மாணவர் முரசு
இ-பேப்பர்
மோசடிப் பேர்வழிகளுக்கும் அவர்களுக்கு உடந்தையாக இருப்போர்க்கும் பிரம்படி தண்டனை கட்டாயமாக்கப்பட்டுள்ளது.
இந்தக் கூடுதல் தண்டனை, குற்றவியல் சட்ட (இதரத் திருத்தங்கள்) மசோதா நாடாளுமன்றத்தில் செவ்வாய்க்கிழமை (நவம்பர் 4) ஏற்றுக்கொள்ளப்பட்ட பிறகு அமலுக்கு வந்துள்ளது.
இரண்டாம் முறையாக சட்டத் திருத்தம் நாடாளுமன்றத்தில் வாசிக்கப்பட்டபோது, சிங்கப்பூரில் செய்யப்பட்ட அனைத்து குற்றவியல் புகார்களில் 60 விழுக்காடு மோசடிகள் சார்ந்தவை என்று உள்துறை மூத்த துணை அமைச்சர் சிம் ஆன் விளக்கினார்.
கடந்த 2020ஆம் ஆண்டு முதல் இவ்வாண்டின் முதற்பாதி வரையில் 190,000 சம்பவங்கள் பதிவாகியுள்ளதாகவும் ஏறத்தாழ $3.7 பில்லியன் இழப்பு ஏற்பட்டுள்ளதாகவும் வெளியுறவு மூத்த துணை அமைச்சருமான சிம் ஆன் விவரித்தார்.
மோசடிக்காரர்கள், மோசடிக் கும்பல்களின் உறுப்பினர்கள் போன்றோருக்கு வழங்கப்படும் பிரம்படிகள், குற்றங்களின் தீவிரத்தைப் பொறுத்து அமையும். அவை ஆறு முதல் 24 பிரம்படிகள் வரை இருக்கலாம். மோசடிக்காரர்களுக்கு உடந்தையாக செயல்படுவோருக்கு 12 பிரம்படிகள் வரை கூடுதல் தண்டனை விதிக்க சட்டத் திருத்தம் வகை செய்கிறது.
சமூக ஊடகங்களில் பாலியல் ரீதியானவற்றை வெளியிடுதல், பகிர்தல் போன்ற குற்றங்களுக்கும் கடுமையான தண்டனைகள் சட்டத் திருத்தத்தில் இடம்பெற்றுள்ளன. பாதிப்படையக்கூடியவர்களுக்கு அதிக பாதுகாப்பளித்திட அந்த மாற்றங்கள் செய்யப்பட்டுள்ளன.
குற்றங்களின் பட்டியலில் முதல் இடத்தில் இருக்கும் மோசடியால் மக்கள் இழந்துள்ள மொத்த தொகையின் மதிப்பீடு, உட்லண்ட்ஸ் வட்டாரத்தில் கட்டப்பட்டுள்ள புதிய சுகாதார வளாகத்தின் செலவைவிட மூன்றரை மடங்கு அதிகம் என்றும் மூத்த துணை அமைச்சர் குறிப்பிட்டார்.
காவல்துறை வழங்கிய விவரங்களின்படி, இவ்வாண்டு ஜூலை முதல் செப்டம்பர் மாதம் வரையில் $187.1 மில்லியன் மோசடிகளில் இழக்கப்பட்டுள்ளது.
தொடர்புடைய செய்திகள்
மோசடிக் குற்றங்களுக்கு பிரம்படிகள் கட்டாயமாக்கப்பட்டுள்ள அதேவேளையில் குறிப்பிட்ட குற்றங்களுக்கு அந்த தண்டனை தேவையா என்பது பற்றி மதிப்பாய்வு செய்யப்பட்டுள்ளதாகவும் மூத்த துணை அமைச்சர் சிம் ஆன் தெரிவித்தார்.
செயல்களுக்கு ஏற்ப பிரம்படிகள் 96 குற்றங்களுக்கும்; 65 குற்றங்களுக்கு கட்டாய பிரம்படிகளும் தற்போது நடப்பில் உள்ளன.