ஃபேர்பிரைஸ் குழுமத்தின் வருடாந்தர பாடப்புத்தக நன்கொடைத் திரட்டு தொடக்கம்

ஃபேர்பிரைஸ் குழுமத்தின் வருடாந்தர ‘ஷேர் எ டெக்ஸ்ட் புக்’ (Share-A-Textbook) பாடப்புத்தக நன்கொடைத் திரட்டு தொடங்கியுள்ளது.

43வது ஆண்டாக நடைபெறும் இந்த நன்கொடைத் திரட்டு வசதிகுறைந்த மாணவர்களுக்கு ஆதரவு வழங்கும் நோக்கம் கொண்டது. அத்தகைய மாணவர்களுக்குப் புதிய கல்வி ஆண்டிற்கான அத்தியாவசியப் பொருள்களை வழங்குவது அதன் இலக்கு.

இதன்கீழ் பொதுமக்கள் அடுத்த இரண்டு வாரங்களுக்கு, பயன்படுத்தப்பட்ட பாடப்புத்தகங்களை ஃபேர்பிரைஸ் எக்ஸ்ட்ரா பெரும் பேரங்காடிகளில் வழங்கலாம்.

பாடப்புத்தகங்கள் கல்வி அமைச்சின் அங்கீகாரம் பெற்றவையாக இருக்கவேண்டும். தீவெங்கும் உள்ள ஒன்பது ஃபேர்பிரைஸ் எக்ஸ்ட்ரா கடைகளில் நவம்பர் 13 முதல் 26ஆம் தேதி வரை அவற்றை வழங்கலாம்.

அங் மோ கியோ நடுவம், ஹவ்காங் ஒன், விவோசிட்டி, சாங்கி வர்த்தகப் பூங்கா, நெக்ஸ், பார்க்வே பரேட், விளையாட்டு நடுவம், ஜூரோங் ஈஸ்ட் மால் கடைத்தொகுதி, ஜூரோங் பாயின்ட் ஆகியவற்றில் அந்தக் கடைகள் அமைந்துள்ளன.

ஈசூனில் அமைந்திருக்கும் ‘ஸு சி’ மனிதநேய இளையர் நிலையத்திலும் (Tzu Chi Humanistic Youth Centre) பாடப்புத்தகங்களை நன்கொடையாக அளிக்கலாம். ஃபேர்பிரைஸ் குழுமத்தின் சமூகத் தொண்டூழியர்களும் நிறுவனப் பங்காளிகளும் அவற்றை விநியோகத்திற்கு ஏற்ப பிரிப்பர். பின்னர் டிசம்பர் 5, 6ஆம் தேதிகளில் அவை விநியோகிக்கப்படும்.

1982ஆம் ஆண்டு தொடங்கப்பட்டது முதல் இதுவரை இந்த நன்கொடைத் திரட்டின்கீழ் கிட்டத்தட்ட 300,000 மாணவர்களுக்கு ஏழு மில்லியனுக்கும் அதிகமான பயன்படுத்தப்பட்ட பாடப்புத்தகங்கள் நன்கொடையாக வழங்கப்பட்டுள்ளன.