குழந்தை வளர்ப்பில் மையப் பங்காற்றும் தந்தையருக்கான கருத்தரங்கு

மூன்று பிள்ளைகளுக்குத் தந்தையான சரவணன் செல்வமணி, 41, எப்போதும் பணிகளில் பரபரப்பாக இருப்பதால் அவர் வீட்டில் பிள்ளைகளுடன் நேரம் செலவிடுவது கடினம்.

சுயதொழில் செய்து வரும் அவர் வாரயிறுதிகளிலும் தனது பிள்ளைகளுடன் நேரம் செலவிடாமல் போவதை நினைத்து வருந்தினார்.

இந்த நிலை மாறவேண்டுமென்று முடிவெடுத்த அவர் நேரத்தை நன்கு வகுப்பதில் மாற்றங்கள் செய்ய விரும்பினார்.

அவருக்கு சிங்கப்பூர் இந்தியர் மேம்பாட்டு சங்கம் (சிண்டா) தந்தையர்களுக்காக ஏற்பாடு செய்திருந்த கருத்தரங்கு மிகப் பயனுள்ளதாக அமைந்தது.

சனிக்கிழமை (ஜூன் 28) டெசன்சன் ரோட்டில் உள்ள சிவில் சர்விஸ் கிளப் வளாகத்தில் இடம்பெற்ற சிண்டாவின் தந்தையருக்கான கருத்தரங்கில் சரவணன் உட்பட கிட்டத்தட்ட 100 தந்தையர் கலந்துகொண்டனர்.

சனிக்கிழமை (ஜூன் 28) டெசன்சன் ரோட்டில் உள்ள சிவில் சர்விஸ் கிளப் வளாகத்தில் இடம்பெற்ற சிண்டாவின் தந்தையருக்கான கருத்தரங்கில் கிட்டத்தட்ட 100 தந்தையர் கலந்துகொண்டனர். - படம்: சிண்டா

சிண்டா முதல் முறையாக தந்தையர் அவர்களின் பிள்ளைகளுடனான பிணைப்பை அதிகரிக்க ஊக்குவிக்கும் வகையிலான இந்தக் கருத்தரங்கை ‘அப்பா வாழ்நாள் உறவு’, ‘சென்டர் ஃபோர் ஃபாதரிங்’ ஆகிய அமைப்புகளுடன் கைகோத்து ஏற்பாடு செய்திருந்தது.

கருத்தரங்கில் கலந்துகொண்ட தந்தையர் குழுக்களாகப் பிரிக்கப்பட்டு பல்வேறு நடவடிக்கைகளில் ஈடுபட்டனர்.

குழந்தை வளர்ப்பு என்றால் என்ன, தந்தையாக இருப்பது என்றால் என்ன போன்ற தலைப்புகளை ஒட்டி அவர்களுக்குள் கலந்துரையாடினர்.

அதைத் தொடர்ந்து வெவ்வேறு தலைப்புகள் பற்றி பேசப்பட்ட குழு கலந்துரையாடல் அமர்வு இடம்பெற்றது.

சிண்டா தலைமை நிர்வாக அதிகாரி அன்பரசு ராஜேந்திரன், மீடியாகார்ப் கலைஞரும், கல்வியாளருமான இளமாறன் நடராஜன், துணை மூத்த அரசு வழக்கறிஞர் ஹைரூல் ஹக்கீம் ஆகியோர் அமர்வில் உரையாடினர்.

நால்வரும் அவர்களின் தந்தையைப் பற்றி பகிர்ந்துகொண்டதோடு, இந்த நவீன சூழலுக்கேற்ப அவர்கள் எவ்வாறு அவர்களின் பிள்ளைகளுக்கு ஒரு சிறந்த தந்தையாக விளங்க முற்பட்டு வருகின்றனர் என்பதைப் பகிர்ந்துகொண்டனர்.

பதின்ம வயதுகளில் இருக்கும் இரு மகன்களுக்குத் தந்தையான திரு அன்பரசு, இக்காலத்துப் பிள்ளைகள் மிக அறிவார்ந்தவர்கள் என்றும் அவர்களின் எதிர்பார்ப்புகளுக்கேற்ப பெற்றோர் பிள்ளைகளுக்கு ஓர் உயிர் தோழனாக நடந்துகொண்டால் அந்த உறவு வலுவடையும் என்றார்.

மூன்று வயது மகனுக்குத் தந்தையான திரு ஹைரூல், பரபரப்பான வாழ்க்கைச் சூழலில் எதையும் முன்னரே திட்டமிட்டு செயல்படுவது சரி என்றார்.

சிறிய நேரமாக இருந்தாலும் அதை முழுவதும் பிள்ளைகளோடு செலவிட வேண்டுமென்றார்.

மூன்று மகள்களுக்குத் தந்தையான திரு இளமாறன், தந்தையர் கோபப்படுவது இயல்புதான் என்றாலும், தான் கோபத்தை வெளிக்காட்டாமல் மகள்களை வளர்த்துவருவதாகச் சொன்னார்.

கலந்துரையாடல் அமர்வு மூலம் தான் பலவற்றை அறிந்துகொண்டதாக குறிப்பிட்ட பங்கேற்பாளர் சரவணன், மனைவியுடன் அதைப் பற்றி பேசி பிள்ளைகளுடன் செலவிடும் நேரத்தை அதிகரிக்கும் முயற்சிகளில் இறங்கவுள்ளதாகத் தெரிவித்தார்.

அவரைப் போலவே இதர பங்கேற்பாளரான விவேக் இயானி, 37, மூன்று வயது மகளுக்குத் தந்தை.

மகள் இளம் வயதாக இருந்தாலும் பிள்ளை கைப்பேசியிலும், தொழில்நுட்பச் சாதனங்களிலும் மூழ்கியிருப்பது விவேக்கிற்கு வருத்தம் அளிக்கிறது.  மகள் தொழில்நுட்பச் சாதனங்களைப் பயன்படுத்த விருப்பப்படும் போது அதற்குப் பதிலாக இதர நடவடிக்கைகளில் ஈடுபட வைப்பது, மகளுடன் அர்த்தமுள்ள வழிகளில் நேரத்தைச் செலவிடுவது போன்றவற்றில் விவேக் கவனம் செலுத்த விரும்புகிறார். “பிள்ளை வளர்ப்பில் தந்தையின் பங்கு மிக முக்கியம். அதற்கு அப்பாற்பட்டு தந்தையர்களின் மனப்பான்மையும் மாற வேண்டும். இன்றைய சூழலில் தந்தையர் ஈடுபாடாக இருக்க வேண்டும். தந்தையர் தயக்கமின்றி இத்தகைய நிகழ்ச்சிகளில் கலந்துகொள்ள சிறிய பயிலரங்குகள் நடத்தப்படும்,” என்று தமிழ் முரசிடம் தெரிவித்தார் திரு அன்பரசு. தந்தை, பிள்ளைக்கு இடையிலான பிணைப்பைப் பற்றி பேசிய அவர், ஒரு கட்டத்திற்குப் பிறகு பிள்ளைக்கும், பெற்றோருக்கும் இடையே ஒரு இடைவெளி வந்து விடுவதால் அதை போக்க முன்கூட்டியே இருவருக்கும் இடையிலான உறவு ஒருங்கிணைக்கப்பட வேண்டும் என்று கூறினார்.