விரிவாக்கப்பட்டுள்ள மரினா பே சொகுசுக் கப்பல் முனையம்

புதுப்பிக்கப்பட்டு விரிவுபடுத்தப்பட்டுள்ள மரினா பே சொகுக் கப்பல் முனையத்தில் (எம்பிசிசிஎஸ்) இப்போது 70 சாவடிகளைக் கொண்ட புதிய பயணப் பதிவகம், பேருந்துகள், டாக்சிகள் போன்றவற்றுக்கான தனித் தனித் தடங்களைக் கொண்ட போக்குவரத்து வளாகம் ஆகிய வசதிகள் இடம்பெறுகின்றன.

எம்பிசிசிஎஸ்சில் 40 மில்லியன் வெள்ளி மதிப்பில் மேற்கொள்ளப்பட்ட புதுப்பிப்புப் பணிகள் இம்மாதம் நிறைவடைந்தன. அதனைத் தொடர்ந்து முனையத்தின் பயணிகள் கொள்ளளவு 6,800லிருந்து 11,700க்கு அதிகரித்துள்ளது.

சொகுசுக் கப்பல் பயணங்களுக்கான தேவை அதிகரித்ததால் அதற்கு ஈடுகொடுக்கப் புதுப்பிப்புப் பணிகள் மேற்கொள்ளப்பட்டதென எம்பிசிசிஎஸ்சை நடத்தும் சேட்ஸ்-கிரியர்ஸ் குரூஸ் சர்விசஸ் (Sats-Creuers Cruise Services) நிறுவனமும் சிங்கப்பூர்ப் பயணத்துறைக் கழகமும் புதன்கிழமை (அக்டோபர் 29) தெரிவித்தன.

புதுப்பிக்கப்பட்ட எம்பிசிசிஎஸ்சின் பரப்பளவு 36,000 சதுர மீட்டர். இது, ஐந்து காற்பந்துத் திடல்களின் ஒட்டுமொத்த பரப்பளவுக்குச் சமமாகும்.

இனி இந்த முனையத்தால் கூடுதல் பயணிகளை ஏற்றக்கூடிய மேலும் பெரிய கப்பல்களைக் கையாள முடியும் என்றார் அதன் செயல்பாட்டு நிர்வாகி கிறிஸ்டஃபர் பெனடிக்ட் சார்லி. இம்மாதம் 23ஆம் தேதி முனையத்தை ஊடகங்களுக்கு சுற்றிக் காட்டும்போது அவர் இதனைத் தெரிவித்தார்.

கப்பல்கள் மேலும் பெரிதாகி வருவதாக அவர் குறிப்பிட்டார். சிலவற்றில் 5,000க்கும் அதிகமானோர் இருப்பதாகவும் அவர் சுட்டினார்.

மேலும் ஒரு பதிவகம் அமைக்கப்பட்டிருப்பது, கூட்ட நெரிசலைக் குறைத்து நடைமுறைகளைச் சீராக்கியிருப்பதாக திரு சார்லி சொன்னார். குறிப்பாக இரண்டு கப்பல்கள் ஒரே நேரத்தில் வந்தடையும் சூழலுக்கு இது பொருந்தும் என்று அவர் விளக்கமளித்தார்.

முனையத்தின் முதல் தளத்தில் அமைந்துள்ள புதிய பயணப் பதிவகத்தில் 70 சாவடிகளும் 500க்கும் மேற்பட்ட இருக்கைகளும் இருக்கின்றன. கூடுதல் சொகுசுப் பிரிவுப் பயணிகளுக்கான (விஐபி) இளைப்பாறும் கூடமும் இங்கு அமைந்துள்ளது.

தொடர்புடைய செய்திகள்

சிங்கப்பூரில் மாபெரும் சொகுசுக் கப்பல்

சிங்கப்பூரில் டிஸ்னியின் சொகுசுக் கப்பல் சேவை தொடங்குவதில் தாமதம்

இதுவரை செயல்பாட்டில் இருந்து வரும் பயணப் பதிவகத்தில் 135 சாவடிகளும் சுமார் 2,000 இருக்கைகளும் உள்ளன.