மாணவர் முரசு
இ-பேப்பர்
2035ஆம் ஆண்டுக்குள் நான்கு கோல்ஃப் மைதானங்கள் நிரந்தரமாக மூடப்படும். இதனால் வரும் ஆண்டுகளில் சிங்கப்பூரில் 12 கோல்ஃப் மைதானங்கள் மட்டுமே இருக்கும் என்று தெரிவிக்கப்பட்டுள்ளது.
நிலக் கொள்கை மற்றும் நிர்வாகத்தை மேற்பார்வையிடும் சட்ட அமைச்சு, ஜூலை 7 அன்று, மண்டாய் எக்ஸிகியூட்டிவ் கோல்ஃப் மைதானம், வாரன் கோல்ஃப் & கன்ட்ரி கிளப், ஆர்க்கிட் கன்ட்ரி கிளப், தானா மேரா கன்ட்ரி கிளப்பின் கார்டன் மைதானம் ஆகியவற்றின் குத்தகைகள் புதுப்பிக்கப்படாது என்றும் ஏனெனில் அவற்றின் நிலம் எதிர்காலத் திட்டங்களுக்குத் தேவைப்படுகிறது என்றும் கூறியது.
கோல்ஃப் மைதான நிலத்தை பிற பயன்பாடுகளுக்காக மீட்டெடுப்பதற்கான அண்மைய நடவடிக்கைகளின் தொடர்ச்சி இதுவாகும். உதாரணமாக, மெரினா பே கோல்ஃப் மைதானம் ஜூன் 2024ல் மூடப்பட்டது. அந்த நிலத்தின் ஒரு பகுதியைத் தற்போது உருவாக்கப்பட்டு வரும் பே ஈஸ்ட் கார்டன் எடுத்துக்கொள்ளும்.
சிங்கப்பூர் ஐலண்ட் கண்ட்ரி கிளப்பின் 18 குழிகள் கொண்ட மைதானம் மற்றும் கெப்பல் கிளப்பின் 18 குழிகள் கொண்ட சைம் மைதானம் ஆகிய இரண்டின் குத்தகைகளும் 2030ஆம் ஆண்டு டிசம்பர் 31ஆம் தேதி காலாவதியாகும்.
அதன்பிறகு, இந்த இரண்டு மைதானங்களும் இருந்த நிலம், 18 குழிகள் கொண்ட பொதுமக்கள் பயன்படுத்தும் கோல்ஃப் மைதானத்தை நடத்தும் ஒரு நடத்துநருக்கும், ஆர்க்கிட் கண்ட்ரி கிளப்பின் உரிமையாளரான தேசிய தொழிற்சங்க காங்கிரசுக்கும் இடையில் பிரித்துக்கொடுக்கப்படும் என்று சட்ட அமைச்சு ஓர் அறிக்கையில் தெரிவித்தது.
மூடப்படவுள்ள நான்கு மைதானங்களில் முதலாவதாக, 2026, டிசம்பர் 31ஆம் தேதி வரை இயங்கும் குத்தகைக்கு விடப்பட்ட பொது கோல்ஃப் 9 குழிகள் கொண்ட மண்டாய் எக்ஸிகியூட்டிவ் கோல்ஃப் மைதானம் உள்ளது.
அதன் நிலம் கல்வி அமைச்சால் வெளிப்புற சாகச கற்றல் மையத்தை உருவாக்கப் பயன்படுத்தப்படும்.
2032ஆம் ஆண்டுக்குள் கட்டப்படும் மூன்று புதிய மாணவர் முகாம்களில் இந்த முகாமும் ஒன்றாக இருக்கும் என்று கல்வி அமைச்சு முன்பு கூறியிருந்தது.
தொடர்புடைய செய்திகள்
நகர மறுசீரமைப்பு ஆணையத்தின் வரைவு பெருந்திட்டம் 2025ன் படி, 2030ஆம் ஆண்டில் மேலும் இரண்டு கோல்ஃப் மைதானங்கள் மூடப்படும். மேலும் அவற்றின் இடங்கள் குடியிருப்புப் பயன்பாட்டிற்காக ஒதுக்கப்பட்டுள்ளன.
அவை, 2030, அக்டோபர் 31ஆம் தேதி காலாவதியாகும் சுவா சூ காங்கில் உள்ள 18 குழிகள் கொண்ட வாரன் கோல்ஃப் & கன்ட்ரி கிளப் மற்றும் 2030, டிசம்பர் 31ஆம் தேதி காலாவதியாகும் ஈசூனில் உள்ள 27 குழிகள் கொண்ட ஆர்க்கிட் கன்ட்ரி கிளப் ஆகும்.
இறுதியாக, தனா மேரா கன்ட்ரி கிளப் கார்டன் மைதானம், அதன் குத்தகை, 2035, டிசம்பர் 31ஆம் தேதி காலாவதியான பிறகு மூடப்படும்.
கோல்ஃப் மைதானங்களின் மூடல்களைத் தொடர்ந்து, சிங்கப்பூரில் 2035க்குப் பிறகு 12 கோல்ஃப் மைதானங்களே இருக்கும். இதில் தற்போதுள்ள புக்கிட் மற்றும் சைம் மைதானங்களும் அடங்கும்.