மாணவர் முரசு
இ-பேப்பர்
முறையற்ற மெடிஷீல்டு லைஃப் கோரிக்கைகளை முன்வைத்ததற்காக 10 மருத்துவர்களுக்கு எதிராக நடவடிக்கை எடுக்கப்பட்டுள்ளது.
இவ்வாண்டு (2025) ஜனவரிக்கும் அக்டோபருக்கும் இடையில் முறையற்ற சிகிச்சைகளுக்காக அவர்கள் அந்தக் கோரிக்கைகளைச் சமர்ப்பித்ததாகத் தெரிகிறது. அத்துடன் அழகை மேம்படுத்துவதற்கான சிகிச்சைகளை மருத்துவ ரீதியாகத் தேவையானவை என்று அவர்கள் கூறியதாகவும் தெரிகிறது.
கோரிக்கை செய்வதற்குரிய முறையான நடைமுறைகள் குறித்த பயிற்சிக்கு 10 மருத்துவர்களும் செல்லவேண்டியது கட்டாயம். மருத்துவ வழிகாட்டி நெறிமுறைகளைப் பின்பற்றுவதும் அவசியம். சுகாதார அமைச்சு வியாழக்கிழமை (நவம்பர் 13) வெளியிட்ட அறிக்கையில் அந்த விவரங்கள் இடம்பெற்றுள்ளன.
“எதிர்காலத்தில் சம்பந்தப்பட்ட மருத்துவர்கள், கோரிக்கைகளை முன்வைக்கும்போது அணுக்கமாகக் கண்காணிக்கப்படுவார்கள். அப்போதும் முறையற்ற கோரிக்கைகள் சமர்ப்பிக்கப்பட்டால் கடுமையான நடவடிக்கைகள் எடுக்கப்படக்கூடும். அவர்களின் மெடிசேவ், மெடிஷீல்டு லைஃப் சான்றளிப்பு தற்காலிகமாக அகற்றப்படும் அல்லது ரத்துச் செய்யப்படும்,” என்று அமைச்சு தெரிவித்தது.
அமைச்சு, 10 மருத்துவர்களின் பெயர்களை வெளியிடவில்லை.
சுகாதார அமைச்சின்கீழ் செயல்படும் கோரிக்கை நிர்வாக அலுவலகத்தின் நடைமுறைகளைத் தொடர்ந்து, மருத்துவர்களுக்கு எதிராக நடவடிக்கைகள் எடுக்கப்பட்டன. அந்த விவகாரத்தில் என்ன நடவடிக்கை எடுக்கவேண்டும் என்பதைச் சிறப்பு நிபுணர் குழுக்கள் முடிவுசெய்தன. அமைச்சும் மெடிஷீல்டு லைஃப் மன்றமும் அந்தக் குழுக்களை நியமித்தன.
2022ஆம் ஆண்டு நிறுவப்பட்டதிலிருந்து அலுவலகம் அத்தகைய 130 மெடிஷீல்டு லைஃப் கோரிக்கைகளைக் கையாண்டுள்ளது. அவற்றில் 44 மருத்துவர்கள் சம்பந்தப்பட்டிருந்தனர். பொருத்தமற்ற கோரிக்கைகளைச் சமர்ப்பித்தவர்களுக்கு எதிராக நடவடிக்கைகள் எடுக்கப்பட்டன.
நான்கு வகையான சிகிச்சைகளுக்குரிய கோரிக்கை விதிமுறைகளை அலுவலகம் வெளியிட்டுள்ளது. வயிறு, குடல் உள்நோக்குக் கருவிப் பரிசோதனை; காது, மூக்கு, தொண்டை; இதயநலன்; சிறுநீரகம் ஆகியவையே அவை. மெடிஷீல்டு லைஃப் திட்டத்தின்கீழ் முறையான கோரிக்கைகளை மருத்துவத் துறை நிபுணர்கள் முன்வைக்க அவை தெளிவாக வழிகாட்டும்.
தொடர்புடைய செய்திகள்
கோரிக்கைகளைச் சமர்ப்பிப்பதில், குறிப்பாகத் தனியார் துறையில், அந்த முயற்சிகள் பலன் தந்திருப்பதாக அமைச்சு சொன்னது.