விரைவுச்சாலையில் கார் கவிழ்ந்து விபத்து

தெம்பனிஸ் விரைவுச்சாலையில் சென்றுகொண்டிருந்த கார் ஒன்று சாலைத் தடுப்புகள்மீது மோதி சிலேத்தார் விரைவுச்சாலைக்குள் புகுந்து விபத்துக்குள்ளானது.

இச்சம்பவம் புதன்கிழமை (ஏப்ரல் 30) மாலை இயோ சூ காங் வெளிவழி அருகே நிகழ்ந்தது. கார் சாலைத் தடுப்புகள்மீது மோதியதில் கவிழ்ந்தது.

இந்த மோசமான விபத்தில் அதிர்ஷ்டவசமாக கார் ஓட்டுநர் சிறு காயங்களுடன் உயிர் தப்பினார்.

காயம் சிறியதாக இருந்ததால் கார் ஓட்டுநர் மருத்துவமனை செல்ல மறுத்துவிட்டதாக சிங்கப்பூர் குடிமைத் தற்காப்பு படை அதிகாரிகள் ஸ்ட்ரெய்ட்ஸ் டைம்சிடம் தெரிவித்தனர்.

விபத்து தொடர்பாகத் தங்களுக்கு இரவு 7.05 மணிவாக்கில் தகவல் வந்ததாக அவர்கள் குறிப்பிட்டனர்.

கார் ஓட்டுநர் 28 வயது ஆடவர் என்றும் தற்போது அவர் விசாரணை தொடர்பாக உதவி வருகிறார் என்றும் அதிகாரிகள் தெரிவித்தனர்.

விபத்து தொடர்பான காணொளிகள் சமூக ஊடகங்களில் பரவி வருகின்றன.