தேசிய சேவையை வலுப்படுத்துதல் சிங்கப்பூரின் அடுத்த கட்ட திட்டங்களில் ஒன்று

மாறிவரும் உலகில் சிங்கப்பூரின் இடத்தைப் பாதுகாக்க, அரசாங்கம் தேசிய சேவையை வலுப்படுத்தும். அத்துடன் பிற நாடுகளுடன் பங்காளித்துவத்தை விரிவுபடுத்துவதுடன் அதன் தேசியப் பாதுகாப்பு திறன்களையும் மேம்படுத்தும்.

இவை சிங்கப்பூரின் தற்காப்பு அமைச்சின் திட்டங்களின் ஒரு பகுதியாகும். நாடாளுமன்றத்தின் தொடக்க நிகழ்ச்சியில் அதிபர் தர்மன் சண்முகரத்னம் ஆற்றிய உரையுடன் அமைச்சுகளின் பிற்சேர்க்கை அறிக்கைகள் செப்டம்பர் 15ஆம் தேதி வெளியிடப்பட்டன.

செப்டம்பர் 5ஆம் தேதி தமது உரையில், திரு தர்மன், “நாட்டைப் பாதுகாப்பதும் உலகில் அதன் இடத்தைப் பாதுகாப்பதும் சிங்கப்பூரின் முதல் முன்னுரிமை. குறிப்பாக இந்த வட்டாரத்திலும் உலக அளவிலும் பதற்றங்கள் திடீரென வெடிக்கக்கூடிய ஒரு சூழ்நிலையில் சிங்கப்பூரின் பாதுகாப்பை ஒருபோதும் அலட்சியப்படுத்த முடியாது,” என்றும் கூறினார்.

சிங்கப்பூர் ஆயுதப் படை தனது சேவைப் பணியாளர்களை மிகவும் திறம்பட பணியமர்த்தும். அவர்களின் பலங்களை நிறைவுசெய்து அதிகமான தொழில்நுட்பங்களை ஏற்றுக்கொள்ளும். இது அதன் மருத்துவ வகைப்பாட்டு முறையை மேம்படுத்தும், தொழில்கள் மற்றும் பங்களிப்புகளை மறுவடிவமைக்கும்.

செயல்பாட்டுக்குத் தயாராக உள்ள தேசிய சேவை வீரர்கள் தங்கள் குடிமை நிபுணத்துவத்தைப் பயன்படுத்த அதிக வாய்ப்புகள் வழங்கப்படும் என்று தற்காப்பு அமைச்சர் சான் சுன் சிங் கூறினார்.

தொழில்நுட்பத்தில் முன்னேற்றங்கள், (குறிப்பாக குறைந்த விலை, ஆளில்லா மற்றும் இரட்டை பயன்பாட்டு அமைப்புகள்) போரை மறுவரையறை செய்து வருவதால், புதிய திறன்களின் வளர்ச்சியை இயக்க தற்காப்பு அமைச்சு புதிய கட்டமைப்புகளை நிறுவும். குறிப்பாக, மேம்பட்ட இணையப் பாதுகாப்பு மற்றும் ஆளில்லா தளங்களில் அது அவ்வாறு செய்யும்.

புதிய மற்றும் வளர்ந்து வரும் பாதுகாப்பு அச்சுறுத்தல்கள், ஒருமித்த எண்ணம் கொண்ட நாடுகளுடன் இணைந்து பணியாற்றுவதற்கான வாய்ப்புகளை வழங்குகின்றன. தயார்நிலை மற்றும் கூட்டு மீள்தன்மையை வலுப்படுத்துகின்றன. தற்காப்பு அமைச்சு, தற்போதுள்ள தற்காப்புப் பங்காளிகளுடன் அதன் இணக்கத்தை மேம்படுத்தும்.

அதே நேரத்தில் புதியவர்களுடன் தீவிரமான ஒத்துழைப்புகளை உருவாக்கி, விரிவுபடுத்தும். மேலும் ஆசியான் தற்காப்பு அமைச்சர்கள் கூட்டம்-பிளஸ் மற்றும் ஐந்து நாட்டுத் தற்காப்பு ஏற்பாடுகள் போன்ற பலதரப்பு தளங்கள், பங்காளித்துவ உறவு முறையை வளர்ப்பதற்கும் அது தனது பங்கை அளிக்கும்.

தொடர்புடைய செய்திகள்

வட்டாரப் பாதுகாப்புக்காக அமெரிக்காவுடன் தொடர்ந்து செயல்பட உறுதி: சான்

அனைத்து வயது, திறன்கள் மற்றும் பின்புலத்தைச் சேர்ந்த தொண்டூழியர்கள் தேசியப் பாதுகாப்பிற்குப் பங்களிக்க அதிக வாய்ப்புகள் இருக்கும்.

மாறிவரும் வெளிப்புறச் சூழல், சிங்கப்பூரின் அடிப்படை யதார்த்த நிலை குறித்த பொதுமக்களின் புரிதலை வலுப்படுத்தவும், தேசிய முன்னுரிமைகளுக்குப் பொதுமக்களின் ஆதரவை பெறவும், தற்காப்பு மற்றும் தேசிய பாதுகாப்புக்கான உறுதிப்பாட்டை வலுப்படுத்தவும் தேசியக் கல்வி தொடர்பான அதன் அணுகுமுறையைத் தற்காப்பு அமைச்சு புதுப்பிக்கும்.