‘ஏ’ பிரிவைத் தவிர மற்ற எல்லா பிரிவுகளிலும் ‘சிஓஇ’ கட்டணம் உயர்வு

வாகன உரிமைச் சான்றிதழ் (சிஓஇ) கட்டணம் புதன்கிழமையன்று (மார்ச் 5) நடந்த ஏலக்குத்தகையில் பிரிவு ‘ஏ’ ஐத் தவிர மற்ற எல்லாப் பிரிவுகளிலும் அதிகரித்தது.

குறிப்பாக, பெரிய, கூடுதல் சக்திவாய்ந்த கார்கள், மின்சார கார்களுக்கான பிரிவு ‘பி’க்கான சிஓஇ கட்டணம் $113,000க்கு உயர்ந்தது.

பிப்ரவரி 19ஆம் தேதி நடந்த ஏலக்குத்தகையுடன் ஒப்பிடுகையில் பிரிவு ‘பி’க்கான சிஓஇ கட்டணம் 3.1 விழுக்காடு ஏற்றம் கண்டது. அம்மாதம் அது $109,598ஆக இருந்தது.

சிறிய, குறைந்த சக்திகொண்ட கார்களுக்கும் மின்சார கார்களுக்குமான ‘ஏ’ பிரிவில் கட்டணம் 0.1 விழுக்காடு குறைந்து $ 92,730 வெள்ளியாகப் பதிவானது. கடந்த ஏலக்குத்தகையில் அப்பிரிவுக்கான சிஓஇ கட்டணம் $ 92,850 ஆக இருந்தது.

பொதுப் பிரிவான ‘இ’ பிரிவில் சிஓஇ கட்டணம் $2,899 அதிகரித்து $112,901 ஆகப் பதிவானது.

வர்த்தக வாகனங்களுக்கான ‘சி’ பிரிவில் கட்டணம் $65,189லிருந்து அதிகரித்து $67,001 வெள்ளியாகப் பதிவானது. கடந்த ஏலக்குத்தகையுடன் ஒப்புநோக்கும்போது இது 2.8 விழுக்காடு அதிகமாகும்.

மோட்டார் சைக்கிள்களுக்கான ‘டி’ பிரிவில் சிஓஇ கட்டணம் 4.7விழுக்காடு அதிகரித்து $ 9,201 வெள்ளியாகப் பதிவானது.