தேசிய மன்றம் தொடர்ந்து ஆதரவு அளிக்கிறது.
நலம் விசாரிப்பது, ஏதேனும் செய்தி பற்றிப் பேசுவது, அண்மைய நடவடிக்கை ஒன்று பற்றிக் கேட்பது எனப் பேச்சைத் தொடங்கலாம். இத்தகைய தருணங்களின் வழியாகப் பிள்ளைகளிடையே தன்னம்பிக்கையும் மீள்திறனும் வளர்கின்றன.
தாங்கள் தனித்துவிடப்படவில்லை என இளையர்களுக்கு இத்தருணங்கள் நினைவூட்டுகின்றன. இந்த விவகாரங்கள் பற்றிய விழிப்புணர்வை அதிகரிக்க எங்கள் மன்ற உறுப்பினர்கள், தேசிய உரையாடல்களில் பங்கேற்றுள்ளனர்.
எடுத்துக்காட்டாக, மிக இளம் வயதிலிருந்தே பெற்றோர்க்கும் பிள்ளைகளுக்கும் இடையே கலந்துரையாடல் தொடங்க வேண்டும் என்பதை எடுத்துரைக்க டாக்டர் ஏட்ரியன் லோ, தேசிய வலையொளிக் கலந்துரையாடலில் பங்கேற்றார். பிள்ளைகளின் வளர்ச்சிக்கேற்ப அந்தக் கலந்துரையாடல்களும் உருமாறி மேன்மை பெறவேண்டும் என்றும் அவர் அதில் கூறினார்.
இளையர்கள் பிறரால் எடை போடப்பட்டு, அலட்சியத்திற்கு ஆளாவதற்குப் பதிலாக ஆதரவு, வழிகாட்டுதலுடன் பிறரால் செவிமடுக்கப்படும் நிலையில் இருக்க வேண்டும்.
இளையர் தினம் நெருங்கிவரும் வேளையில் தடுப்பு நடவடிக்கை என்பது கொள்கைகள் சார்ந்ததன்று; மக்கள் சார்ந்தது என்பதை நினைவில் கொள்ளவேண்டும்.
குடும்பங்கள் இத்தகைய முக்கியமான கலந்துரையாடலில் ஈடுபடுவதற்கு ஆதரவான வளங்களை வழங்க இம்மன்றம், சமூகப் பங்காளிகளுடன் இணைந்து செயல்படுகிறது. இளையர்களின் பார்வைகளை மேலும் அறிந்துகொள்ள ஆய்வில் முதலீடு செய்து வருகிறோம்.