மாணவர் முரசு
இ-பேப்பர்
மோசடிக்காரர்களுக்கு எதிராக இன்னும் துரிதமான நடவடிக்கைகளை எடுக்க அரசாங்கத் தொழில்நுட்ப அமைப்பு (கவ்டெக்), மோசடி தொடர்பான புலனாய்வுத் தகவல்களைத் தரும் அனைத்துலக அமைப்பில் இணைந்துள்ளது.
அனைத்துலக சமிக்ஞை பரிமாற்றம் (Global Signal Exchange) என்ற அமைப்பு மூலம் மோசடிக்காரர்கள் உலக நாடுகளில் பயன்படுத்தும் ஆக அண்மைய உத்திகள், இணையத்தளங்கள் ஆகியவை குறித்த தகவல்களை சிங்கப்பூரின் கவ்டெக் அமைப்பு பெற்றுக்கொள்ளும்.
தகவல், மின்னிலக்க மேம்பாட்டு மூத்த துணையமைச்சர் டான் கியெட் ஹாவ், செப்டம்பர் 2ஆம் தேதி நடைபெற்ற அனைத்துலக ஆசிய மாநாடு 2025ல் பேசினார்.
மோசடிக்காரர்களின் இணைய முகவரி குறித்து அனைத்துலக சமிக்ஞை பரிமாற்ற அமைப்பு தகவல் அளித்தவுடன் சிங்கப்பூர் அதிகாரிகளால் அதை உடனடியாக முடக்க முடியும்.
“அனைத்துலக சமிக்ஞை பரிமாற்ற அமைப்பில் இணைந்திருப்பதன் மூலம் மற்ற நாடுகளில் என்ன நடக்கிறது என்பதை முன்கூட்டியே அறிந்துகொள்ள முடியும். முக்கியமாக எது நடந்தாலும் உடனடியாக அதை எப்படி சமாளிப்பது என்பதை தெரிந்துகொள்ள முடியும்,” என்று திரு டான் கூறினார்.
பிரிட்டனைத் தளமாகக் கொண்ட இணைய உளவு, ஆலோசனை அமைப்பான அக்ஸ்ஃபர்ட் தகவல் கூடம், கூகல் நிறுவனம், லாப நோக்கமற்ற அமைப்பான அனைத்துலக மோசடி எதிர்ப்பு கூட்டமைப்பு ஆகியவை இணைந்து கடந்த ஆண்டு அக்டோபரில் அனைத்துலக சமிக்ஞை பரிமாற்ற அமைப்பை உருவாக்கின.
சட்ட அமலாக்க அமைப்புகளுக்கு இடையே இணையக் குற்றம் குறித்த தகவல்களைப் பகிர்ந்துகொள்வது மூலம் அடுத்த பத்தாண்டுக்குள் இணைய மோசடிகளைப் பாதியாகக் குறைக்க அனைத்துலக சமிக்ஞை பரிமாற்ற அமைப்பு இலக்குக் கொண்டுள்ளது.
அனைத்துலக சமிக்ஞை பரிமாற்ற அமைப்பு தொடங்கியதிலிருந்து மோசடிக்காரர்களுடன் தொடர்புடைய மின்னஞ்சல் முகவரிகள், இணையத்தளங்கள், தொலைபேசி எண்கள், என அனைத்துலக அளவில் 425 மில்லியனுக்கும் அதிகமான மோசடிகள் கண்டறியப்பட்டன.
தொடர்புடைய செய்திகள்
கவ்டெக்கைத் தவிர மைக்ரோசோஃப்ட், மெட்டா ஆகிய நிறுவனங்கள் அனைத்துலக சமிக்ஞை பரிமாற்ற அமைப்பில் இணைந்துள்ளன.
சிங்கப்பூரின் சன்டெக் மாநாட்டு, கண்காட்சி நிலையத்தில் நடைபெற்ற மோசடிக்கு எதிரான அனைத்துலக ஆசிய மாநாட்டில் 60க்கும் அதிகமான நாடுகளைச் சேர்ந்த தலைவர்கள், கொள்கை ஆய்வாளர்கள், அமலாக்க அமைப்புகள் பங்கேற்றன.
