முன் எப்போதும் இல்லாத நிலையின்மையை எதிர்கொள்கிறோம்: மூத்த அமைச்சர் லீ

சிங்கப்பூர், இதற்கு முன்பு பல நெருக்கடிநிலைகளைச் சந்தித்து அவற்றின் மூலம் ஏற்பட்ட சவால்களை முறியடித்திருப்பதை திங்கட்கிழமை (ஏப்ரல் 14) நடைபெற்ற நிகழ்வு ஒன்றில் மூத்த அமைச்சர் லீ சியன் லூங் சுட்டினார்.

ஆனால், அமெரிக்க அதிபர் டோனல்ட் டிரம்ப்பின் அண்மைய வரிவிதிப்பு உலகளாவிய நிலையில் முன் எப்போதும் இல்லாத நிலையின்மையை ஏற்படுத்தியிருப்பதாகவும் இந்நிலை நீண்டகாலத்துக்கு நீடிக்கும் என்றும் அவர் எச்சரிக்கை விடுத்துள்ளார்.

ஆதரவுமிக்க, நிலையான வெளிப்புறச் சூழல் என்றென்றும் இருக்கும் என்று இனி உறுதியாகச் சொல்லிவிட முடியாது என்று திரு லீ வலியுறுத்தினார்.

இதுகுறித்து தேசிய தொழிற்சங்க காங்கிரஸ் (என்டியுசி) கலந்துரையாடலில் மூத்த அமைச்சர் லீ உரையாற்றினார்.

கலந்துரையாடலில் என்டியுசி தலைவர் கே. தனலட்சுமி, என்டியுசி தலைமைச் செயலாளர் இங் சீ மெங் உட்பட கிட்டத்தட்ட 500 தொழிற்சங்கத் தலைவர்கள் கலந்துகொண்டனர்.

“அமெரிக்க வரிவிதிப்பு குறித்து வீணாகக் கவலைப்படத் தேவையில்லை என்றும் சிறிய விஷயத்தைப் பெரிதாக்க வேண்டாம் என்றும் சிலர் கூறுகின்றனர். இதற்கு முன்பு, சிங்கப்பூர் மேலும் கடுமையான சவால்களைக் கடந்து வந்திருப்பதே அவர்களது வாதம் ஆகும். சிங்கப்பூர் தோல்வி அடைந்ததில்லை என்கின்றனர்,” என்றார் திரு லீ.

“அமெரிக்க வரிவிதிப்பால் ஏற்படும் சவால்களை சிங்கப்பூர் எதிர்கொள்ள வேண்டும். அக்கறையுடன் செயல்பட வேண்டும். வரிவிதிப்பால் ஏற்படக்கூடிய தாக்கங்களைப் புரிந்துகொள்ள வேண்டும். இதனால் சிங்கப்பூருக்கு எத்தகைய பாதிப்பு ஏற்படலாம் என்பதை தெரிந்துகொள்ள வேண்டும். இதற்கு முன் நிகழ்ந்திடாத, வித்தியாசமான, மிக முக்கியமான விவகாரம் தலைதூக்கியுள்ளது,” என்று திரு லீ அறிவுறுத்தினார்.

“அமெரிக்க வரிவிதிப்பால் ஏற்படக்கூடிய பிரச்சினைகள் பற்றியும் அதன் காரணமாக என்னென்ன தாக்கங்கள் ஏற்படக்கூடும் என்பது தொடர்பாகவும் சிங்கப்பூரர்கள் நன்கு புரிந்து வைத்திருப்பர் என்று நம்புகிறேன். நமது எதிர்காலத்தைப் பாதுகாக்க ஒன்றிணைந்து மேற்கொள்ள வேண்டிய நடவடிக்கைகள் தொடர்பாகவும் சிங்கப்பூரர்கள் தெளிவாக இருக்க வேண்டியது மிகவும் அவசியம்,” என்றார் திரு லீ.

தொடர்புடைய செய்திகள்

நிச்சயமற்ற சூழலில் மக்கள் ஒரு குழுவாகப் பணியாற்ற வேண்டும்: லீ சியன் லூங்

இவ்வளவு காலமாக செயல்பாட்டில் இருந்துவரும் உலகளாவிய வர்த்தக முறையை சிங்கப்பூர் தொடர்ந்து நம்பிகொண்டிருக்க முடியாது என்று மூத்த அமைச்சர் லீ கூறினார்.

அமெரிக்க வரிவிதிப்பால் ஏற்படக்கூடிய தாக்கங்களைக் கருத்தில்கொண்டு சிங்கப்பூரின் 2025ஆம் ஆண்டுக்கான பொருளியல் வளர்ச்சி 1-3 விழுக்காட்டிலிருந்து 0-2 விழுக்காடாகக் குறைக்கப்பட்டுள்ளது.

பொருளியல் நெருக்கடிநிலை ஏற்படாது என்று தாம் நம்பும்போதிலும் அத்தகைய சூழல் ஏற்படுவதற்கான சாத்தியம் உள்ளதாகவும் அவர் கூறினார்.